唔係掛！原來真係有鬼！－現代捉鬼故事: 第七章 －年年有今日－ 8

「因為佢係我女朋友。」

「但係佢唔屬於呢度。」

「由我決定將佢當成伴侶嘅一刻，我就有責任要保護佢！」
 老老實實，呢種咁老土嘅說話，點會係我自己諗出黎丫。
呢句說話係我好細個嘅時候老媽子教我，
唔知係唔係每對父母都會教自己嘅仔，
男仔要食多d野，做多d運動，第時大個保護自己老婆。
我一直都以為自己只會同伍姑娘終老，所以由細到大都唔係點做運動。




到依家比師傅訓練完，有番咁上下體能，
我先發現原來喺某種力量面前，就算你有張家輝咁大隻都冇用。

「唉。」老豆對Smoky 額頭輕輕一點，
Smoky 即時成個人聚落我背部。我下意識將佢扶一扶， 之後將佢安置喺梳化上面。
老豆將手上嘅黃色符紙放喺檯面，
呢個時候我亦見到符紙另一面，原來符紙兩面都係空白，
即係話，老豆頭先好有可能只係試下我。

老豆行到客廳入面老媽子嘅神主牌面前。




喺櫃邊抽出九支清香，隨而用神主檯上嘅火機將香點著。

「你兩個過黎。」老豆隨即將香分發比我同Smoky。
老豆對老媽子嘅遺照輕輕鞠躬。

「你睇下你個仔，大個仔喇，學人拍拖喇！不過佢女朋友就係你d同鄉，
睇黎今次我地家族都好大機會絕後喇！」老豆上完香，轉頭以古怪嘅眼光望住Smoky。

Smoky 亦發現老豆嘅眼光帶住一點不善，亦緊緊拖住我隻手，
同時低頭回避老豆嘅目光。