【第三者】《只不過有些感覺，不到我來控制》: 二
(二)
「睇唔出喎！你讀account架」
「係呀，做咩呀，我個樣似醫生？」
「走開啦，我以為你讀運動個啲架」
「咁我都有操開既」
我同阿宇一路傾計，一路去搵阿wing。
「唉，個衰妹究竟跟左人地去邊呀。」
「妳有無去甲板個邊睇過呀？」阿宇見我咁心急就提出建議。
於是我地慢慢走過去甲板個邊。
大家有搭過船都應該知，每次出海啲浪花都一定會彈到隻船邊既通道位濕曬，而且個個位又窄，仲要得一條鐵係咁以攔住，真係唔小心啲隨時命仔都無埋。
所以我同阿宇就一前一後咁行。但係我一不留神，俾地下個灘水冼親，跌左落阿宇度。
「呀！」
到底全盛時期既我可以係個識左一個鐘都無既人面前柒幾多次。
shit。
「妳有無事呀？」
令我意外既係，係我跌落去個刻，阿宇明明都俾我撞到失去平衡而跌左落地下，但佢係一秒之間用本來用黎撐住地面既手將我個頭擁入佢胸口。
我仲未load到發生咩事，呆左係度唔敢郁。
「我... 無事」頃刻，我講出呢一句。
「小心啲啦傻仔」
唔知做乜事我個心再一次跳得好快，我feel到自己依家紅都面曬咁既柒樣。我想企番起身但係唔知點解對腳唔聽洗，用唔到力。
阿宇唔知係咪睇穿左，佢扶一扶住我，然後自己起左身，再彎低腰一下公主式咁抱起左我。
好近... 呢刻我同佢塊面貼得好近。
我好緊張。
由於太貼近佢既心口，我可以feel到佢既心跳。
「呀... 呀宇呀... 不如你放低我啦，我ok架啦」
「殊... 乖，好快到」
我好鍾意仰望人地，因為我覺得好有安全感，好吸引。我同傲言係埋一齊既其中一個原因係因為我仰望佢既時候，佢個輪廓同神情完完全全吸引到我。
而呀宇應該係自我懂性以黎第二個可以吸引到我望住佢望到對眼唔捨得離開佢既男仔。
「係喎，妳個頭有無事呀」呀宇突然之間問我
「我個頭？」我好不解咁問。
「係呀，岩岩妳跌個陣個腦差啲撞左落條柱粒鐵釘到」
姐係話佢岩岩攬住我係因為要保護我？
「我無呀，咁你隻手呢」
「我隻手？」今次到佢好疑惑咁問我
「你岩岩攬住我個頭，係有事呀都你隻手有事先啦。」
呀宇先係呆左一下，隨即佢笑左一笑「到啦，妳等我一陣呀。」
佢將我放左係張沙發上面，然後就行左入廚房。
「傲言！呢邊呀！」一個身材高挑既馬尾妹係圖書館門口揮手，示意佢已經到左。
馬尾妹著住背心小熱褲，白色既背心仲透曬個黑色bra出黎。
傲言即刻加快腳步走過去馬尾妹個邊「sorry呀我遲左。」
「鍚番啖當補數!」
「呢度學校喎... 等陣有熟人見到...」
「我唔理呀！」馬尾妹一講完，就主動鍚左落傲言度。
「喂... 」
「岩岩教務處職員話圖書館今日閂早呀，啲人係我等緊你個陣已經走曬啦。嘻，我地行囉」
「唔得呀，我都未...」
「未影相sd俾你女朋友大人呀嘛！我一早幫你影左啦，等陣sd俾你啦，快啲啦我好肚餓呀...」
馬尾妹一邊講一邊撓住傲言離開中大既library。
「拿」呀宇拎左杯水俾我。呢度得我地兩個，由於岩岩發生既個件事令我覺得好尷尬，所以一直都無出聲，搞到個氣氛有啲怪。
「係喎佢地等陣應該會落水。」呀宇夾硬打開話題
「我應該唔落啦，我唔舒服」我一路講，一路下意識摸住自己個肚。無錯，我黎m，仲要第一日黎。
「做咩呀，有左呀？」佢講完仲要笑笑口咁款
「有左你個頭呀？」
「吱～」傲言wtsapp左我，加埋一張係自修室既相同埋佢懶cute既自拍，我發自內心咁笑左出黎。
