唔係掛！原來真係有鬼！－現代捉鬼故事: 第六章－起步－19（續）

呢一刻，我有少少可憐肥鬼哥哥。
我行埋肥鬼身後，搭一搭佢既搏頭。
「I know that feel bro.我都有追Hunter...」我對肥鬼哥哥講。

「你都係巴打？」肥鬼聽到我嘅說話，好奇回頭問。

「毒男唔上高登有乜做丫。」我低頭嘆息。
因為今時今日通漲遠超人工加幅嘅香港，我相信MK都總會有一日喺屋企睇動畫。

肥鬼哥哥轉身，向我輕輕一攬。




「算啦，我都唔令你難做，完左個蟻篇，我都當追完架喇，我都唔應該留戀太多。」

說畢，圍繞住肥鬼嘅紅色光芒慢慢退成白色。

「嗯...」雖然我地都唔知算唔算認識，
但係要我親手終結一條生命，無論點講都好難落手，即使佢係隻鬼。

我舉起手槍，手槍上的描準器重疊於肥鬼哥哥嘅眉心。

「多謝你，巴打，被巴打送上路總好過比外人捉丫。」肥鬼合起雙眼，




面額添上了笑容，我唔知佢嘅笑係代表咩，不過，呢一刻我感受到佢嘅平靜。

「再見喇巴打。」我雙手緊握手槍，食指套入板機。
準備送呢位新相識嘅巴打上路。

「呼！」一陣風聲沿我耳邊快速閃過。
有一般微風突然由我耳背直飛到肥鬼哥哥面前。
當我回過神來，就已經發現一張啤牌 半空停於肥哥哥面前。

「收！」熟悉嘅聲音由我身後發出。




啤牌如收到師傅的命令，在空中旋轉，
肥鬼哥哥頓化成萬千光點，隨啤牌帶來嘅旋渦吸進牌內，
啤牌亦在吸收完由肥鬼哥哥化成既光點後緩緩飄落。

師傅一步步走向肥鬼哥哥最後出現嘅位置，
腑身將吸收左肥哥哥嘅啤牌執起。

我低頭，始終有個生命o係面前消失，
個震撼程度真係遠遠比相像中大。或者我應該掉番轉諗，我地只係送左一位朋友上路，
或者個心會好過少少。

「呵欠～行喇，肚餓呀我！」師傅一邊打喊路，一面說。

「哦...」





「做乜鬼呀你，男人老狗你收完隻鬼你喊呀？！」師傅企正喺我面前，刻意低頭窺探我嘅表情，一面偷笑。

「拿！拎去喇！」師傅將收完肥鬼嘅啤牌遞比我。
我雙手接過啤牌。
啤牌上面出現幾攤灰色嘅圖案，細看之下同頭先嘅肥鬼哥哥身型有幾份相似。

「點解張牌好似咁多積咁嘅？」我拎住啤牌問。

「每件收左鬼既 『封魔器』上面都會有一定嘅變化，隻鬼愈猛，變化亦愈大。頭先隻肥仔嘅程度，兩撻積算係咁架喇。」

「咁即係頭先隻鬼仲未死？」我追問。

「鬼就一早死左架啦！點會未死！只係未完成你要做嘅野啫。你有兩個選擇：一，燒左佢，送佢上路；二，留佢喺身邊話唔定他朝有用。」

「咁我地依家...應該點做？」





「拿，你還你，我還我，唔好我地！隻牌交左比你，你自己決定啦！
依家我要做嘅野就係去食宵夜！你爆曬缸咁我就唔知你駛唔駛去醫院喇。」
我用手掂一掂左額嘅傷口，血已經止左。
雖然仲好痛，但比起細個一腳踩落lego 度嘅痛苦，都仲差好遠。

「我諗我冇事嘅。」

「無事就最好啦。」師傅轉身就行，在停止運作嘅自動電梯上，
幾步就跳到下一層，可能佢真係好心急食宵夜。

「師傅...」

「嗯？」





「其實我頭先做成點？」

「OK丫，唔差呀。」

「合格？」

「整體行動上係合格，不過型格方面差少少，可以改進下。」
師傅喺信和門口停住腳步，慢慢走埋黎，搭住我搏頭。

「每個人第一次做野都有唔同經歷，所以唔駛太在意。冇穿冇爛已經執到架喇。」師傅一面講，一面笑。睇黎佢自己第一次捉鬼嘅經歷都唔好得去邊。

「你果次好慘嘅咩？」

「唔好提喇！爆曬缸，仲比人整蠱，比人改左個名，以為好型啦，點知原來係港漫嘅奸角名！」





「邊個咁大整蠱？」

師傅冇回答，只係笑一笑。
我諗都應該係Jessie ，如果唔係佢地兩個都唔會咁大仇。

「去食野啦！最多我請你！多謝你教導之恩。」

「你會咁闊佬？你請我食翅我都唔會講架喎！」

「男人老狗好心你唔好咁小心眼啦！」

「師傅你都夠膽串？仲想話聽日開始第二階段訓練，依家你都係洗多幾個月廁所先啦！」

「Sorry 呀！你大人有大量啦雲大哥！」

「你依家刷鞋都冇用架喇！收皮啦你～」