唔係掛！原來真係有鬼！－現代捉鬼故事: 第七章 －年年有今日－ 2

公司從來冇人知我生日。
可能你會問，你老豆點會唔知呀？
老老實實，如果你依家問你老豆，如果一個男人會記得個仔幾時生日，
我恭喜你，你應該有一個愉快嘅童年，同埋有一個非常好嘅爸爸。

我唔係話唔記得個仔生日嘅就係衰老豆，
而係呢個香港入面，冇乜邊幾個大男人會記得呢類日子。
你問佢自己幾月幾號結婚都未必記得，更唔好話個仔幾時出世。

特別係阿媽走左之後呢兩年，我生日都係自己一個過。




無他既，反正生日唔生日對我黎講都一樣。
一樣要返工，一樣要食飯，一樣會打丁，對我而言根本無分別。

面對就黎廿四歲，我亦無乜特別嘅感覺，
可能自己真係比較鍾意自己一個人嘅生活掛。

就喺生日呢個平凡晚上，
我放工返左屋企，為自己準備左其中一樣呢個世界上最好味嘅美食 -營多 做自己嘅生日晚餐。 我照住包裝上面嘅圖片，有少少菜，加多隻燶邊蛋。
望住檯上嘅美食，我不禁為自己嘅廚勢感到無比嘅驕傲，滾動程度比我見到紅色嘅國旗後，心入面嘅激情高幾十倍。 屋企嘅42吋電視正播住我收工買番黎嘅Pacific Rim 藍光碟。
識睇就一定係睇Pacific Rim 。有機械人、動作感應駕駛倉、




有怪獸、有自爆、有香港同埋最重要嘅主角救地球，
作為小毒撚，呢種戲真係睇幾百次都抵。
一面食住營多，一面睇住男人最愛嘅熱血電影，呢種生活夫復何求呢。

「嚓！」突然全屋所有電器同時跳制，Gipsy Danger 亦突然潛左落黑色嘅大海。 整間屋頓時漆黑一片，只能依稀靠窗外微弱嘅光，繼續摸黑食埋我嘅生日大餐。雖然興致大減，但一樣無礙我食營多嘅衝動。
每一啖營多我都細味品嚐，當你睇唔到碟上面仲有幾多營多剩嘅時候，
每一啖都可能係最後一啖，所以每一啖我都咀嚼到爛曬先吞。
估唔到停一停電都比我諗到一個營多新食法，都真係錯有錯著。 突然我感覺到屋入面傳出一陣冰冷嘅寒氣，
係來自靈體嘅寒氣。





寒氣由屋企入嘅走廊傳出，寒氣由四方八面湧埋我身，一時間我亦未能準確定出寒氣主人正確位置。
我只係知道寒氣嘅主人潛伏喺睡房之中。
可以咁完美地隱藏自己嘅怨氣，
眼前對手一定非同小可。

但係返到屋企我已經將成個袋連埋狙魂鎗掉左入房，
你邊估到有鬼敢太歲頭上動土，仲敢上黎我屋企搞事丫！
我唯一可以用到嘅只有老豆掛喺牆上嘅桃木劍，
但係以依家漆黑程度，我未拎到劍我已經比對方收左我皮，
所以一時間我亦唔敢輕舉網妄動。