唔係掛！原來真係有鬼！－現代捉鬼故事: 第八章 - 石澳之旅 -17

「我都唔知你講乜...」被發現偷竊的小賊，
多半都是以這句作開場白。當然，我也不例外。

「咪玩啦，你一早已經喺度陪我地等巴士啦！」原來Jager 於早早之前已經發現我嘅存在。

「我....我真係唔知你講乜喎！」

「我特登就番個角度比你架，ok嘛？」”Jager” 呢一下就好似一個導演，
興致勃勃咁為客人介紹自己嘅拍攝手法，過程中沒有流露半點敵意。





「um....ok丫...」我支吾以對。

「不過下次唔好咁睇喇，有時我地都控制唔到場面，你咁樣好危險。」

面對”Jager ”一時的態度轉變，我摸唔透呢個人。
一時，好似發左癲嘅狂魔一樣，追殺鬼魂；
一時又笑笑口，個樣仲誠懇過街邊叫你做問卷嘅保險佬。


「你唔駛咁驚，你標曬冷汗咁，驚我會好似頭先隻野咁打你呀？」





我冇回答Jager 嘅問題，因為喺Jager呢副笑面之前，
我之前嘅打量突然變得好小人。

「哈哈哈～有時個樣惡，嚇親人，呢樣野我都知，
不過我對你冇惡意架。」

「．．．．．．」

「我叫阿健，未請教。」”Jager “伸出右手，




想以一個友善嘅握手去解除我心入面嘅恐懼。

「我叫阿俊...」我伸手對阿健輕輕一握。

「其實你可以見到 『果d野』，你初初唔驚既咩？」阿健問。
「少少啦...」

「咁又係，你連你個女朋友仔都係．．．哈哈哈，你真係好大膽。」

「哈哈．．．」我虛偽地笑左幾聲。

「好，入正題，你頭先見到我做嘅野啦，
你有冇興趣跟我做野？」

「下？」突如其來嘅邀請真係嚇左我一跳，不過我都唔知點開口同佢講我已經做緊同你差唔多嘅事。 





「一定好pay過你依家。」阿健使出金錢引誘，不過已經太遲喇，已經有個MK比你早一步。 

「唔.....唔好喇.....呢D打打殺殺野唔太適合我....」 

「係呀，咁真係好可惜。因為我見你都好有資質。」阿健聽到我嘅拒絕之後，難免有少少失望之情。 

「拿。」阿健拎出一張卡片。
我雙手接過，上面簡單地寫左阿健個名，電話。
原來”Jager”唔係 阿健嘅英文名，而係佢嘅公司名。 

「如果你他朝回心轉意，又或者比老細炒左冇工開，隨時打比我丫。」

阿健轉身慢慢離開，背向我做左個 『再見』嘅手勢後雙手再次插番入袋。
或者原來所有捉鬼嘅人都應該係一個mk。 






「喂！我有一個問題呀！」我大聲對阿健叫。 

「嗯？」

「其實...唔係應該有d咩方法可以捉左隻鬼嘅咩？點解你頭先要殺左佢？」 

「你又知我殺左佢？」阿健聽到我呢個問題，不禁起疑。

 大鑊，唔覺意露左口風。
不過以我嘅才志，要作少少野出黎圓慌當然冇難度。 

「細個屋企都有呢ｄ野，之後屋企人請左ｄ師傅黎捉左佢。
我印象中，同頭先你嘅做法好似有ｄ分別...」





 「........」阿健低頭，好似若有所思，過左一陣，佢終於開聲。 

「有d說話，我都唔想同你講。特別係你女朋友都唔係 『人』。
不過真心同你講，鬼，唔會有好架。所有鬼留喺陽間，都一定有目的。我相信你個"女朋友"亦唔例外。」

 「我覺得佢唔會囉！」聽到阿健嘅指責，衝動勝過左我嘅理志，
保護女朋友嘅說話亦第一時間由我個口入面講出黎。 

阿健聽到，冇同我爭論。只係指一指面上唔同色嘅皮膚。 

「我以前都同你一樣。不過呢一撻，係我嘅教訓。
我都好希望，你唔會同我行埋一樣嘅路。」

阿健講完呢句，轉身就走。 我一時間諗唔到任何說話再反應，最後只係目送阿健嘅身影慢慢消失喺黑暗嘅街道之中。