唔係掛！原來真係有鬼！－現代捉鬼故事: 第七章 －年年有今日－ 10

「時侯都唔早喇，我諗我要走喇。」Smoky 收拾完我地食完蛋糕嘅餐具... 
同埋堆積左喺洗手盆，我都唔知放左幾耐嘅餐具後， 
準備向我道別。 

老老實實，自從老媽子走左之後， 
我真係好耐都冇見過廚房係咁整齊。 
突然間，我覺得有一句說話真係講得好好： 
「一頭家，點都要有個女人。」 
呢個女人喺屋企除左擔任清潔、管家、打雜、保姆呢堆角色之外， 
最重要，係可以將一家人連繫番埋一齊。 





呢一刻，我覺得Smoky 真係做到呢樣野。 

我望一望個鐘，原來只係十點半，就連電視套連續劇都未出家幕。 

「下，仲好早咋喎，唔坐多陣？」攤喺梳化嘅老豆比我更早講左我想講嘅對白。 
十點半對一個時下年青人黎講，可能只係當晚嘅開始； 
要唱k、出去飲野、去玩等等，不過對60年前嘅女仔黎講， 
10點半可能一早應該已經沖好涼，訓左覺。 





「老豆，我送佢去搭車呀。」輕輕交帶後， 
我穿上放左好耐都冇乜點著過既拖鞋準備落街送行。 

「下？你地要坐車嘅咩？」老豆聽到Smoky嘅一言， 
成個人嚇左一跳。 

「我應承左阿俊，用『另一個方式』生活...」Smoky 愈講愈細聲， 
目光亦由老豆面上慢慢低頭，變到望住地下。 

「哈哈哈哈！無你兩個收！你多D上黎啦！ 




我地屋企好鬼污糟架！你個男朋友成鬼日用完D紙巾又包住放喺檯面！ 
我都唔知佢...」 

我一聽到呢度，飛身用手掩住老豆把口， 
同時另一邊攬住老豆，以免佢愈講愈錯。 
有時有D野，剛剛開始拍拖其實可以唔駛話比女朋友知， 
特別係某部份「私生活」。 

「得架喇，如煙會成日上黎架喇！」 

「下？抹完鼻涕D紙巾要即刻掉先得架！好多菌架！」 
好在Smoky 思想仲停留喺60年前，如果唔係我今次就死得。 

「知道！我以後用完即沖落廁所！」 





「唔！唔唔唔！」老豆雖然被我掩住左個口， 
但係佢嘅眼神充分表達到佢對我說話嘅懷疑。 
不過算啦，呢個唔係重點，起碼依家唔係。 

「我送如煙走喇！Byebye老豆！」 

「Byebye 叔....」Smoky 未講完我已經閂左門。 
再講落去我真係唔敢想像老豆會再講d乜。