唔係掛！原來真係有鬼！－現代捉鬼故事: 第七章 －年年有今日－ 1

所謂嘅第二階段，就係體能上訓練。
最重要係訓練自己對外間環境嘅抗性。
點訓練？如果你有日喺西洋菜街，見到條友三十幾度仲要著住件大公仔衫，
扮魚生、扮炸豬扒派傳單同人影相；又或者得幾度仲著住短裙仔喺度派波波...
放心，派波波嘅唔係我，喺後面著住件背心泵波嘅就係我。

可能你覺得件事好戇居，我都覺。

不過當你喺一件幾十磅嘅公仔衫入面，我只能講，衫內衫外真係兩個世界。
如果有人唔明咩叫溫室效應，我誠意推介你做一日「公仔人」，




在太陽曝曬之下，公仔衫為你成個人構成左一個私人桑拿。
再加上廣告商嘅要求，又要你跳，又要你擺唔同 『鋪屎』，
果一刻，我真係想「屎」。

除此之外，基本體能訓練當然唔少得。
跑機、舉鐵、划艇機，每一部都操到合埋眼都識做。
呢段日子維持左大半年。
半年當然唔夠我由小毒撚操到變Batman，
最起碼依家叫唔潺咁囉。





咁當然唔係半年都只係派波波同派傳單啦，
日頭我係一個派傳單嘅傳單仔，
夜晚，我亦會有OT 時間。
而我嘅「戰利品」，即由最初只可以同人鬥大細，
到依家可以同人玩十三張有餘。

呢半年的確好充實，
雖然每次工作都只係得自己做野，師傅企喺後面食花生。不過每次行動之後，師傅都會詳細同我分析番問題，
有咩地方做得唔夠好（又或者唔夠型）。有事喺公司，久唔久睇住師傅比Jessie 打到飛起，有時又見佢地鬥下咀咁，
差唔多每日都為公司帶黎好多笑料。




每日喺度都好似個大家庭。

可能我真係貪心，如果呢個時候，如果 『佢』喺度唔知會講啲咩呢...
會係「傻佬！今日又要扮豬扒呀？」定係粒聲唔出又捉我去買衫呢？