【第三者】《只不過有些感覺，不到我來控制》: 十六
(十六)
「...點解呀」雪瞳顫抖住咁問我
「... 對唔住... 」我唔敢正視佢
「你係咪唔愛我喇？」佢喊住咁抬高頭問我
「我... 」
我望住眼前呢個陪我經歷左三年既人，我好唔捨得，亦都好愧疚。我唔想傷害到佢。
我唔係一個好男朋友，對唔住。
「... 不如我地俾啲時間大家冷靜下...」雪瞳見我無出聲，就緩緩咁吐出呢句。
我唔知點應，企係度無出聲。
雪瞳另轉面，然後拉住Zoey行左入間cafe。
就係佢另轉面個下，我見到佢右邊耳珠位閃左兩下。
「雪瞳，鑽石戒指我真係未買得起，所以我用住呢樣頂住當先。」
「雪瞳，我知我地兩個都仲細，我知我仲未讀好書未事業有成未有能力成家立室，但我真係好想用我一生既時間去保護妳，愛妳。我想係度俾個承諾妳，無論以後點都好，我都會係妳身邊，唔會離開妳，我想妳成為我既女人。雪瞳，嫁俾我好無」
當天所有承諾一早消散不可兌現
「... 你點呀」我好擔心咁撓住雪瞳
「... 點解會咁」
識左雪瞳咁耐，我都無見過佢咁唔開心。佢係我地個堆圍內唯一一個我地未見過佢喊既人。
六年，雪瞳俾我地既形象就係笑，笑同埋笑。佢以前拍過一次拖，雖然最後俾個個男仔飛左，但佢都無咁sad。
傲言係佢心目中真係佔左個好高好重要既地位。
我同呀wing成日話佢同呀宇點點點，但其實我地兩個心裡面都好清楚，即使雪瞳可能對呀宇有啲好感，但佢愛既只會係傲言。
旁邊既呀wing打從我地番黎個陣已經留意到雪瞳有唔妥，於是就同班同學講話有啲事要早走。
「唔好意思呀，下次出黎聚我請食飯呀，走先啦」呀wing臨尾留底呢句，就同我一齊拉左雪瞳走。
我地去左海旁
「件事就係咁啦」我將岩岩件事同左呀wing講。
「佢老未，無野呀？條女咩料呀」呀wing一聽完即刻企起身好嬲咁講。
「你諗住點？」我問雪瞳
「我唔知，但我唔想分手」佢面無表情咁講
「佢一次又一次咁講大話，依家仲要斷正喎」呀wing依然好不忿。
「佢話佢會一世都愛我，佢話佢唔會離開我架」雪瞳一路講，眼淚又開始流。
「但係依家事實擺係你面前，呢個男人即使你要繼續同佢一齊，你都唔會開心呀。就算佢再講幾多甜言蜜語去氹番你都好，你可以當個條女無出現過咩？」
當局者迷旁觀者清，每一個人都係咁，唔單單係指戀愛中既男女。如果你真係好愛個個人，就算要你去犧牲一切去為個個可能根本唔愛你既人，你都會覺得值得。
但係可惜，個個人唔會因為咁而同情你，唔會因為咁而要有義務對番你好。
人從來都係貪心厭舊，愛亦都係從來都唔公平。
你愛佢但佢唔一定要愛番你，你愛佢一世但佢唔一定都要愛你一世。
三年感情可以因為一句話而毀於一旦，幾親密都好都有生疏既可能。
人本來就係咁善變。
「點解... 係咪我做得唔夠好呀，係咪因為我瞞住佢識左呀宇所以個天要俾懲罰我呀...」雪瞳已經泣不成聲。
「點解你唔試下掉轉頭諗，依家應該傷心個個係佢呀。佢失去既係愛佢愛到肯咩都為佢做既人，而你只係失去一個變左心既人。個天要懲罰既係佢，係因為佢出面有左第二個，所以個天先要俾你識到呀宇。」我一路輕輕掃佢背脊，一路講出呢番說話。
「吱」
「點呀gathering好無玩」係Hinson wtsapp我
「雪瞳同佢條仔嘈分手，我地安慰緊佢遲啲先搵你」我快速輸入，然後就將電話收番入褲袋。
「點解佢都唔搵番我」雪瞳喊住咁望住手上面一直拎住既電話。
我望向呀wing，而呀wing都望住我。
「我唔想同佢分手呀」雪瞳挨左落我膊頭。
呀wing就忍唔住坐左係佢隔離輕輕摸佢個頭「喊啦，喊出黎舒服啲」
我望住雪瞳個欄wtsapp，明明差個enter，但點解我偏偏唔敢撳落去。
「雪瞳，對唔住... 俾多次機會我。」
或者因為我都唔知，呢句係咪真心話。
「雪瞳！」
我同呀wing、Zoey一齊另轉面。
出現係我地面前既，係呀宇。
「... 呀宇？」我仲未黎得切反應，佢已經跑左過黎。
呀宇停左係我面前，而呀wing同Zoey就分別係我左邊同右邊抬高頭好詫異咁望住佢。
「點解...」
我呆左係度定曬格咁望住微微喘住氣既呀宇
呀宇無講野，一下將我拉左起身然後攬住左我。
呢刻呀wing同Zoey個下巴已經跌左落地。
「喊出黎啦。」呀宇用佢個把好溫柔既聲係我耳仔邊講
「...」我呆左係度，但過左幾秒，我啲眼淚就開始係咁不受控制咁流落黎。
我諗番起傲言同個個女仔岩岩係度鍚，佢攬住個女仔，佢好錯愕既樣，仲有佢之前瞞住我做過既野...
