唔係掛！原來真係有鬼！－現代捉鬼故事: 第六章－起步－8

睇戲多數大家都會預先買定飛，
如果你買即場，多數你個位都會比較衰。
假如你有高山症，你坐我依家呢個位我肯定你死硬。
不過你既目的唔係入黎睇戲，而係入黎監視戲院入面觀眾既一舉一動，
我敢講呢個位真係想輸都難。

黑暗中既戲院入面，只要螢幕有光，其實唔難睇到每個人o係度做緊。
以前成日上網睇故，有ｄ巴打話自己同女朋友o係戲院點挑戰，
做乜做剩，作為一個鍾意睇戲既人，一聽就知佢吹水。
不過人地都講明係 『講故』，有時d野真係唔駛太認真。





我慢慢由左到右將每一個坐定定既觀眾一個一個地審視。

唔知黎睇戲定係為親熱既mk仔mk妹、單拖上陣既中年大叔，
坐無虛席既戲院入面，根本搵唔到一個有異樣既人。

不過我依然o係坐位上感受到刺骨既寒風，
直覺話比我知，呢間戲院一定有古怪。

唔係前面，唔通係我後面？！





我故意伸手抓抓背脊，再借故另轉頭望望最後一排觀眾既神情既目光。
全排觀眾都聚精會神於眼前呢套我由入場到依家都冇留意既戲入面,
除左我身後既呢個男人。

男人面形方方，大隻到坐o係度都覺得佢健碩。
唔講以為變形俠醫黎左睇戲。
男人一手拎住可樂，右手伸入身旁的爆谷紙盒中，
一手將大量的爆谷放到口中。
雙眼以由高致低，一種帶住傲視既態度望住我。





我不禁被呢個男人既眼神嚇到打左個冷震。
以呢個男人既體形；加上戲院入面既燈光，
我敢講依家呢一刻呢個男人要殺死我，就連我身邊既師傅都未必知。

我吞一吞口水，試圖去冷靜我依家緊張既情緒，
之後再另番轉頭，扮成專心睇戲一樣。

睇一睇錶，套戲都做左成個鐘，
以港產片咁計，頂多都係個半鐘完場，希望呢半個鐘入面呢個男人唔好對我做d乜啦...
原來好奇真係會害死貓。

「喂，細佬。」一把我從未聽過既男人聲o係我耳邊響起。
「望左我咁耐，你望乜o者？」男人態度突然180度改變，以嬌嗲既聲音同我講野！





媽咪呀！乜ｄ人話，鬼會陰聲陰氣同你講野，係咁解架？！