唔係掛！原來真係有鬼！－現代捉鬼故事: 第一章－離別訣－9（續）
「老媽子？」 我都知呢件事係好白痴，作為耶撚既我o係呢刻竟然選擇放棄自己既信仰，
對住個影叫阿媽，又或者可能連我都癲埋。而淚線亦o係呢個時候再次缺堤。
「衰仔，男人老狗喊苦喊忽，你睇下你似乜！」
人都走左，估唔到返黎都要鬧我幾句。
「死老母都唔喊，唔通便秘先黎喊呀？」我試圖忍住自己既眼淚，同「老媽子」好好咁傾下計。
「我得今晚返黎睇下你地架咋，唔可以留好耐。」
離開左小學之後，我真係未試過同佢咁傾計，
最後一次咁傾計，應該係升中統一派位，當時佢問我想入咩學校。
o個時既我緊係諗住求求其其講曬之後去睇數碼暴龍，
不過如果比我可以返返去當年既話，我一定會好好咁珍惜每個同老媽子相處既時光。
雖然話唔可以留得耐，但係我都把握住最後既少少時間，同媽子講一Ｄ呢世人都冇同佢講過既野，包括我唔係基。
「我差唔多要走喇。」突然老媽子打斷左我發表我要成為世界打機頂級打機高手既偉論。
「唔走我冇得走架喇。」
道別係一件好易既事，平時朝早出門口之前大叫一句：我出門口喇！
又或者講句：今晚唔駛等我門！
當老媽子追問我聽日駛唔駛帶飯，又或者叫我帶遮既時候，以前總係會答佢：「得喇唔好煩啦！我遲到喇！」 今次角色同平時調番轉。
「我走喇。」
「.........」 我想叫佢著多件衫，但係老媽子依家得個影，我諗應該唔駛著衫掛。
「唔駛擔心我喇，我會生性架喇。」
「嗯。」
白影慢慢飄向窗口。
「係呀！」 老媽子突然開聲。 「同你老豆道歉啦，你頭先噴到佢成面都係喇～哈哈。」
死左都仲掛住個老公，可以既話真係想扮個模範夫婦獎比你。
我冇答，只係點一點頭。
「多謝你。」 呢句說話我諗我真係廿二年黎都真心咁同阿媽講過。
「多謝你做左我廿二年阿媽。」
「係廿三年呀仆街仔！」上網有條片講過，
粗口可以化解唔同時候既尷尬同隔膜，睇黎上網d 9uppers 講d 野有時真係錯唔曬。
我低下頭，唔想比老媽子見到我個衰樣，
起碼o係佢走之前，最後一個印象，一定唔可以係喊。
「考慮下跟你老豆入行啦！」
「你想我做裝修？」
當我再抬高頭，房入面已經回歸平靜。
我諗唔駛上高登問人，我見到老媽子，九成都係因為老豆煲加料湯。
我吞一吞口水，拎平時放o係電腦旁邊，要黎應負「緊急情況」用既紙巾抹一抹眼淚。
平靜好心情之後打開房門。
見到老豆既背影，佢面前既茶几上面有幾團用過既紙巾，希望佢唔係睇住「回魂夜」黎打丁啦。
「多謝你老豆，仲有....對唔住。」
「嗯，早Ｄ訓喇！」有時男人既背影真係幾型棍(利申:非GAY)，
最起碼，呢一刻我覺得型。