唔係掛！原來真係有鬼！－現代捉鬼故事: 第七章 －年年有今日－ 9

我望住老媽子張相，
再望一望Smoky，希望今鋪老豆真係放過佢。
始終今次係我初戀，我亦明白咁樣老豆都幾為難，
但係有時鍾意一個人就係咁，你明知全世界都會反對；
甚至一開始，就會成為全世界道德狂人嘅狙擊目標，
但係一個人一生，總有一個人值得你咁做。

只不過，值得我咁做嘅，唔係人，而係鬼。

「老媽子，今鋪你真係要撐我呀。」我一面鞠躬，一面心中默念。




期待老媽子在天之靈，可以幫我說服佢個又硬頸，脾氣又古怪嘅老公。
上香後，Smoky 一直低頭，唔敢直望老豆銳利的眼光。

「唉！」突然老豆大聲一喝。
「後生仔嘅野，我唔理咁多喇！」

Smoky 一聽之下，面露喜色，
雙手緊握住我嘅手。
我地同時放下心頭大石，望住老豆，
期待佢對我同Smoky 二人嘅正式準許。





「都好嘅...同鬼拍拖...冇咁易搞出人命。」老豆細細聲講。

「下...搞出人命？我唔會害佢架Uncle！信我啦！」
聽到Smoky 呢句，我開始相信佢真係60年前嘅人，
連佢對拍拖嘅概念亦如是。

「老豆...得架喇...明架喇...」我上前，由老豆身後雙手搭住佢搏頭。
一面推，一面將老豆引導返佢間房。
一來唔想老豆再亂講野，二來，




我都想好好享受一下呢一個咁驚喜嘅生日。

「咪住！」老豆突然大叫。

「又點呀老細！」

「你唔係諗住瞞得過我嘛？」

「瞞？又瞞你ｄ咩呀老細！」

「蛋糕！」

「下？」

「食蛋糕唔預我？」





聽到老豆嘅呢句，Smoky 真真正正放低左佢嘅戒心。
估唔到第一晚拍拖就見家長，
仲要一次過見曬老豆同老媽子。
雖然我都聽過帶女朋友見家長係一件會令人心驚膽顫嘅事，
但係我諗今次又同我想像中嘅有少少出入咁囉。

不過點都好，睇住老豆一路食Smoky 整嘅蛋糕，
一路細說老媽子當年同佢拍拖嘅地獄料理，
我諗老豆都對呢個「家嫂」滿意。

(由於技術上問題，之前post漏左第六回,
煩請讀者巴打們用少少時間翻睇第5~第9話,感謝)