【第三者】《只不過有些感覺，不到我來控制》: 十七
(十七)
「點呀」Hinson過到黎，就一手搭住我膊頭
「Ashley佢有第二個」我好簡潔咁講
Hinson個表情話俾我知佢好似發現左新大陸咁。
「唔撚係呀？」
「應該係佢啲同事黎。」
我望向天空，諗番同Ashley呢三年幾黎既點滴。
由仲未成熟既中學雞，去到依家已經讀緊大學，甚至做緊野，或者好多野一路變緊，只係我地都唔發覺。
當初一齊細說要有對方陪伴既將來，一齊幻想對未來既憧憬，但係依家又有幾多人會記得當初講過既呢啲甜言蜜語？
係咪佢嫌我唔夠成熟，俾唔到安全感佢？
係咪出到社會先知，原來仲有大把選擇？
定係人大左，就會發覺原來一段關係入面唔係淨係單純咁有愛就得？
我拎起隔離罐啤酒，然後輕輕呷左一啖。
「咁你依家諗住點」Hinson一路講一路拎左包煙出黎
「... 唔知，好亂。」
我又諗到雪瞳。
「係喎，其實琴日雪瞳咩事同男朋友嘈分手。」
「你呢個時候仲關心雪瞳... 」Hinson吸左一啖煙「佢男朋友出面有第二個，已經唔係第一次。」
我窒左一窒。
「點呀，你兩個遭遇相同喎。」Hinson有意無意咁講。
「你所打既電話號碼暫時未能接通，請你...」
傲言已經打左俾呀敏幾十次，但次次都係飛去留言信箱。
佢已經去曬呀敏會去既地方，甚至去埋佢屋企，但係都係唔見佢。
「呀敏妳去左邊...」
「叮噹叮噹」
一打開門，係傲言。
「雪瞳」傲言一見到我，就將我攬實
「點解...」我好想推開佢，但係唔知點解雙手好似無曬力咁。
傲言feel到我想推開佢，就將我攬得更實「雪瞳，對唔住。」
點解每一次都要講對唔住？點解唔可以抵住誘惑？
我好想原諒佢，我好唔想分手。
或者係因為唔捨得。
「點解... 次次都係咁」
「我知錯喇，我真係唔會有下次，我知我講咩都無用，但係... 我想用行動去證明俾妳睇我真係會去改。雪瞳，對唔住」
而每一次，我都係咁心軟。
「你知唔知我好辛苦呀，我為你改左咁多野，點解你仲要出去搵第二個呀... 係咪全部男人都係咁，係咪永遠都係要失去先識後悔呀」我忍唔住將我既情緒再次爆發出黎。
「我知係我衰係我賤，但... 我唔想同妳分手，我愛既永遠都係妳。俾多次機會我好無。」
佢攬實我，左手將我個頭攬落佢心口，然後係我耳仔邊好溫柔咁講。
或者佢真係太悉識我，連我弱點都清楚曬。又或者，我已經習慣左我生活有佢。
「... 我唔捨得你」我抬高頭用已經喊到紅曬腫曬既雙眼望住佢
「對唔住」佢攬實我。
「bb」傲言係廳行左入黎，然後從後攬住雪瞳條腰
「好快可以食架啦」雪瞳一路切緊啲火腿一路講。
「不如唔好整住啦」傲言拎開左雪瞳手上面把刀，然後啦住雪瞳出廚房。
「你唔係肚餓咩？」雪瞳俾傲言拉住出梳化，然後傲言坐左落去，再拉雪瞳坐落佢大脾攬住佢。
「遲啲食都得架姐」傲言一邊講，一邊將手向上移，同時係我耳仔邊呼氣。
「喂呀」雪瞳已經知道傲言想做咩「我趕時間喎」
「我唔理呀」傲言講完，就抱起雪瞳將佢放落梳化，然後轉身壓係上面鍚佢。
呀敏望住instagram傲言係15分鐘前po個張同雪瞳既合照，眼眶慢慢變紅。
「只要你開心就夠。」
其實我係咪已經原諒左傲言？我都唔知。我淨係知道個感覺好似已經唔同左。
我會驚佢再背叛我，我驚佢唔再愛我。
我唔明點解當初佢要去搵其他女。乜佢唔係話愛我架咩？新鮮感真係蓋過一切？
如果個日我無撞破佢，佢會瞞我瞞到幾時？
「你早啲反去啦，好夜啦」我望一望個鐘，原來已經十點幾。
「夜啦，小心啲呀呀言」我呀媽對住傲言講。
「咁我走先啦，byebye auntie」傲言同我屋企人講完byebye之後，我就送佢落去。
「早啲訓呀」臨走之前傲言對我講
「知道喇，你都係」我講完，佢就鍚左我一下。
我地... 係咪無事啦。
「妳點呀」番到上樓，原來呀宇wtsapp左我
「無呀，好番啦」
「無事咪好囉」
「多謝你」
「傻啦。」
「點解你個日會知我係海旁既」
「你同呀wing慶祝生日係海旁，仲有上次同Zoey hinaon佢地出去個次，你都係鍾意行海旁，我都係估下架咋。」
睇到呢個我呆左一呆，佢居然會留意呢啲細節。
「總之... 多謝你。」
「妳同佢... 係點樣好番」呀宇問左呢個好奇怪既問題。
「佢上黎氹我」
「... 男仔氹女仔係咪天經地義」
「你做咩呀」我feel到佢有啲野
「妳地好番，到我同我個件嘈」
「如果你想講，我一定會聽」
呀宇將Ashley同Ryan既野話左俾我知，我真係呆曬。
其實呢個世界上係咪所有人都會偷食，只係有人掩飾得比較好，無俾人發現？
「雪瞳！今日有咩搞呀」呀wing打黎
「無呀，諗住落自修室咋嘛，屌，dse又就到」
「陪我食lunch呀」
「你個呀峰呢」
「佢番工呀」
「唉好啦見係你」我望下個鐘，十一點，呀wing一點放lunch，我整埋野出得去都差唔多。
「屌琴晚訓撚唔記得睇個ppt」呀軒一番到黎就好急咁打開部電腦
「仲有成個鐘，怕乜」我話
「你估個個都好似你咁咩，天才」呀軒串左我兩句，就純熟咁打開左個file。
「我塊mon貼爆左呀」
「放學同你去換過塊咪得」
就係我同呀軒埋頭咁睇緊個powerpoint個陣，門口傳黎一把好熟悉既女聲同埋男聲。
我抬頭一望，係呀敏，而係佢隔離既係一直追左佢好耐既男同學，劉柏橋。