唔係掛！原來真係有鬼！－現代捉鬼故事: 第七章 －年年有今日－ 7

屋企內突然靜得連昆蟲拍翼的聲音都可以清楚聽見，老豆同我既對話亦令氣氛變得更加緊張。 
我無逃避老豆既目光，因為我唔知道， 
我將視野一離開老豆，之後會發生乜事。 

由細到大我同老豆都好少交流， 
更唔會話有意見分歧，甚至係搞到好似依家咁， 
氣氛咁僵。 

不過我知道今次同以往既事都唔同， 
今次我點都要企硬，因為態度一改， 




我最多都係比老豆星幾巴，但係Smoky 隨時係咁先。 

我同Smoky 嘅故事早兩頁先正式開始， 
我同Smoky 嘅路仲有好長，絕對唔會喺呢度，呢一刻就咁完。 
再者，我地仲有好多個第一次要試，好多野要一齊去做。 

初戀對好多人黎講都係一生人入面最重要嘅其中一段回憶。 
而我，決唔會令呢段時光咁快完。 

「你真係唔行開？」老豆面露笑容，以更平淡嘅語氣問。 





「唔行！死都唔行！」

「好呀，你自己話架咋。」老豆見我唔走開，補充說。

「話左唔走就...」

「定身！」說時遲，那時快。
我都仲未講完我要講既野，老豆已經左手雙指對準我眉心。
而另一隻手目標當然係我身後人。





突然身邊就如被大量無型嘅沙所擠壓，
由頭到腳既肌肉都無力做出任何反應，就好似平時去沙灘，
比成班朋友挖左個坑，埋住左你一樣，就連想合埋眼都做唔到。

老豆走到我身後，對Smoky 輕輕打量。
「你真係當我屋企係無掩雞籠，自出自入？」老豆對Smoky 講。

老豆轉身背向我地，大大行左幾步。

「第一！我呢度，唔係無掩雞籠！」

一滴冷汗由我額角慢慢流下。

「第二！你唔係雞！所以更唔可以自出自入！」





呢個環境之下，聽到呢個咁既爛Gag，我真係唔知笑好定喊好。
老豆行到我面前，特意將頭哄埋我面前。

「比多次機會你，」老豆用食指篤篤我嘅額頭。
就喺被篤嘅一剎，身體感到一股暖流，由額頭一直擴散到全身。
包圍著身體四周嘅無形壓力亦隨之消失。

老豆喺褲袋拎出一條黃色紙條，以食指及中指令紙符挺直。
紙符將我同老豆其中半邊面遮蔽住。

「比個理由我，點解我要留佢喺世上？」