「做咩笑到嘴角含春咁呀」呀宇見到之後係隔離笑笑口咁講
「我bb搵我呀」我扮左個姣樣出黎
「妳男朋友又會俾妳黎船p既」
「佢唔俾架，但有呀wing嘛」
傲言同呀wing都識左好耐，而佢都好信得過呀wing。
「雪瞳！原來你係度！」門口傳黎阿wing把聲「嚇死我呀以為你唔見左」
「我搵緊你呀，係你唔見左囉唔該。」
「你條路痴唔係係船都盪失路阿？」阿wing笑住咁講。
「收皮啦」
「喂係呀，佢叫呀峰。呢個我老死，叫雪瞳。」
「hi」
呀峰？呀峰？？呀峰？？？
我下意識望向呀宇，呢一刻佢既表情真係智障都睇得出佢想講呢個呀峰就係岩岩個扑野男。
屌，唔通岩岩條女真係呀wing？
「咦，呢個係？」呀wing終於見到呀宇
「叫我呀宇得啦。」
「哦，你好呀。喂雪瞳，呀k整左野食，你地快啲出黎啦。」呀wing對住呀宇同我笑左笑，就同個呀峰出左去，淨低面面相覷既我同呀宇。
「等陣我要玩香蕉船！」嗰個叫素素既女仔好興奮咁講，同時不忙唔知有意定無意咁郁動佢個對目測36D既大波波。
由於等陣要有水上活動甚至會落水，所以大家都換曬戰衣。
男既show盡六舊腹肌，女既就show曬對波同長腿，不得不承認其實呢一個情境望落都真係幾淫亂。
我望住除左件背心淨係著住條沙灘褲既呀宇，佢真係好charm好陽光。
呀k亦都整好曬啲野食，我地一圍起碼十幾人就坐低食野兼順便傾計。
呀wing條友竟然賴低我一個自己走左去呀峰同埋另一個肌肉男中間。
「食咩呀，我幫妳呀。」呢個時候呀宇坐左埋黎。
「求其啦，我咩都食架。」
呀宇笑左笑，就幫我拎左啲野食過黎。
「得唔得呀妳，我幫妳啦」
呀宇全程食野都淨係望住我，一見到我跌左野就幫我抹，見我食蝦就搶住幫我剝。
「你快啲食野啦，我自己得架啦」
「傻妹，妳睇妳」話口未完，佢伸手去抹走殘留係我嘴角既茄汁。
其實旁人望落，我地好似一對情侶。
唔知點解，我有種心動既感覺。我好想好想佢繼續咁樣對我。
崔雪瞳，諗咩呀你。
「就黎趕唔切啦，蕭傲言你快啲啦！」我拉住傲言衝去ua。
「仲有二十分鐘呀徐嘉敏大小姐。」
「早到好過遲呀嘛！」
我地去到ua，仲有成十分鐘先開場。於是我就行去買爆谷同埋汽水。
「妳拎少左支飲管阿。」傲言望住我手上面個杯淨係插住一支飲管既汽水。
「我唔介意人咬管架喎」我笑住咁講
然後我好清楚咁望到傲言先係呆左一呆，然後笑左一笑，隨即佢主動拖住我入場。
你話過，雪瞳唔鍾意你咬飲管，所以同親你飲野都要分開飲管飲，好唔浪漫。
我好希望我所做既所有野可以令你有一啲啲既心動，係你心目中有一啲啲既地位，咁就已經足夠。
「雪瞳我地落水囉！」食完野hea左陣之後，呀wing終於醒起我呢個朋友，走過黎係咁要我同佢落水。
「唔呀，我黎m呀八婆。」我完全無興奮既感覺，都唔明點解呀wing可以咁high。
「唔係掛，咁掃興架，唔怪得你著沙灘褲啦。」呀wing呢個時候先發現我係上身著bikini下身著沙灘褲。
「咁我落去玩一陣上黎搵你呀！呀宇呢，一齊落去玩呀！」
「我都唔落啦，前兩日打波扭親手費事又搞咁多野。」
我見到呀宇望一望我，然後就咁樣同呀wing講。
「咁呀，你兩個小心啲啦，有咩事記得大叫我呀雪瞳」講完呢句，我地互相講左句byebye之後呀wing就走番去呀峰個邊。
「你隻手傷左呀？有無事呀你」呀wing走左之後我就即刻問呀宇
「緊係唔係啦，up咋嘛，我落埋去既話咁邊個陪妳呀。」