唔係掛！原來真係有鬼！－現代捉鬼故事: 第三章－不平凡的開始－3

兩個月話長唔長，話短唔短。
對學生黎講，７月開始既幾個月都係開心快活既季醫節；
對一個冇左靈魂既打工作黎講，其實日日都差唔多。
除左有時對住天文台個網做馬迷，大叫 『八號！八號！』之外，
對一個拖都冇拍過，放工0社交既我黎講，
兩個月真係轉下眼就過。

記得辦手續入學既時侯已經上過去一次，

當日去到學校既樓下，一個位於太子咁上下既商業大廈。




咁都好正路既，呢種學校一定唔會好似其他大學，i大咁樣有一座野，
加埋上次聽電話個阿姐咁趕客既態度，佢地到今時今日仲未執都真係偷笑。

學校位於大廈既二樓。
一出升降機就已經係一個相當特別既環境。
呢一層得一個單位，電梯大堂既報置已經同成個市區格格不入。

一道大制大門，左邊有一個小小既人造瀑布，地板上面有一個十二星座既圓型裝飾。
門兩邊有兩盞十九二十世紀初既壁燈；瀑布邊仲有個位不停放ｄ煙出黎，真係唔知佢掉左幾多乾冰落去。
入到去其實都只係間普通學校，同之前去ｄ日文學校差唔多，




不過日文班一黎就叫我背唔知幾多個字，我上左兩堂亦放棄左。

見到個reception 姐姐，佢一開聲我已經認得佢，
不過算！我大人有大量唔同你計！

咁作為好奇既高登仔，我當然有問佢頭先地下個圓圈係乜黎。
佢就話係唔知咩星盤定命盤；
但以我所知，sink 盤 (即係洗手盤) 應該係o係廁所或者廚房，而且一定唔係裝o係地板。

報名要寫一張簡單既form，包括自己少少資料同埋聯絡方法，




最搞笑係有緊急聯絡人。希望佢唔係想打比我老豆叫佢黎接放學。

6000 大元就咁冇左。我永遠都唔會忘記呢一日。
因為6000蚊夠我買ps4連Metal Gear。
依家睇黎我只可以期待達哥會買。