佢有無好似拖住我咁拖住個個女仔係海旁散步？
佢有無好似攬我咁係山頂攬住個個女仔鍚？
佢有無同個個女仔去過同我一齊去過既地方？
佢有無帶過個女仔番佢屋企？
佢有無同個女仔一齊入房，然後一齊訓上床，然後...
我好亂，我已經唔敢再諗。
「點解呀宇會係度既」呀wing問Zoey
「我鬼知咩」Zoey細細聲咁答
「吱」
Zoey拎左部電話出黎「喂呀宇係咪係你個邊」
係Hinson
「你又知既？」
「岩岩同條友食飯，講起雪瞳，你咁岩wtsapp左俾我咁我咪話佢知囉，點知條友咩都無講就狗衝左出去」
Zoey望住個wtsapp，然後遞左俾呀wing。呀wing睇完，o左嘴咁望住Zoey。
「佢點知我地係度架？」Zoey再次輸入
呀wing另轉頭，望住呀宇攬住雪瞳，而雪瞳就喊到係咁顫抖。
「岩岩睇你ig，見到你po相，仲要有location，咪知你地係邊囉...」
「但係我地已經唔係cafe啦喎」
「咁呀... 我就唔知啦」
唔知過左幾耐，雪瞳應該喊到攰，我同Zoey同呀宇講左聲唔該之後，就送左雪瞳番我屋企。
而呀宇就一直好擔心咁目送我地去車站，然後轉身行去地鐵站。
「bb你係邊呀，我仲有半個鐘就要入閘喇」我打俾呀宇
「我就到啦，依家落車。」佢講完就收左線
「Ashley」後面有人叫我，我未黎得切另轉面，個個人就一手從後攬住我。
係Ryan。
只有米八既佢可以俾到呢種感覺我。
「surprise！」我另左過去，同時佢笑住咁講
「點解你係度既？」呢一刻我只係覺得個心跳得好快，因為我知道再唔趕佢走呀宇一定見到。
「我想俾驚喜妳，咪偷偷地黎囉」Ryan一路講一路係咁攬身攬世。
「你... 唔好咁啦，呀宇黎緊呀」我係咁想推開佢
「屌... 又係佢，咁當初你又肯受我媾？」Ryan開始不滿
「放手先啦，我番到黎再搵你啦」我開始緊張個人開始亂
但偏偏Ryan唔肯走，仲要係咁想同我有親密行為。
「你走啦好無呀！都話呀宇黎緊呀！你係咪想佢知道左之後大家一齊攬炒呀？」極度慌亂之下既我對住佢大叫左一聲
「Ashley？」
我驚左一驚，然後另去左邊
「呀... 呀宇」
呀宇無出聲，佢停左係度望住同Ryan拉拉扯扯既我，然後就轉身離開。
「呀宇！」我用力甩開Ryan，然後跑過去拉住呀宇
「放手。」呀宇背住我停左係度，然後好cool咁講
「唔係你諗咁架，我同Ryan無野架」我都唔知自己講緊咩
「我叫妳放手。」佢依然無另過黎
「呀宇... 我...」
「妳番黎再講，我地冷靜下啦。」佢講完，就再一次甩開我然後頭也不回咁離開機場。