唔係掛！原來真係有鬼！－現代捉鬼故事: 第七章 －年年有今日－ 3

客廳中慢慢出現一點微弱嘅火光。火浮於半空之中，上下飄動。
火點一變二，二變三，慢慢排成一個飛輪形狀。

「你想點呀！係男人就現身啦！」面前眼前情況，
火上面無武器嘅我只能借勢挑釁，等眼前妖物一現身，
就立即將牆上面木劍取下，殺佢一個措手不及。


「我唔係男人，係咪唔駛現身呀！再者我想？我想...嘿嘿哈哈哈！！」未料寒氣主人聲音係一把女聲，早知講”有膽就現身啦！”，不過到時佢又可能話 ”我係鬼無膽架！”





「拿拿拿，咪埋黎呀！我收左你架！」
面對對方步步進迫，手上面無任何談判籌碼嘅我只能靠mk嘅最大絕技，
虛強聲勢。

「你收到我嘅話，你就唔會依家咁大我啦～」女聲漸變輕挑。
火光構成的環猶如被人用手拎住一樣，一步一步向我迫近。

「咁...咁我嗌非禮架！」我承認呢一下我已經唔知自己講緊乜。

「你嗌破喉嚨都冇人理你架喇！傻佬！」




咪住，點解把熟好似似曾相識？

客廳燈光慢慢恢復正常，眼睛亦在燈光突然轉變下一時間難以適應。
不過眼前慢慢出現一個比我矮大半個頭嘅身影。
手上面拎住蛋糕，蛋糕上面有幾隻用朱古力寫成,東歪西倒嘅幾個字。

「傻佬生日快樂！」

「點呀！驚唔驚喜呢？」
眼前人特意提高自己把聲嘅聲調，一副得戚樣問。





唔知點解，我個鼻突然間有種好似麻痺嘅感覺，
有少少似做完運動嘅酸軟，呢種感覺慢慢傳到雙眼，
眼框慢慢浸出淚水。我用手輕輕對鼻樑及雙眼附近位置輕輕按幾下，
舒緩呢服突如期來嘅壓力，又或者叫感動。

「快D許個願，吹蠟燭啦！」

我深深一呼吸，忍得住。
我唔知呢一股感動係黎自有人同我慶祝生日、有驚喜定一係再次見番一個我以為呢世都冇機會見到嘅人，又或者係鬼。
不過呢一刻，我終於知道，佢喺我心入面嘅重要性係無人可以代替。

「喊呀你～？」

「你收聲，老虔婆。」我忍住眼角嘅淚水





「咁唔鐘意，咁我走囉～」Smoky 放低蛋糕，轉身向門口方向走。
雖然佢年齡真係有六十幾歲，但係我敢講，佢嘅心智真係同佢外觀無分別。

「喂！」我深深一呼吸，對住正轉身離開嘅Smoky叫。

「又點呀大少？」Smoky 停喺屋企大門之前。
面向門口說。

我慢步走到Smoky 背後，以雙臂由背後緊緊抱住佢搏頭。
下巴貼住Smoky搏頭。
「應承我，以後唔好粒聲唔出再走啦，好嘛？」

「生日願望黎架？咁我唔送禮物架喇！」
Smoky 雙手輕輕搭喺我嘅手臂上。




呢一刻，唔需要千言萬語，因為只係輕輕一攬，
已經夠我將呢咁多個月嘅思念話曬比Smoky 聽。

「嗯。咁你可唔可以幫我達成呢個願望？」

「唔～～好啦！應承你～」Smoky 轉身伸出手指尾。
「一言為定。」我亦伸出我嘅手指尾，為呢個小承諾立誓。