唔係掛！原來真係有鬼！－現代捉鬼故事: 第九章 - Showtime - 3

「班人好似搵你喎...」 我望住出面班黑衣人一個一個鋪口移近我，
我都想喺呢個咁短嘅時間內盡力了解下到底咩事，
最少比自己決定幫唔幫眼前呢個男人。

「唔駛理架喇，你當無見過我入黎得架喇，我唔會比到麻煩你。」
男人喺檯底，用一把細到我差少少聽唔到嘅聲浪同我講。

「Well....ok....」我冇望住呢個來歷不明嘅男人講，
因為出面班行衣人已經差唔多去到我呢邊，
加上其中一個同我已經有視線接觸，做戲做全套，我自己都唔想有咩麻煩。





西裝佬一共有四個，每一個身型都唔矮。
而且遠睇都見佢地可以撐爆成件西裝，唔知以為佢地係做健身教練。
四個人分頭一人一檔咁搵，好快就到我嘅檔口。

「西裝哥哥，想占卜呀？坐丫！」我一面講，面上掛住一副金鋪Sales 見到大陸有錢佬嘅面口，
招呼眼前呢位大隻佬。
近睇之下，大隻佬皮膚粗糙，睇黎都三十幾四十歲，
加上一頭金毛，面上嘅鬍渣包圍整個下巴，
同身穿嘅西裝顯得格格不入。





西裝佬將手上嘅一張巢曬嘅A4紙拎到我面上幾CM 嘅距離，
A4紙上面分別有幾張同一個男人相片嘅影印本，
雖然影印令相片清晰度大大減低，
而不同相片中，男人亦有不同造型，
但係都不難認出，呢幾張圖入面嘅就係我個"檯底裡的男人"。

「有冇見過呢條友呀？」西裝友一開口，
口中煙味立即向我衝埋黎，有Ｄ人可能話呢種先係男人食嘅煙味，
但對唔食煙嘅我黎講，呢種味只係臭到想嘔。





我用手掩住口鼻，一方面想阻隔西裝佬嘅難聞煙味，
另一方面係為左減少西裝佬見到我嘅面容同表情。

我決定幫幫檯底呢個男人。
雖然唔知頭唔知路，但係相比起眼前呢個似古蠱佬嘅中年大叔，
我都係覺得檯底個男人個樣正氣Ｄ。

「冇見過喎，張相咁幪邊睇到啫。」我回答。

「咁幪咁你又咁肯定冇見過？」西裝佬一手推開我，
一步一步行向我帳幕入面唯一可以匿埋嘅位置 - 檯底。