唔係掛！原來真係有鬼！－現代捉鬼故事: 第九章 - Showtime - 2

望住帳幕出面一個又一個人行過，
自己就坐定定喺個得自己嘅帳幕，
排在帳幕外一張張嘅膠椅，喺呢一下，我彷彿聽到左佢喺度笑我。

「膠仔！排咁多張喺度！冇人睇你呀！收工啦！」

可能你覺得好無聊，又或者開始懷疑我係咪有精神病。
但係如果換轉係你，坐足一晚，
部ipad 比你玩到由100%電去到機都開唔到，
你又唔好意思坐喺度發吽逗，點都要扮下有野做嘅時候，




我諗唔好話幻想堆膠櫈講野，分分鐘你有機會見到堆膠櫈喺度跳舞。

「踫！」

膠櫈突然好似被人大力踢到。
本來排得整整齊齊嘅膠櫈都因為呢一下外力變得東歪西倒。
不過自己開檔時又貪心，將櫈排到鬼死咁遠，
坐喺帳幕入面嘅我根本見唔到出面發生咩事。

我放低部一早冇電嘅ipad嘅ipad，




一步一步由黑暗嘅帳幕最入處行出帳幕望過究竟。

正當我差唔多行到出去之際，一個男人迎面衝入我嘅帳幕，
一手拉住我將我扯番入帳幕之中。
見到眼前呢個趕過去投胎嘅男人，我本身都想一腳伸佢走。
但係一諗起今日未發市，算啦，照幫佢卜啦。

「喂先生你唔駛咁急，你比得錢我一定幫你....」

「o殊！」男人以食指放於咀前，示意我立即收聲。




之後他以極快速嘅身影躲藏入我帳篷內，鋪左黑色長檯布嘅摺檯檯底。

幾十秒之後，街尾出現左幾個身穿黑色西裝嘅男人。
佢地分頭行事，逐個逐個占卜攤檔搵。
而佢地要搵嘅人，我都心知肚明，應該係依家閃左入去我檯底嘅男人。