唔係掛！原來真係有鬼！－現代捉鬼故事: 第八章 - 石澳之旅 -18（續）

我沿路行番去沙灘部大家燒野食嘅士多，
路途只係幾分鐘，但係我自己嘅感覺就好似行左好耐咁。
我諗起阿健面上嘅　”陰陽色皮膚”。
細心一諗，佢面上面呢撻皮膚嘅形狀呈圓形，
如果要我諗點可以做成一撻咁嘅傷痕，以我嘅認知入面，
頂多只有”咬”。
我唔敢想像阿健有一段點樣嘅往事，
因為我怕我愈去聯想，就愈會影響我對Smoky 嘅感覺。

始終阿健有一點講得正確，即使我點去諗，都諗唔到反駁嘅元素：




每一隻鬼留喺人間都一定有佢嘅目的。
而Smoky 留喺度，而且又主動接近我。到底佢想點？
而佢留喺人間嘅目的又係乜？
我知道，呢個問題我冇得呃自己，
總有一日我都要查清楚，但係我自己都知道，當我知道一切來龍去脈之時，
亦有可能係我同Smoky 之間關係嘅終點。
 當我返到沙灘時，大家都已經收拾好細軟。
士多亦已關掉除左我地個爐以外範圍嘅燈。

「去左邊呀～咁耐嘅？」Smoky 問。





「無呀，見出面幾好風，出去吹下咋嘛。」

「下...你唔怕見到頭先個男人咩？」Smoky 一面問，
面上表露出擔心嘅神情。

我知道Smoky 擔心嘅係我，但當我諗起阿健嘅說話，
突然間，我承認有一剎，我係懷疑Smoky 擔心嘅到底係我定係佢自己？
不過望住眼前呢個人，如果佢要害我，佢一早就有機會落手。





點解我會為左一個外人懷疑自己女朋友，諗起都真係有Ｄ白痴。

「冇呀！唔見佢～可能佢走左喇～」我回答Smoky。

「咁就好喇，我怕佢唔知會對你做ｄ乜...」

「放心喎！」

我將頭哄埋Smoky耳邊，「我菊花仲好完整。」

Smoky 一聽，面額立即轉紅。

「你個變態佬！」
Smoky 拎起我個袋，對住我好似14巴港女咁追打。
我捉住Smoky 嘅右手。





「做咩呀變態佬！」

「冇呀，想望清楚下你囉。」

「我塊面污穢左咩？」Smoky 問。

我擰擰頭，對Smoky 笑笑。

「能夠見番你，真係好。」

「講乜呀你傻佬！」

我冇回答Smoky，只係輕輕拖住佢。或者我唔應該諗咁多，
對我地兩個而言，珍惜每一日，




好好生活落去就已經好夠。