唔係掛！原來真係有鬼！－現代捉鬼故事: 第六章－起步－14

但係面對眼前呢個將自己大半個身已經爬左入Figure鋪肥鬼哥哥，
我有Ｄ咩方法可以引佢返轉頭呢？

肥仔，咁一定鋪意食野啦，
毒男恩物，營多？
我無啦啦點變個營多出黎？！
再者佢都死鬼左！我真係未見過有人拎營多黎拜神。

咁野食唔得，或者o係其他方面入手。
一個死左都要留o係信和，唔肯遠離figure 鋪既肥鬼，




點先引到佢呀！

我雙手不停對自己個頭不停搲。
有人話搲頭可以刺激頭部血液運行，令個腦轉得更快，效果仲勁過葡萄適。
希望呢個方法真係幫到我，我唔想第一次行動就失敗告終。

「佢連條士啤軚都入埋去喇，睇黎我地今日都可以提早收工喇，任務評分，Ｆ！真係不得了。」師傅對住手頭電話起勢咁撳，將工作報告快速咁輸入電話。

「你收嗲喇師傅！你除左識睇AV同訂Figure之外仲識做d乜！」





咦！有計！
每個Figure 愛好者如果睇中左心頭好，一定會於Figure 推出前落訂。
當Figure正式推出既時候，就拎埋落訂時既訂單去拎貨！
簡單d講，即係訂單係每個Figure 發燒友o係Figure到手之前其中一樣最重要既野！因為單在，Figure在；單亡，Figure亡！

「喂肥哥哥！！！」我對住巷尾表演緊魔術既肥鬼大叫。

肥鬼哥哥無理會我既呼喚,繼續慢慢浸透入鋪頭入面。

「地下有張訂單呀！咦！呢隻好野黎架喎！會唔會係你跌左呢？」





你問我有乜Figure會出，我真係唔會答到你，
呢個時候真係只能放手一搏。

肥鬼哥哥似乎聽到我既說話，慢慢將自己由鋪頭慢慢向後移番出黎。
肥鬼好似一隻塞住左o係一個狹窄地方既小動物，雙腳一步一步向後行，
想將自己被卡住既頭部盡快拉出。

幸運既係，肥鬼穿越玻璃既時間相當慢，
不過一陣佢走番出黎我點都要死張單出黎比佢。

我向師傅揮手，正想問佢銀包仲有冇收埋d 咸濕figure 既訂單。
可惜既係師傅早已經戴上左隔音headphone 聽緊佢既akb48。

情急之下，我o係地下求其拎起張廢紙，




對摺兩下，扮成一張摺埋左好耐既訂單。

「張單呢？我諗係我架！」肥仔轉個頭對我講。
一個人到低要貪心到咩地步，對figure有幾怨念先可以死左都留o係信和呢？
或者，就係當佢認為信和入面出現既所有野都應該係屬於佢既一刻。