唔係掛！原來真係有鬼！－現代捉鬼故事: 第七章 －年年有今日－ 4

雖然食完兩包營多，理應飽到上心口。
但係對住面前嘅蛋糕，我開始明白，點解女人成日話佢地有兩個胃，
另一個胃係專要黎裝甜品。
以前我會覺得呢個都只係女人又要減肥扮細食，又要唔肯戒口嘅藉口；
但係呢一刻我終於發現，佢地可以飽一飽都食甜品，
主要原因，甜品對佢地黎講，已經再唔算係單純嘅食物。
佢地想要嘅，或者只係要甜品為佢地帶來嘅快樂。

Smoky 拎左個蛋糕入廚房，
轉眼之後就拎左兩份蛋糕出黎。





「點解你拎兩份出黎嘅？」
一般情侶當然只係要一件啦，你一啖，我一啖，
但係我地嘅情況點同一般人，最起碼我地由相識到今日，
都仲未試過一齊『食』一餐飯。

「hehe！」Smoky 一笑，
隨即喺身上拎出一包 『益達』。

我記得以前上網睇娛樂新聞，男女主角拍kiss戲之前都一定要刷個牙，食下香口膠。




我頭先只係忽上腦攬左Smoky 一下，轉個頭就kiss?!
咁今晚咪....
 唔得咁架！作為一個虔誠嘅靈異工作者，我絕對反對婚前性行為！

「咁快？！我未有心理準備喎！」我見到Smoky 嘅動作,忍唔住答。
「咩呀？你諗左去邊呀？」

「香口膠．．．你唔係想．．．錫錫咩．．．」
面上突然有一股熱氣湧現，估唔到我成廿四歲人，
都仲會面紅。





「錫你個頭呀！」

「咁你拎包益達出黎做乜？」

「呢包係新野黎架！有左佢就以後唔駛食之前隻煙，一陣你又話我mk又剩...」Smoky 一面不悅，睇黎對我之前話佢似mk妹仲耿耿於懷。鬼咩，有上高登嘅巴打，一諗起食煙嘅女仔，一定會諗起「訓啦柒頭」果張圖。

「下?即係依家食香口膠就可以現形？唔駛再食果d乜鬼中藥煙喇？」

「啱一半！依家除左冇中藥味，最重要係...」
話口未完，Smoky 跳起對我面額錫左一啖。

「喂！」我嚇左一跳，之後一手按住頭先被人偷襲嘅位。

「依家仲有體溫，有呼吸，最重要就係可以同你個為食貓去食野！以後你就唔駛自己一個食咁慘喇～」





聽到呢到我其實真係好開心，不過比人咁偷襲我又真係好唔甘心。
可能細個睇得電視劇太多，作為小毒撚嘅我，點都認為kiss 一定要喺好浪漫嘅情況之下。可以唔係d咩沙灘，又或者送完女仔返屋企之後等等，但係最起碼唔係喺自己屋企。

「咁以後咪可以同你食到老，玩到老囉！」Smoky 補充。

「你唔好以為拎仙劍奇俠傳ｄ對白出黎就特別touch呀，講呢句野個女主角最後死左架！」

「係咩？我唔知喎！快d試下我親手整嘅蛋糕啦！」Smoky 隨即拎起兩碟蛋糕同我坐埋梳化，陪我繼續睇埋頭先未睇完嘅戲。