唔係掛！原來真係有鬼！－現代捉鬼故事: 第十章 - 萬惡之夜 -1

有時D野真係唔到你唔信，每個行業都有旺季淡季，
而我相信我呢行亦唔例外。

公司冇Case 之餘，夏天嘅氣溫亦令到冇冷氣嘅廟街街頭人流遠比冬天時少。
或者香港人始終都係都係享受慣。試問喺炎熱既天氣之下，有咩人會想喺一個連風扇都冇嘅帳篷之下，搵一個麻甩佬占卜？咁當然，我唔止係一個普通嘅麻甩佬，我仲係一個喺網上討論區長駐嘅占卜師，
加埋自己Facebook o個三幾千like，呢咁丁點嘅名氣，都夠自己一日有番三兩個客人，
都叫做夠食夠用。

不過之前都同大家講過，其實幫一個客卜，真係唔駛幾耐，
所以一晚大部份嘅時候我都係同大家一樣，拎部ipad出黎睇下動漫，




上下高登，同埋寫下依家呢一短半傳記。

一陣哀怨嘅音樂聲打破左帳篷之內嘅寧靜，
智能電話螢幕上顯示出一個女孩子嘅頭像。

「喂，傻瓜！做緊野呀？」電話另一邊的女聲問道。

「唔係啦，靜到死。一陣都係早少少返屋企，個帳篷又冇風扇，熱到傻呀！」

「哈哈～你下次去七仔買啲冰嘛！之後放喺檯底，你咪可以神不知，鬼不覺咁抖涼囉！」





唔知係唔係痴得我太多，而我又痴得師傅太多。
Smoky 亦變得愈黎愈識講笑，又或者，我應該話佢嘅Gag 愈黎愈爛。

「哈哈。邊有人咁做架？」我應酬式笑了兩下，悶熱嘅氣溫已經令我嘅耐性同反應降到最低。
「我地以前成日都咁做架啦！」Smoky 說。
 「下...我地？」我印象之中，我從來冇用過呢D咁Old school 嘅方法去抖涼。

「我....我只我地以前d人呀，我地以前冇冷氣，冇風扇。
如果天氣太熱，我地都會打盆水去濕腳，好舒服架！」Smoky 笑道。





「唔啦，早D返屋企涼冷氣仲好啦！」

「冇你咁好氣！」Smoky 見我對她的方法不領情，自然相當沒趣。「喂！傻瓜問你ｄ野。」

「問丫。」

「你記唔記得星期六咩日子？」

「星期六？」

我即時望一望手機嘅日歷。
原來唔覺唔覺又一年，又到左自己嘅生日。
不過如果一個女仔咁樣問得你，明確地佢記得嘅絕對唔係呢個日子，
而係同我生日同一日嘅拍拖週年紀念日。




而我咁醒目，我緊係知點答啦。

「緊係記得啦，有個人一年前，喺我食營多嗰陣，整壞曬我屋企啲燈嘛。」
此時電話另一邊嘅人已經輕輕地偷笑。

「咁之後呢？」Smoky問。

「點知我一睇之下，嘩！原來係隻好恐怖嘅女鬼，咁冇法啦，我呢d天師世家，
決定替天行道，收左佢！」

「收左佢咁厲害？請問大師係點收法呢？」Smoky 一面聽，一面笑。

「嘿！我個方法就勁喇，我決定用糖衣毒藥攻勢，
養到佢肥一肥，等佢走都走唔到嘅時候，就收左佢！」我氣宇軒昂地說。





「咁巴閉呀？但係你口中好恐怖嗰隻女鬼連肥都冇肥過喎！」Smoky 招積地說。

「咁無計喇，星期六我決定帶佢食大餐，今次佢想唔肥都唔得。」

「真架？我地去邊呀？」
 「到時你咪知囉。」我故意扮作賣關子。但我相信聰明嘅你應該估到，
其實我係未諗。作為小毒男，我最叻最叻都係食放題，加上Smoky 過去60年除左香燭之外都冇乜食過乜，我相信食放題都唔係D咩壞事。而最重要嘅係，一週年我應該送咩比佢呢。

「咁我地星期六晚見？」Smoky問。

「好，星期六晚見。」