唔係掛！原來真係有鬼！－現代捉鬼故事: 第六章－起步－17

肥鬼同我互相向對方方向直衝，不消一秒大家已經去到拳頭可以相交嘅距離。肥鬼哥哥無令我失望，佢用盡全身起力，右腳往後一蹬，扭腰，加上以右臂掉拳，記得細個時候喺機鋪睇mk仔玩打拳機，佢地話只三鼓力若然配合得好，真係可以好似Tony Jaarm 咁一拳可以打死大笨象。

眼見呢個情況，我立即座低身，模仿棒球手抵疊時嘅地面滑行，
目的係要喺肥鬼哥哥嘅褲檔下穿到佢身後執番我嘅武器。

「啪！」我雙腳鏟過左肥鬼嘅褲檔，
可惜嘅係我再冇向前滑。信和嘅地下每日都有成千上萬嘅人行過，
一個咁污糟嘅地下，唔貼住你都借笑，或者我唔著番條絲質褲都好難向前滑。

被地下啜住左嘅我，就坐左喺肥鬼哥哥嘅褲檔之下，




幸運嘅係，只要我再遲半秒停低，我就可以親吻落佢”小兄弟”嘅位置。

肥鬼見狀，立即蹲下。當我以為佢就咁坐落黎嘅時候，
佢竟然準備向上原地跳，以更大嘅力度想向我施壓。
我立即拎起手上面嘅現形水對坐肥鬼面上噴。

「呀！！我對眼！！」肥鬼雙手掩住雙眼大叫，同時一面向後倒行。
現形水除左令鬼嘅身體「實體化」外，更重要嘅係可能令佢地能力大減。
而鬼嘅皮膚掂到現形水亦會令佢地產生短暫痛苦同灼熱嘅感覺。





我立即以單手支撐身體起身，並且跑上前打算將手槍拾回。
但肥鬼似乎一早了解到槍對我嘅重要性，在倒退嘅時候，比我快一步以右腳踩住手槍，向後一拖，將手槍踢到巷尾位置。

正所謂兵不厭詐，對唔住我都要做一次。
始終你係鬼，我係人，我地嘅搏鬥已經冇話君唔君子。

就喺肥鬼繼續掩住雙眼嘅時候，我立即對準肥鬼身體上最重要嘅要害一腳踢落去。
唔緊要啦，反正鬼都唔駛生小朋友架啦...應該。

「噢！你呢下犯規喎！」師傅喺我背後大叫。





「呢d時候都冇話犯唔犯規喇嘛大佬？！」我反問師傅。
師傅只係偷偷笑左兩聲。

「好痛呀！我唔會放過你架細路！」肥鬼張開雙臂，
似乎已經適應左現形水所帶黎嘅痛（當然包括頭先我踢佢蛋蛋o個下）。

說畢肥鬼就再以箭步直奔，相手張開，就如一個摔角手一樣向我突進。
我緊緊抓住肥鬼嘅雙手，雙手頂住肥鬼，就好似摔角比賽入面，兩位選手鬥力嘅情節。

但係單睇身形我已經知我一定會輸，我決定再用多次我嘅大技－北斗碎蛋腳。
我提起右腳，對準肥鬼褲檔大力一伸。
右腳準確地命中，我望一望肥鬼嘅表情，只是佢面不改容，仲陰陰咀咁笑。

「同一招係對聖鬥士唔會起到兩次功效架。」肥鬼說。




我唔知呢句說話點解，又或者出自邊度，我剩係知今次大鑊了。
肥鬼則身一轉，我右腳未收，即時踏空，頓失重心。
肥鬼立即閃身到我身後，雙手圍住我嘅腰部，將我成個舉起，
準備使出街霸入面蘇聯佬嘅絕技。

「喂！唔好用倒頭中呀！我唔係林思齊呀大佬！」我心諗。