唔係掛！原來真係有鬼！－現代捉鬼故事: 第九章 - Showtime - 1

唔知大家記唔記得，我好早好早嘅時間都提過，
當冇case 接嘅時候，我地就會有另外一份 『工作』。
我唔知係唔係連捉鬼都有淡旺季之分，
可能臨近復活節，D鬼都復曬活，得番我地戇居居，
獨自一個人留守喺一個以前只係比 『迷信』男女黎朝聖嘅領地－榕樹頭。

可能 『榕樹頭』呢個地方名你連聽都冇聽過。

但如果我同你講，廟街公廁出面果堆帳篷你可能有少少眉目，開始知我講邊。





冇錯， 『榕樹頭』正正係香港最多占卜師集結嘅地方。
呢條街之所以被稱為聖地，一來係因為人流夠旺；
基本上如果要搵人占卜，除非你有相熟占卜師，
如果唔係你一定會去呢度。

『榕樹頭』其實只係一條對正公廁嘅單線行車路，
路兩旁開滿曬細個嘉年華先會見到嘅彩色帳幕。
一張檯、幾張櫈加多盞燈基本上就可以開工。

當然都有部份有心機嘅同行會佈置下個帳幕。




Print 到d 塔羅牌大大張，驚死人唔知佢識塔羅果ｄ。

每逢太陽伯伯收工之時，就係一眾同行開工嘅時間。

有部份比較有名氣嘅，未開工之前已經有一大班”信眾”喺該占卜師嘅”領地”外守候。
有次我行過去偷睇下佢地嘅價錢，一條問題就百二，詳細問就二百。
咁當然仲有其他放血plan 比你慢慢揀。

我見坐得底嘅，點都問番三幾條一定走唔甩。





咁你當我小人，我就同大家計計佢大約有幾多收入。
我當佢一問做10個客，每個就三百六，
一晚都已經三千六，做一個禮拜都夠我飛一轉日本，你都咪話唔肥仔。

咁當然啦，唔係每一檔都咁旺，有部份同行分分鐘真係坐一晚都係拍曬烏蠅。

我緊係唔會拍烏蠅啦！

四月左右有幾可有烏蠅先得架？
所以我都係拎部ipad 篤下睇下動畫，


寄望上天醒兩個有緣人過我，等我今晚唔駛食白果。