唔係掛！原來真係有鬼！－現代捉鬼故事: 第八章 - 石澳之旅 -3

穿著拖鞋，在熱沙上行走，
呢種感覺對上一次係幾時呢？
或者都有六、七年前，當時中四定中五班會旅行。

自從離開左學校之後，唔好話去沙灘，
就連人多嘅戶外活動我都唔想去。

我諗好多人都同我一樣，如果唔係同女朋友一齊的話，
星期六、日都只係想留喺一個冷氣地方，
對住電腦、睇下動漫、打個丁咁又一Day。





「諗緊乜呀你，快d行啦！」突然一隻手將我由小毒撚點憶入面拉番出黎。
拉我出黎嘅當然係眼前嘅Smoky啦，你唔係以為去沙灘就真係咁多艷遇掛？

Smoky 拉住我，由士多一直跑。
佢拉實我，好似前世未去過沙灘咁，一路跑，步伐濺起細沙，
我地沿途兩邊曬緊太陽嘅泳客都對我地報以一個唔係太歡迎嘅目光。
我敢講，只要我地跑慢一步，我都分分鐘多幾個老豆。

「不好意思！！！」我靈機一觸，




大聲向怒視我倆嘅眾人以唔咸唔淡嘅普通話道歉。
你都知啦，依家喺香港，只要你講普通話就基本上等於你大曬，
講普通話嘅話就連地鐵都可以即時變為你嘅私人屎坑。

「喂喂，唔好再跑喇。一陣ｄ沙又飛左落人地度，到時真係比人鬧架喇。」
我拉住Smoky，細細聲咁講，一陣比人發現我原來係假自由行就大鑊。

「哈哈～我好耐冇試過咁跑喇！」
Smoky 將自己嘅腳址插入沙灘上面溫熱嘅細沙之中，
感覺由陽光為大自然帶來嘅溫暖。





我唔知Smoky過去幾十年係點過，但係我覺得，
自從佢由食現形煙改左食香口膠之後，好似對身邊所有事物都慢慢變得更有興趣。
又或者係香口膠令佢感受番過去幾十年都無感受過嘅感覺。


「沙！」突然我雙眼感到好似比幾十支針吉住咁。
我下意識用手一捽，發現無數細小沙粒痴住我塊面。

「哈哈哈！」由Smoky嘅笑聲都知，
佢將頭先插入沙入面嘅腳，一腳將一堆細沙踢起，
我對眼當然被佢突如其來嘅偷襲搞到"暫時失明"啦。

「你個婆娘！」





「哈哈～追我丫傻佬！」Smoky 嘅聲音漸漸變遠。

「你咪走呀！」我合起雙眼，跟住聲音來源跑過去。


「踫！」我唔知撞左落ｄ咩度，成個人被反作用力彈番轉頭，
成個人被撞到跌左落地。
但係感覺上話比我知，佢應該係個人，仲係個大隻佬。

我慢慢打開雙眼，淚水亦慢慢將之前被濺入眼的細沙沖出。
一個形象同沙灘完全唔夾嘅男人企喺我面前。
男人睇落三十歲多ｄ，左邊面有一撻特別白嘅皮，
由眼角伸展到下巴。可能你話，咁咪好似怪醫秦博士？
不過當你望到呢個男人嘅時候，我諗你同我一樣唔會再有心情講笑。
喺佢面前，我四肢突然感到一酸，彷彿連要支撐自己起身都成問題。





男人喺三十幾度嘅天氣下，都仲可以著住一件黑眼長褸，
下半身著住一條緊身"現化"牛仔褲，你最估唔到嘅係，
沙灘之上，佢仲夠膽死著住對dr.martens。

我望住眼前呢個怪人，但係佢似乎完全無視我，
只係繼續左望右望，好似搵緊人咁。

「Sorry 呀...」我對眼前呢一個少有能為我帶來不安嘅男人道歉。

「.....嗯。」男人對我點一點頭，之後慢步離去，
繼續搜索佢嘅目標。

我望住男人離開嘅方向，唔知點解，我覺得佢為我帶黎不安感之餘，
同時，我有一種似曾相識嘅感覺。





「いつからかこの胸で揺れてる光 手放したくはない
遠回りしても 躓いてもここに
ずっと ずっと 光ってる…」

電話鈴聲將我由思考模式入面帶番黎現實。

「喂～佢地到曬喇！你快ｄ返黎士多啦！」Smoky 似乎已經同佢地會合左，
我亦企起身，拍拍身上嘅細沙，極速跑番士多。