唔係掛！原來真係有鬼！－現代捉鬼故事: 第六章－起步－6

跟住落黎既兩三個月，我都係不停重覆咁執野，
中伏，執野，中伏。

我唔知呢個方法係邊個諗出黎，
我亦承認一開波既時候係有想殺死師傅既衝動，
但係慢慢，我亦由雙手先拎到地拖，慢慢變成左右手單手都可以輕鬆拖地。
同樣地，我既靈視力亦開始慢慢睇到唔同人身邊既氣牆。

我發現，原來除左鬼之外，人都會有道氣牆，
咁當然冇鬼既鮮紅色咁明顯。





公司除左我，老豆，師傅同Jessie 之外，
仲有另外一個同事，但係佢經常都只係返一返公司，
之後又出番去，所以我連佢姓乜都唔知。

老老實實，之前老豆都有提過，
公司既同事，平時都會出去幫人占卜賺下外快，
但係我又冇乜見過師傅出去幫人占卜。

最多都係去信和，炒下figure，




每個月幾千蚊上落咁。
有時真係不得不配服佢既眼光。

咁當然啦，我自己作為一個無依無靠，
女朋友伍姑娘與我常在既小毒撚，信和都係自己其中一個落腳點。
只係唔知點解，連師傅呢種外型唔太差，又會打下扮既男仔都成日流連信和。
可能師傅係一個偽毒，又或者佢係個偽mk，真毒撚。

「喂！收工同我去行街丫。」正當我打掃緊呢個沒完沒了既office 之時，
師傅突然o係我身後面講。




我望一望部手機，係wor，有新遊戲今日出喎。

「但係我未打掃完...」唔知點解,我覺得呢一刻自己有少少似灰姑娘。
 「醒少少啦，唔係下下都要真係出力抹架，哥仔。」師傅眉頭一皺。
此言似乎有弘外之音。

「下...即係點呀...?」我見到師傅呢個表情，更為不解。

「你第一次入黎既時候，你覺得office點？」師傅問，一邊引導我去佢想要既答覆。

「好乾淨囉。」

「咁點解咁乾淨？」師傅講完之後，輕輕一笑。

「哦！！！！！！！！！！！！！」我彷然大悟，但係亦有d唔明。




「但係幻術唔係對人用既咩？點可以執到野？」我追問師傅。

師傅一下對準我個一頭，好似啪薑咁啪落黎。

「冇人叫你對住d 死物用架天才！你對公司既人用咪得囉！」
點解我之前完全冇諗過呢個方法？！

「但係咁大間公司....又咁多人....而且用得幻術太耐又會好累...」我低頭，
諗一諗，以我依家既能力同極限，呢個都真係一個不可能既任務。

「你開頭就做大大份，少少幻術；如此類推，比下心機，
好快就可以做到好似我咁架喇。」
師傅講就易，但係做起上黎真係難過依家去宜家搶隻露姆西。






「師傅大人～有冇ｄ咩要訣？」我雙手緊扼師傅插緊袋既左手，
一邊問。

「一字記之曰，懶！睇你個人咁正直都係唔明架喇，自己慢慢參透下啦。」

懶？我真係唔係太明。
師傅轉身行返埋自己位，我目光仍然呆滯，回想師傅既一字真言到低咩意思。

「呀係呀！」師傅回頭一說。
「今晚帶埋你o係金仔度買套野。」
 師傅一句說話將我拉番黎現實！
三個月喇！我終於等到呢一日喇！

我最期待既畫面出現了！