唔係掛！原來真係有鬼！－現代捉鬼故事: 第八章 - 石澳之旅 -2

唔知係唔係今個星期六嘅陽光特別勁，
定一係我已經太耐冇同陽光接觸，連被太陽照射到嘅感覺都開始慢慢忘記。
我諗熱嘅絕對唔止我，就連石澳嘅石屎地都好似鐵板燒嘅鐵板一樣，
即使隔住對厚厚嘅拖鞋，依然清楚感受到地面被陽光照鬼後殘餘嘅熱力。

由離開小巴冷氣開始唔夠5秒鐘，
我額頭已經慢慢開始冒出汗珠。
即使我已經又拖鞋，又背心，就連我條十幾年冇著過嘅波褲都拎埋出黎著，
呢一身咁輕便嘅裝扮似乎對我身體嘅散熱情況冇乜大幫助。



雖然頭先喺坐小巴嘅時候已經見到沿路都有唔少燒烤爐，
我諗要搵到一個又要近沙灘，又要冇人嘅爐應該都唔係想像中咁難。冇錯，因為最好嘅位置都一早比當地嘅「士多」私有化左。
只要你肯付出少少錢，一個又乾淨、又涼爽、又有野遮下太陽、
仲可以幫埋你「透爐」，最重要係只要你一轉身，就已經係沙灘，我或者應該話，其實我地已經一早喺沙灘上面。

我當Smoky 就搵左個最近沙灘嘅爐，放低左帶黎嘅袋。
我自己一個行左去士多嘅收銀位置，
放低左五舊水按金比士多老細之後，老細就口多多咁話保證無論我地做乜都唔會阻住我。
好在Smoky 唔喺旁邊，如果唔係我都唔知點解話。



我同Smoky 坐喺呢個由士多伸延出黎嘅巨型帳篷下，
靜靜咁睇住沙灘上嘅人生百態。
有時我會諗，香港人嘅消遣地方其實係唔係只係得番沙灘？
因為自由行落親黎都係買呢買路，買金買奶粉。
我又未聽過有自由行話要落黎游水曬太陽。

Smoky 雙手托腮，好似有乜諗緊咁，又可能係佢太悶，只係喺度發緊吽豆。
「不如我地出去行下囉。」

「下...沙灘都冇咩好行o者...」


Smoky 雙眼避開我眼神，一邊輕輕抓抓自己面額。

根據男人心一字馬套「讀心神探」所講，
人講大話血液會加速運行，好易周身痕。
睇黎Smoky 都仲未係好習慣現身香口膠為佢帶黎皮膚嘅感覺。

「陪我行下啦，我見電視劇D女主角話要浪漫嘅話就點都要行下沙灘架！」

「但係D袋...」

「放心啦！！！！！！！」
突然我地身後有一把相當雄厚嘅聲音大叫。
我轉身一睇，原來係士多老細。

「你拎起ｄ貴重野，重野我幫你睇住啦！」



我望望士多老細，半信半疑。

「咁邊好意思呀老細...」
我回答呢個咁熱心嘅老細，
同時打量一下佢到底講真話定假話。

「顧客服務呢家野依家點都要學下架喇，劉德華個廣告話架嘛: 剩係咁？未夠架！」
老細講呢句說話嘅時候，直頭好似劉特首上身咁，
我諗你睇到呢度，你都可能會講一句：嘩，段文有聲嘅？！

「咁麻煩你喇。」
我同Smoky 拎起銀包同電話，其他野就放番喺袋。
老老實實丫，我地個袋本身，就算連埋入面ｄ野都仙都唔仙下，
要偷咪由老細偷囉。



我望望Smoky，佢個樣好似放低左心頭大石咁。
「咁，你行得未？」
我企起身，伸出右手掌心向上放到somky 面前。
Smoky 輕輕一笑，將左手搭上我手上。
「我呢，未試過同男仔行沙灘架...」Smoky 一面講，面慢慢變得通紅。

「其實我都未，我都未試過同男仔行沙灘。」
Smoky 聽到之後，用右手作狀對我打左一下。
不過比我激一激之後，面紅好快都散左。 
我成日覺得，有時要打破尷尬氣氛，一個半個爛gag 真係少不了，
我唔知係唔係次次都work，但係最起碼，我今次work 丫。