唔係掛！原來真係有鬼！－現代捉鬼故事: 第三章－不平凡的開始－4

占卜堂定於星期六下午。
反正冇乜野做，我亦自己提早多少少上呢一間 「學校」。
我一個人坐左o係一間大約可以坐十個人既班房。
又或者，早到係我最大既缺點。

細個既時候老豆每次都同我講：約左人，最起碼要早到15分鐘。
你早到得愈多，代表你對個約會愈尊重。

呢個理念我一直都有實行，
多得呢個理念，我試過一個人戇居居企左o係旺角地鐵站一個鐘。





「呢個就係我了解異世既既第一步喇。」早到左半個鐘既我，
一個人坐o係班房上facebook。

作為facebook stalker，我facebook 當然有唔少索女女既相睇。
不過幾時都話，如果識睇，一定係睇台灣妹。

台灣妹個樣又cute，最重要係乜？
就緊係佢地一ｄ都唔孤寒，樂於同大家分享佢地既事業。
我只能講，我add得入facebook 既，全部都係偉大既實業家。 「咁早既你？」聽到有把女人聲講野，作為有教養既孩子都應該抬頭望下人地。





唔望由是可，一望不得了。

中間分間，長頭髮，加上微微既曲髮，
眼大大，鼻高高，仲有個殺人酒窩。
我敢講，佢真係我見過個樣最接近藝術家筆下希臘女神既人類。

我記得有個高登巴打曾經講過：
相由心生，多做好事，好過整容。





又或者，佢真係整左容。

「係呀，我習慣去到個早到。」我好禮貌咁回番呢個疑似人造人。

「咁你等下先啦，我地等齊人就開始。」

佢呢句野我真係想拎起手上面部iphone5s 一野飛埋去。
但係上個月先出，信用卡月結單都未出，
再加埋今個月既學費，我成份糧就咁又冇左。
飛埋部電話出去，我就可以兩袖青風，落樓下同其他人爭食二手飯。