唔係掛！原來真係有鬼！－現代捉鬼故事: 第七章 －年年有今日－ 13

「車黎喇。」 始終要走嘅始終要走。

「咁...我走喇。」Smoky 先開口道別,
但從語氣上不難聽到一種依依不捨之感。

「嗯，過幾日見啦～」我揮揮手，
第一次感受同女朋友分開嘅感覺，
不過「小別勝新婚」，咁樣反而令我更期待下一次嘅見面。

「喂～」Smoky 臨上車回頭叫我。





「嗯？」

「占卜班班同學仔叫我地星期六去沙灘呀～你去唔去？」
原來Smoky 同班八婆仲有聯絡。
其實自從達德之後，我都再無見過佢地。
不過更不願意都好，只要有Smoky 喺度，我都唔介意去。
可能呢個係就大家成日話，拍拖蜜月期男人唔用腦嘅情況。

「好呀！」





「呢個...係唔係我地第一次約會？」
Smoky 塊臉突然好似一個蘋果咁紅，
唔好同我講紅蘋果定青蘋果，我第一次發現，
原來女仔面紅係咁可愛。

「緊係唔係啦！約會要兩個人先算架嘛！」
我以一個相當肯定嘅語氣回答。

「係嘅咩？」





「緊係啦！上車喇，車長望住喇！」
我眼尾已經見巴士司機坐喺駕駛座度，以一副「你阻住我收工呀」嘅咀臉，
緊緊盯住我同Somky。

「傻佬～」

「一陣打比我啦！」

「嗯～」

我企喺巴士站，對住車上嘅Smoky 揮手，直到巴士走左，
我都仲呆呆地對巴士走嘅方向揮。

突然，只得我一個嘅巴士站傳黎一首歌。




悲哀嘅旋律,夾離住一把唱住日文嘅女聲。
呢首歌我聽過，我記得係刀劍神域首片尾曲 － ユメセカイ。
我褲袋同時傳黎一陣一陣嘅震動，
睇黎有人將我電話鈴聲由我首炒麵歌改左做呢首毒野。

我拎出我嘅電話，電話來電名稱叫做"女主人"。
我一時間除左笑出聲之外我真係冇其他反應。

「點呀女主人？」

「哈哈哈～鍾唔鍾意首歌呀？」

「你都改左啦，邊有得我唔鍾意呢。」

「好過你首chao chao chao chao  min 啦！」





「不過點解要係呢首歌呢？個Melody 咁慘。」

「首歌講追逐夢想架！你識鬼咩～你唔好轉左佢添呀！
呢首歌，由今日開始就係我地嘅歌。」
Smoky 喺電話另一邊突然好惡咁話。

「咁毒！」

Smoky 當然冇理到我嘅投訴同抗議，
成個電話就不停發表自己嘅偉論。
可能係因為大家太耐冇見，電話入面，佢終於變番我熟悉嘅Smoky。
不過，一面聽住佢對刀劍神域獨到嘅見解，
呢一刻，我有少少想成為佢心入面嘅桐人。
為左我嘅阿絲娜。