唔係掛！原來真係有鬼！－現代捉鬼故事: 第六章－起步－16

我再次企起身，雙手互相拍拍，將手上的灰塵拍走。
眼前肥鬼哥哥沒有因為撞飛完我之後，減少因為我用外賣單扮figure 訂單 呃佢而帶來既怒氣。相反，肥鬼哥哥比我啪左兩野之後，即時好似德國瘋小孩上身一樣。

「做乜射我個頭！」肥鬼拎起地上面既銀色bb彈。
「我問你呀！做乜拎bb彈射我！」望住肥哥哥手上面既銀色彈，我終於發現左點解肥鬼比我打中左兩槍都仲依然可以企定定咁有中氣咁對我問罪。藍色彈先係打鬼，銀色打乜我就唔係太記得。不過依家記得都冇用，
即使我腰間仲有另外兩隻入滿狙魂彈既彈夾，但係一日唔拎番被肥鬼哥哥踩住既槍，呢兩個彈夾頂多都只能做投擲武器。

我再次集中精神，望住同我距離唔夠10步既肥鬼哥哥，
我開始隱約見到佢身上面所發出既紅色光芒。
淡淡既紅光包圍住肥哥哥既全身，




就好似當日o係達德見到校長既時候一樣。

呢個似曾相識既感覺某程度令我安靜落黎，
因為最起碼我確認左一件事，眼前既肥鬼哥哥唔係d咩超高級既對手。


我拎出放左o係衫袋既靈視眼鏡，試多次用眼鏡去睇清楚肥鬼哥哥，用衫抹抹眼鏡既鏡片，或者頭先只係眼鏡因為唔乾淨而影響到佢本身既功能。
 我對鏡片一抹，姆指同食指清楚感覺到對方既存在同移動。
有戴眼鏡既朋友應該知道，如果眼鏡有一定厚度，你抹眼鏡既時候係絕對唔會感覺到另一隻手指。而依我所記得，靈視眼鏡既鏡片，絕對唔會薄如紙。





我左右打量一下手上既眼鏡，眼鏡臂上出現左一個唔應該出現既logo – real D (real D 即為 平日於戲院 觀看3d 電影時所配戴之3d眼鏡。)

我心入面不禁講左一句粗口。
原來一個人緊張起黎，就算係一件簡單到拎副眼鏡呢一個咁簡單既動作，
亦有機會出錯。我將呢副3d眼鏡放番入袋。

冇左槍，我只能同肥鬼哥哥正面搏鬥，
要同靈魂肉搏，首先要令佢真正現形，亦即係將佢「實體化」。
我由袋入面拎出以止汗劑作掩飾既現形水。
吸收左剛才既經驗，我特登先向空氣噴一下，確保我今次冇再拎錯野。





o係我背後傳黎師傅一下笑聲。我回頭一望，師傅已經放低電話，專心去留意我同肥鬼哥哥既對戰。師傅既眼入面充滿期待，我第一次o係佢身上面感到一份對我既尊重。希望佢眼入面既期待係對我，而唔係一陣既宵夜。

「呀！！」我對住肥鬼哥哥怒吼，識圖以氣勢先聲奪人。
肥鬼見狀，亦對我大喝，隨即向我直奔。
見到這個情形，我面露微笑。
一來係因為即將到來既搏鬥感到興奮，
二來係因為肥鬼已經掉進左我既圈套。

我用盡全身力氣對肥鬼方向突進。
隨住距離愈來愈近，我終於發現眼前既肥鬼身高起碼有1米9，
不過身型愈高，對我黎緊既戰術就愈好。
我右手緊握現形水，一面跑，一面將現形水上下搖晃。
所有壓縮噴霧用之前都要搖幾野，先可以發揮最佳效果，呢支現形水亦唔例外。





肥鬼右拳拉弓，對準我上身轟埋黎。
可惜我一早睇穿佢既動作。根據已故武術大師李小龍所講，
每個人既動作，都可以由佢搏頭睇得出。
我雖然仲未做到可以睇對手搏頭知道佢會點攻擊，
不過以一個唔識格鬥既小毒男黎講，第一下攻擊一定係用自己最善長既手，
打一下最簡單既直擊。
點解我會咁清楚？因為呢個本身係我既plan – 跑埋去，右直拳。
再者，肥鬼由起跑第一下己經拉曬弓，
除非佢善於攻心計，右手打弓左手打埋黎，否則我今次真係實食無痴牙。