唔係掛！原來真係有鬼！－現代捉鬼故事: 第十章 - 萬惡之夜 -2

今個星期六嘅晚上，其他人眼中咪又係一個普通嘅週末。
我獨個站立於人來人往嘅西洋菜南街 ，於有十幾廿間放題嘅集中地兆萬樓下，
靜待Smoky嘅出現。距離約定時間仲有幾分鐘，不過我都明白特別嘅日子入面，
唔應該要女仔等。可能外間人睇我依家好似好平靜，但係我諗一眾巴打都會覺得其實呢個真係可以媲美考DSE、present FYP又或者係第一次見工嘅人生大事。當然，我係講緊心理壓力。

我記得網上面有文章話過 ，每個女人對特別節日都係非常重視，
即使佢咀巴說不，但係身體就一定很誠實。
聽講過有巴打真係不識好死，女朋友同佢講”其實唔駛同我慶祝週年紀念架喇！”，
之後呢位巴打又真係唔同女朋友慶祝。
下場係點？我地亦無謂喺度爆人慘事喇。






「傻瓜！等左好耐喇！」一個人影由我身旁一躍到我面前，
獨自反思網上巴打慘況之中嘅我被突如其來嘅 『突襲』嚇左一跳，後退了半步。

眼前人見到成功將我嚇到，由她的笑聲中也知道她對今次突襲成果相當滿意。
但我比人嚇完，我就真係唔多滿意。

「嚇死咩！你行路冇聲嘅！」我對眼前悉心打扮 嘅Smoky說。不過今次我都係第一次見到Smoky 著長裙，與其話長裙肉酸，不如話只係外間人Carry唔起條裙。眼前Smoky 一別平時少女打扮，換上無由Tee shirt 長裙，整個感覺突然變得稍為成熟了一點，但看上去依然比其他女生清純，或者這個就是她一直吸引我的地方。





「咁我係鬼黎架嘛～～～」Smoky 扮起鬼瞼，說。

「係喇係喇！」雖然心裡很想臭罵Smoky 一餐，
但係整個人卻被佢今日嘅打扮吸引住，即使連嬲嘅時候同空閒都冇。

Smoky 亦似乎發現了我視線停留左喺佢身上好一段時間，Smoky 望望自己全身，
打量一下自己衣著打扮上是否有任何出錯或污穢後，問「做咩呀.....唔好睇呀？」
Smoky 吞吞吐吐地說。可能係幾十年都冇人讚過佢，搞到佢欠缺自信。

「唔係呀，幾好睇丫。」　我笑說。





每一個女性聽到別人稱讚她的打扮都會高興得眉飛色舞，Smoky 亦唔例外。
我伸手拖住Smoky ，進入了早就預約好的餐廳。安坐好之後，我隨即將每款一張的Order 紙整齊的排在Smoky 面前。

「下....要點寫呀？我唔識...」Smoky 尷尬地說。
 「你睇下想食D咩，之後喺個格仔度寫個數字就得架喇！」我一時醒唔起60年前係冇放題，其實16年前都未必有。

「點解全部都好似生野咁嘅？你食完會唔會肚痛架？」Smoky 再三地提問。

「唔會啦！上次肥榮都係咁食咋嘛！」我笑說。
「咁點同啫，肥榮咁大份...」我都唔好意思提，肥榮依家仲Fit過我。

我望住眼前人，雖然好想笑佢，但係一諗到佢每一件事都為我諗，
連落Order 都擔心我嘅時候，呢一刻，心入面真係好溫暖。