唔係掛！原來真係有鬼！－現代捉鬼故事: 第九章 - Showtime - 27(續)

返到公司之後，師傅隨便向老豆交代左情況之後，
亦返到自己坐位之上執拾用具，當然，所謂嘅執拾，只係將所有用具由袋入面倒出檯面，
之後把它們掃埋一二邊，隨後望望辦公室內嘅鐘，打量一下距離六點收工呢半個鐘內到底做乜好。

我走到師傅的位置，向追問一D我唔敢直接問Owen 嘅問題。
「師傅...」

「嗯？」

「其實有關Owen 嗰度，我仲有少少野想問，不過因為始終都同Owen 唔熟，




我諗都係問你比較好少少...」

「問丫。」

「其實Owen 個情況係點樣？佢依家分裂左出黎，咁佢同已經投左胎嗰部份會唔會有咩關聯？」我問。
 「或者咁講，依家Owen就好似分左兩半咁，我地叫呢種情況叫「分魂」。
『真身』同 『分魂』 雖然話係叫做分開左，但係亦會有機會可以喺特別嘅時候連接到。
我聽Owen 自己講，佢就話試過發夢見到另一個自己，有另一套生活，咁我地就猜測， 『真身』 亦有可能透過發夢，而得到Owen 依家嘅記憶。 不過呢d都係我同Owen亂估嘅啫。」
師傅解釋道。





「哦....咁我再想問，點解你可以召到Owen出黎？」我兩眼發光，因為我記得當我第一次去金仔度買野嘅時候，金仔已經提過召喚呢兩個字。

「咪透過呢樣囉。」師傅打開了自己的櫃筒，入面有一排幾個的黃金色籌碼。
師傅拿出了其中一個。「有冇聽過金身？」

我點了點頭。
 「鬼魂可以透過好多方法實體化，好似Smoky 咁。不過，實體化出黎嘅身體好多都只會係相當虛弱，因為靈體本身質量好低，如果你要一個靈體實體化到可以作戰，基本上冇乜可能，如果強行咁做，個實體基本上連小朋友嘅拳擊都未必頂得住。咁有乜方法可以強化呢？就係靠黃金。鬼魂可以借黃金令自己短期內實體化，不過時間好短，再加上鬼魂上到黎自己本身亦有時限，你亦唔知你召上黎嘅鬼魂係唔係真係咁信得過，所以，我就唔建議你試喇。」

「咁你又召Owen上黎？」問題衝口而出，
就喺我問完問題嘅一刻，見到師傅嘅面色，我已經知道我問錯問題。





師傅而色一沉，但係轉眼間面上卻變成掛著一個安詳的笑容。
就如一個已經享受夠人生的老年人才應該擁有的微笑。

「如果，Owen 真係要攞我命，
我唔會反抗。」師傅嘅笑容加上說話，令人覺得佢一早已經有死嘅覺悟。
我唔知師傅同Owen生前係Friend 到咩地步，不過如果人生有一個連條命可以同你share 嘅好基友，人生真係死而無憾。

「哎呀！」師傅突如其來嘅叫聲令我由沉思中回來。
當我回個神，師傅額頭又多左一道紅色嘅撞傷傷痕，檯上亦多左一個打開嘅急救箱同一系列急救用品。

「死死死，你有排做呀！」Jessie 喺師傅檯頭另一邊叫道，
如無意外，我諗我錯過左師傅被人用急救箱掉嘅好戲。

「痴孖筋架你！拎個箱車落我個頭度！頭黎架！會傻架！」師傅手掩傷口，一道紅色液體由師傅手上流下。





「爆缸喇又！」師傅立即於檯上拿了幾張面紙，將傷口掩住。
「我本身見你扶我返黎，諗住幫你包紮架，依家你咁想死丫嘛，唔駛我包啦！死左佢啦！」
Jessie 兇恨地破口大罵。

「你收工啦，你幫我包？一陣包到我個頭成個白色炸彈人咁呀！」
說畢，師傅立即於檯上拿走自己的銀包電話，火速向公司門口直跑。

「你食屎啦！死人Cloud！」Jessie 將檯上的急救用品向毒舌嘅師傅飛過去。

或者，佢地兩個都係應該好似依家咁打打鬧鬧比較好，
最起碼公司冇咁悶，我亦都唔想師傅咁英年早逝。