唔係掛！原來真係有鬼！－現代捉鬼故事: 第六章－起步－13

肥仔身穿黑色hoodie，但係size 黎講我諗佢真係買細左一兩個碼。
就算只係見到佢既側面都見到好似見到米之連一樣。
加上佢背面一粒大星，我諗佢都應該係black rock shooter 既fan。
一個印住動漫女主角既袋，做鬼做到佢咁風流，佢都算係咁。

「過去逗下去啦，企o係度做乜。」師傅一句說話，似乎佢細個睇得黑社會片太多。

我慢步向走廊既盡頭進發。呢3~4間鋪既路，
彷彿係我人生行過最遠既路。





咁大個仔，我連細路都冇逗過，更唔好話逗隻鬼。
或者我應該咁諗：唔驚既，「見毒撚就旭，見大隻就縮」呢d mk既座右銘，邊有死錯人，就係係死錯，都係死錯我一個o者。

諗到呢度，我不期然好似要上路既鬼，回一回頭望下呢個推我出去死既人最後一眼啦。可惜師傅早已經低頭睇facebook。

話曬都係第一次出師，一黎比件難野我，
仲唔睇住我由我死。陳傲雲我真係做鬼都唔放過你呀！
鬼唔望你好似龍虎門個陳傲雲咁比人整到你變獨眼龍呀！

我諗師傅呢一刻感受到我強烈既怨恨。




佢抬頭望一望我。睇黎今次我有救喇。

「快d啦。」師傅篤篤佢手戴住既gshock。
「趕住食宵夜呀！GOGOGO！」

我回頭望番眼前既肥哥哥。
肥哥哥依然企O係巷尾既一間Figure 店的玻璃櫥窗前面。
雙手拍住櫥窗，頭貼玻璃，彷彿想穿過玻璃入去店鋪入面咁。

肥仔上半身慢慢各前傾，本來緊貼住櫥窗既額頭竟然慢慢開始穿過玻璃。





肥哥哥慢慢將自己既頭穿入鋪頭入面。額頭，鼻，咀，慢慢睇住佢穿透玻璃。
眼前所見我直頭以為自己睇緊街頭真人表現演！
睇住肥哥哥既身影，我開始有少少懷疑以前明珠台個幪面魔術師就係眼前既肥哥哥：一來大家都咁上下身形，二來佢又一ｄ都唔孤寒，樂意於其他人眼前做表演。

「喂。」師傅突然o係背後打斷我欣賞大衛高柏肥o係我面前既忘情演出。

「你識唔識穿牆？」師傅問。

「緊係唔識啦，師傅你打丁打太多打到傻左呀？」

「如果你唔識穿牆，一陣佢入左去你點捉佢？呢d鋪頭一定有防盜，一陣差佬黎到我唔救你架。」

師傅真係一言驚醒步驚雲，我一定要o係肥哥哥完全穿透入鋪頭先之阻止佢！
但係依家我同肥哥哥仲有一段距離，就算我跑到好似小明咁快都未必埋到佢身。加上佢可以咁穿過玻璃，依家既肥哥哥有冇實體都成問題！





睇黎，我要用智取喇！