唔係掛！原來真係有鬼！－現代捉鬼故事: 第九章 - Showtime - 11

當升降機門打開，行出幾步我地已經見到有好幾架的事停左喺馬路邊。
師傅左望右望，尋找應召黎接我地上路嘅的士。

「呀，嗰度。」師傅指指停於小巴站禁區之前，
一架豎起左「暫停服務」嘅的士。

「嘩，咁唔老黎呀...」Jessie 望到車牌後不禁講左一句。
車牌係DH 624，我諗左幾諗都未明白當中嘅意義。

「點解DH 624係唔老黎？」我不禁跑前幾步，細細聲問行喺我同Jessie 前面嘅師傅。




 「D 咪die，H 咪hard 囉，加埋 die hard 就即係死更囉！可能係咁解掛，
你都係問番佢啦。」我諗左一諗，Diehard 明明係解死忠，又或者比你譯埋做虎膽龍威，
如果要譯做”死硬”，我真係唔知要文盲到咩程度先可以譯得出呢個咁驚人嘅名。

雖然真係百思不得其解，不過呢d咁雞毛算皮嘅事，又點會影響到d乜。
我地一行三人好快就行到的士的旁邊。師傅極速打開的士後門，以一個閃身就坐左入去後座嘅最深處。

「妖你唔係咁老土雅嘛？」Jessie 大罵。或者大家唔知，好多香港人都有個不明文嘅規定，
就係坐的士，邊個坐司機隔離就邊個找數。咁當然，大家會唔會比番錢找數條友就永遠都係後話。





「得啦！一陣我比錢，快手上車啦婆娘。」師傅雙手交叉放於胸前，
將兩把雨傘放於兩臂之間。

「唔想同你呢d賤男人坐呀！阿俊，你坐入去！」Jessie 一手將我推入的士後座之中，
唔知係佢太大力定係我冇心理準備，佢一推我就真係成個人向前衝，如果個頭縮得慢少少都會嘭一聲撞埋的士頂。

「佢唔係男人咩？你又同佢坐？坐前面啦咁巴閉！分車丫笨！」

「人地阿俊冇你咁賤呀！你睇你個死樣呢世都唔駛媾到女啦死毒男！」





「我有冇女都唔關你事啦，況且大家都係咁上下啫Jessie 姐。
我過三幾年到30就叫黃金時期，而你喇喎...等做剩女啦！」

「你．．．！」言語上唔夠師傅黎嘅Jessie 將手上面嘅金屬化妝箱橫手側擊向師傅，
師傅亦唔輸蝕以雙遮反攻。二人你推我撞，似乎早已經忘記佢地兩個之間其實仲有我嘅存在，又或者我地已經上左的士。

當然，呢個時候總會有另一個人出言提醒。

「喂！打還打，話左比我知去邊先慢慢打好唔好？」司機大佬終於開聲，
如果我地出發嘅時間唔係依家呢D中午冇乜人坐車嘅時間，我諗司機大佬一定冇咁好聲氣。

「去邊呀賤人，講啦～」Jessie 見有位入，即時加把咀對師傅再黎一野抽擊。

「你收嗲啦婆娘！」師傅冷眼望一下Jessie，隨即回頭答司機。「寶福紀念館丫唔該。」





司機收到Order 後，亦隨即出發。