唔係掛！原來真係有鬼！－現代捉鬼故事: 第七章 －年年有今日－ 12

我同Smoky 企喺由荃灣出旺角嘅巴士站， 
雖然天氣只有十零度，而我地又只係著住單薄嘅外套， 
但係呢一刻，外邊天氣、環境所有所有都已經好似唔再關我地事， 
我地只係想兩個好好共度呢一個只係屬於我地兩個人嘅時刻。 

我地都冇去諗未來嘅事， 
但係我地兩個可以相遇、認識、同重逢， 
已經夠不可思義。 

「你有車喇。」望住即將埋站嘅巴士， 




我對Smoky 講。 

「其實都唔急，可以再等多班既...」Smoky 輕輕聲講。 

「咁...一係等多一陣丫。」 

「嗯～」 
排喺我地後面嘅乘客一個個咁上車， 
原來不經不覺都有一大班乘客企左喺我地後面。 





望住巴士慢慢離站，唔知點解， 
Smoky肯同我企多一陣，心入面有種講唔出嘅感覺。 
一種由心入面令你想微笑嘅感覺。 

「喂！我有野問你！」我終於記得有一件事想問Smoky， 
而我又成晚都唔記得。

「嗯～有咩問我呀？」Smoky一面不解。

「你之前去左邊囉！whatsapp 你個最後上線日期又hold 住左，




我一路都搵你唔到，以為你知道我要做呢行，特登避開我...」
我一面講，一面感覺到喉嚨有少少扯住扯住，
多數有呢種感覺，下一秒都好易會喊。

「我咪去左法國食幾個鐘一餐同睇博物館囉！我每到一個地方都有寄明信片比你架！」
Smoky 愈講愈激動，睇黎佢應該都真係去左好多地方，
同真係寄左好多張。

「無喎真係，一張都冇收過。」

「下！會唔會係咁呀！我張張都揀左好耐架！」Smoky 聽到我一張都冇收過之後,
神情相當失落。

我見到Smoky扁曬咀咁既樣，會心一笑，因為我覺得有一個咁特別嘅女朋友，
可能真係我幾生修黎嘅福氣。





「傻婆。」我將Smoky 緊緊抱入懷中。
用手輕輕撫摸佢嘅頭髮以示安慰。

「你返左黎就夠喇，其他野唔再重要。」

「但係D名信片真係好靚架！」聽Smoky把聲，
講野已經轉為哭腔，差D以為王杰上左佢身。
我諗我再唔轉下話題，佢好快就真係喊得出。

「好啦好啦，第時我請你再去一次啦。」為左安慰佢,
死就死啦，我諗鬼應該唔駛買機醺票...掛。

「你話架！一言為定！」
Smoky 伸出手指尾。





「一言為定。」

我將自己嘅手指尾緊緊勾住Smoky，實行我同佢之間要一齊去玩一世嘅承諾。