唔係掛！原來真係有鬼！－現代捉鬼故事: 第三章－不平凡的開始－1

香港由唔知幾時開始就出現左一種明星效應。
食野傳單印既開始唔係野食，又係一一個明星夾住一Ｄ細到我睇唔到既野之後好大隻字寫住好好味；補習傳單印既唔係同學成積，而係補習阿sir miss Chok 過林峰既相。

老豆比我呢張亦唔例外，大大格印住 『全港最人氣占卜師親身教學！』
心諗有得唔親身教咩？諗諗下，以前讀書時期補習Ｄ所謂明星阿SIR 補習堂都只係播阿Sir條片。

咁老豆介紹都應該係好野黎既，即管打去睇下咩料。

「你好，呢度係　鏡花水月堪輿術數占卜八字紫微斗數中式風水西式魔法學校，請問有乜幫到你？」





你個名唔好長Ｄ？！仲長過依家Ｄ輕小說既名，
他朝難保有一日我去KFC 叫個餐，佢地Ｄ名都有三四十個字。

「你好呀小姐，我想問問你地係唔係有塔羅牌既班架？」我唔想對面個長舌婦講咁多野，
一於單刀直入。

「你之前有冇接觸過塔羅架？」

「都有既，比人卜過囉。」又一單N年前比女神帶去廟街比人宰割既經歷，
當年陪女神行街，佢話想占卜，於事就去左廟街啦。




半個鐘收左我三百幾蚊，事後女神仲要話 『都唔準既』，
我幾百蚊即時化為烏有，就連半點女神好感度都升唔到。