唔係掛！原來真係有鬼！－現代捉鬼故事: 第六章－起步－18

肥鬼將我整個人抱起，準備將我整個人倒轉，之後用我嘅頭部直撞落地。
如果你有睇過激戰，你一定知我講緊邊招。
但係我唔可以好似張家輝一樣對住肥鬼個頭一拳打埋去，
一來，我唔係張家輝，冇佢咁大隻；
二來我兩隻手一早比人扣實左，唔好話要中左塊面，
我依家連要舉手投降都做唔到。


我雙腳不停伸，不停反抗，
直到我感覺到我自己已經水平訓左喺半空，




第一次，我感覺到咁平靜，都係嘅，暴風雨前席點都係咁平靜嘅。
個頭撞地，好運嘅應該死唔去嘅，我諗。
被個米9嘅高佬整個抱起後天花板嘅光管同我只有好短距離，光芒令我雙眼都睜唔開。

有計！

我兩腳向天用力向天花板一伸，將肥仔往後一壓。
對於突如其來嘅理力，肥仔頓失重心，
一步，兩步三步，肥仔向後行左幾步後，整個人往後撻。
仲做埋我降落嘅軟墊。




本身肥仔失重心最多都只會向後趺低，之後坐喺地上面。
但係加上左我嘅重量後，肥仔坐左喺地下之後都仲要比我壓埋上去。
我同肥仔兩個同時訓左喺地下。

肥鬼依然倒地呻吟，我沒有浪費任何一秒，
飛快起身，跑到巷尾將手槍拎番上手。

大姆指輕按手槍上既按鈕，彈夾高速順勢向下掉落。
左手將腰間彈夾於皮帶上抽出，繼而反手將入滿【狙魂彈】嘅彈夾插入手槍。





有股溫熱嘅感覺由我左邊額角緩緩流下，我以左手一抹，
以免血流到眼角，影響視力。

「玩完喇肥仔，算啦。」我以槍管指著肥鬼。
在一輪鬧劇之後，終於到今晚嘅尾聲。

「吼....吼....」肥鬼雙眼滿怖仇恨，
身邊人亦能感到其心中之不屑。不過肉隨砧板上，肥鬼根本沒有半點同我討價還價嘅籌碼。
或者諗到呢度，肥鬼眼角泛起一點淚光。

「男人老狗你喊呀？」我忍唔住講。

「唔比呀？你試下你要死都追唔完一套漫畫丫拿，你都會喊！我又冇仔冇女，叫唔到ｄ後代燒比我！」

「不過你都知，我唔處理你，我好難做...」





肥鬼低頭，一步一步行去我地最初發現佢既Figure鋪頭。
用生命最後一刻，去感受自己最喜歡既事。
或者，由佢好好享受呢一刻，就係我唯一可以為佢做嘅野。

「肥哥哥，不如咁，你話比我聽你追開邊套漫畫，等我有時間燒比你啦。再唔係我燒部andriod tab 比你，你用布卡漫畫上網睇啦。」

「唔駛你呀！貓哭老鼠！食屎啦富奸！！！！」
肥鬼對天大叫，商場嘅燈亦如受到干擾一樣，一閃一閃，
但隨肥鬼既吼叫靜下，燈光亦回復正常。