唔係掛！原來真係有鬼！－現代捉鬼故事: 第九章 - showtime - 10

十數分鐘後，師傅由老豆嘅房出黎。

師傅慢步走回自己的位置，推開自己座位後的油壓椅，
拿出兩把長直傘，一黑一白，之後將檯面上幾件物品收到一個黑色＂蔡瀾袋＂入面。

「喂！」師傅對住我大叫。
「執野行喇！帶你出去做野。」師傅一面奸狡嘅笑容。

「下...我都要去？」雖然心入面覺得有job做係開心，
不過眼見師傅面上嘅表情絕對知佢不懷好意。





「緊係要去啦！如果唔係你點找番我條Figure數？」
我終於明白師傅面上笑容嘅隱藏意義，睇黎今次嘅收入又會被師傅抽乾曬。
每一次同師傅出去，美其名係比機會我，實際上都係全部我做曬，
不過冇計啦，鬼叫佢係我師傅咩。

我打開櫃筒，其實我都一早已經統所有用具打包好，放喺一個專門出去Ooutjob嘅袋入面，
因為我地嘅工作唔多唔少都有少少似消防警察，一接到order就即做野，
唔係下下有時間好似師傅咁到臨開工先慢慢pack，又或者經驗老到嘅人先夠膽咁做掛。





當我望住師傅慢慢執野之際，有隻手搭左落我嘅搏頭之上。
我抬頭一望，Jessie一手拎住杯茶餐廳外賣凍飲，一邊同我打眼色say hi。

「早晨Jessie 姐。」

「唔駛姐啦～點呀，條友又恰你呀？」Jessie 見到我塊面黑過奧巴馬，隨即一問。

「無...無呀。」

「無？話比姐姐知！等姐姐幫你出頭！」一時又叫我唔好叫佢做Jessie 姐，




一時又話姐姐幫你出頭，女人呢種生物真係難觸摸。

「真係無呀，師傅話帶我去做野咋嘛。」我吞吞吐吐地回答。

「帶你去做野咁好聽？睇死佢咪又係坐埋一二邊睇你做野！」睇黎Jessie真係同師傅共事左好多年，
就連師傅呢Ｄ吞撲行為，Jessie 都料如指掌。

「哈哈，一時時啦。」我尷尬地回答。

「唉，你都真係冇鬼用，我同你地一齊去，反正我今日都冇野做。」Jessie 對我單一單眼，
佢呢句一出，我彷彿見到天元突破入面嘅庸子。
唔係話Jessie 有庸子 咁好身材或者暴露，而係Jessie 突然有種絕對可以信賴嘅同伴感。

「我冇聽錯呀嘛？你去？」師傅唔知由幾時開始企左喺Jessie 後面，
突然由Jessie 身後冒出頭說。





「你條蛋散偷聽人講野咁缺德既？」Jessie 憤怒地鬧。

「你條婆娘離間我地兩師徒又好好？」師傅不屑地咀角一戚。

眼見兩人勢成水火，我感覺到，第三次世界大戰好快會爆發，
就喺呢個Office，正正喺我面前。

「呀！不如出發囉！」我以九秒九嘅速度突然彈起身，
以免兩位前輩一陣真係打喺上黎。

「咁又唔駛咁急，」師傅說。「我Call 左的的。」

「你會坐的士咁好死？今個月唔駛買你咸濕公仔咩？」Jessie 毫不客氣咁回應。





師傅沒有回應，只是眼角望一望我，不禁偷笑。
睇黎我已經清楚知道今日呢單Job 嘅收入會去邊度。
Jessie 見狀，亦隨師傅視線，將注意力放於我身上。

一時間被4隻眼望住都感覺都真係怪怪地。
「呀！我地今日目的地喺邊？」我問。

「一陣你咪知囉。」師傅回答，隨後師傅電話亦傳來震動的聲音。
師傅簡短地回答電話後，將檯上之前準備好的工具帶上身。

師傳拎起袋，將兩把雨傘搭在搏頭之上，伸了伸懶腰。
「呀！！！！」突然師傅在辦公室中對天大叫。「好，出發！」