唔係掛！原來真係有鬼！－現代捉鬼故事: 第七章 －年年有今日－ 11

廿幾年黎我都係坐喺呢個屋苑。
每一日都會行同一條路，經過一個人工花園，之後就會去到巴士站。
對我黎講，呢條路每日如事，除左追巴士嘅時候覺得佢特別長之外，我真係對佢冇乜特別嘅情感。
對條路有感情，可能你覺得我講野白痴。
不過如果你同我一樣，係第一次拍拖，你絕對明白我呢家依一刻嘅心情。
路上面花花草草，平時你望都唔會多望一眼，甚至乎你會心入面問過，
點解要比錢去整呢ｄ冇人睇嘅園藝景物。

但係同你女朋友行，兩個人剛剛開始拍拖，
突然間，你會覺得成個世界都順眼曬。




如果依家比我見到條MK仔蝦緊個小毒撚，
可能我都只會認為個MK係想同小毒撚做朋友；
巴士嘅廢氣可能都有清新花香味。

算啦，可能我講遠左。
不過有一個感覺係真嘅，我第一次，希望呢條去公園嘅路唔好太快完。

我地兩個人落樓之後，冇再講野。
可能係尷尬，亦可能因為，有時兩個人相處，唔一定要好多野講。
我地兩個人並排而行，相隔個多身位。




我慢慢愈行愈埋。當然，愈行得埋，兩個人嘅手難免會有碰撞。

每撞到一下，我個心就離一離。
當我愈行得埋，心就跳得愈快。

之前上網睇高登仔話點媾女，
成日都有巴打話： 『埋去錫佢一啖就搞掂啦！表咩白丫！』
錫？我依家連拖佢都唔敢呀！我地兩個嘅手愈撞次數愈密，
開頭Smoky 都有縮開嘅意思，
但係久而久之，佢亦對撞到大家無太抗拒。





心跳慢慢加快，如果我身邊有醫生喺度，
佢一定會覺得我有心臟病。
因為個心已經跳到連自己都清楚聽到自己嘅心跳聲。

「卜卜．卜卜。」
呢個時候唔知應唔應該多謝師傅，如果唔係佢幫我做左一排體能訓練，
我個心可能已經一早爆左。

既然Smoky 唔再縮手，我決定做一樣好老土嘅事。

「喂，」
「嗯？咩事呀？」Smoky 終於由落樓到依家第一次望住我。
我地四目交投，突然Smoky 好似發現左d咩咁突然望番落地下。





「做乜突然唔望我嘅？我好肉酸？」

「唔係啦～只係我覺得好似好怪咁。」

「點怪？」

「頭先條路你一直撞到我隻手，平時同你出街都唔會嘅！」Smoky道。

之前緊會唔會啦，以前我地行到離行離捺。

「咁你有冇方法可以唔撞到？」我追問。

「下？」Smoky 呆呆咁望住我，完全唔明我想做乜。
我行到Smoky面前，一手拖住佢。





「例如咁，拖住咪唔會再撞到手囉。」呢句對白真係好老土。
不過我真係冇其他招，再者，呢一下我已經用曬成身嘅勇氣。
可能你話，頭先咪喺屋企拖左囉，點解依家又變番懦夫？
大佬呀！唔同架！你喺屋企，兩個人；喺街上面，成村人望住你架！

「你呢招好老土呀。」Smoky 望住我講。

「但係你塊面好紅喎。」

「傻佬！」Smoky 冇理我嘅取笑，
只係拖住我向前走。