唔係掛！原來真係有鬼！－現代捉鬼故事: 第九章 - Showtime - 9

或者我真係好難將阿榮同阿健聯想埋一齊。
不過我知道，將來一定會有更多機會去接觸Jager 呢班人。
其他野都係留番第時先再諗，反正佢地都唔會對我做啲咩。

不得不提，自從當晚放左水晶球之後，
生活的確比之前好好多！生意額個百份比增長我真係計都計唔到！
(可能我讀書少，由0生意額升左上去，我真係唔識計個比率。)
雖然冇隔離檔一日幾十人咁樣，但係我都話過，
其實一日有三幾個客都已經夠食有突。





作為一個好食懶飛，又唔駛供樓租屋嘅年青人，
我又點會咁努力同上進咁每日開檔呢。
而唔開檔嘅日子，我當然有試過帶埋Smoky四圍行街去玩啦。
不過我諗我計錯左一樣野，Smoky 點都係生活左六十幾年嘅”少女”。
我又點可能唔會比佢鬧到飛天先得架。

久而久之，即使我唔開檔，我都會返公司。
始終我嘅正職，唔係一個日日幫啲港女睇呢睇路、教佢點收兵嘅神棍。






「喂阿Cloud！　入入黎。」一個同平日無乜大分別嘅下午，
Office 入面突然傳出老豆嘅呼叫聲。

可能老豆巴聲唔夠中氣，呢個呼喚似乎未能將正在遠征夢鄉嘅師傅召喚番黎。
師傅繼續大字型攤喺自己座位嘅油壓椅之上，鼻鼾繼續呼呼地打。

我見到呢個情況，由自己座位起身，慢慢走師傅的座位。

我想伸手拍拍師傅膊頭，喚醒師傅，
但係手肘唔覺意將師傅檯上其中一隻Figure 弄倒。




 「啪。」

Figure應聲掉落地面，配件就如一個由高空跌落地嘅玻璃樽，
在接觸地面的一剎，向四方爆散。

「oh shit....」我口中不禁細細聲說一句。

Figure 撞擊地面似乎發出一種只有專業人事才能分析得出的獨特聲音，
在聲音傳到師傅耳朵的一刻，師傅雙眼亦同時張開。

師傅望望地上的Figure 殘肢，再目無表情望一望我。

「我.....」我已經心知不妙，
平時不愛打掃，有咩事都只會用幻術頂嘅師傅，
每三兩日都會親手拿起細掃，幫Figure 們逐一掃塵。




今次我咁整爛左佢d 愛人，今次實死冇生喇。

師傅站起身，面上沒有我想像的的兇恨面容。
只是笑笑口的走到我身邊，對我搏頭輕輕拍了兩下。

「唔駛擔心，」師傅道。「呢隻就再版，記住放工去信和訂過隻比我。」
說罷師傅就走到老豆嘅房入面。