【苦】《英雄聯盟》 - 一件次世代既愛情工具: 《維護》

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

唦唦———嗖———


傾盆大雨並沒有停止過，一輛紅色的計程車於馬路上疾走，不斷濺起道路石壆上的雨水。

而車廂內只載著一名焦急不已的乘客，不斷催促著的士司機加快車速。

他所為的，只是擔心另一半的安全。




［八號東北烈風訊號現正懸掛，天文台將於傍晚時間考慮改發———］


『司機，』家豪的身體傾前，皺眉問：『唔該開快少少。』

『先生。』的士司機一臉嫌棄地看了看咪錶：『已經最快架喇。』

『唔該…』




家豪即便有多擔心，都不能立時趕至依雯的身邊。

當家豪在超市與依雯分別後，雖然獨自離開上班，但當過海回公司的同時，家豪亦留意到天氣的轉變。

於是，家豪便致電予依雯，更一意孤行的找她。

畢竟，剛起初熱戀的時候，一些常有的理智亦會因著緊女朋友而失去。




［嘶————！］一下長長的剎車聲響起。


『嘩屌！』的士司機立即反應過來：『仆佢個街丫！咁趕出黎替死咩！』

『………』家豪坐在後座，默不作聲。

『唉。』司機歎了一口氣，看著計程錶：『哥仔，連隧道費一百八十二蚊。』

『唔該。』家豪從後褲袋取出銀包，掏出兩張紅色的鈔票：『唔洗找唔該。』


啪———



家豪下車把門關上後，由於沒有帶傘的關係，只能狼狽地奔跑到附近的簷篷之下避雨。

把身上的雨水撥去後，渾身濕透的家豪便取出手機，準備致電予依雯。


『喂。』家豪把手機放在耳邊：『阿蚊，我到左座大廈，你果間店係幾樓？』

『Er……』聽筒的另一端傳來依雯的尷尬聲音：『二樓…唔係，三樓呀～～』

『好。』


於是，家豪便馬不停蹄地趕上樓。

叮咚———叮咚——




咔———


『客人你好～～』一道少女的聲音傳來：『唔好意思呀～我地已經———』

『我係黎搵人。』家豪一句打斷：『請問有冇個女仔係度？』

『女仔…』少女思前想後了一番：『哦～有既，麻煩入黎先啦～！』


咔嚓—




家豪進入咖啡廳後，不消數秒，便發現依雯的蹤影。


『阿蚊！』家豪見到女朋友後，緊張不已的上前問候：『你做咩會黎左呢度，你唔洗返工咩？』

『我…』依雯的眼神閃縮，退後了幾分：『傻佬…我無事喎～我…我成日都偷走出黎架啦。』

『嚇死我……』家豪終於鬆一口氣：『幾驚你有咩事。』

『傻佬～我會有咩事喎！』依雯裝作沒事的道：『你呢？你做咩咁好黎接我既？』

剛才的少女忽然走近。

『客人～』少女拿著一條毛巾：『抹下身先啦。』



『唔該。』家豪一臉正經的接過後抹著身，便對著依雯說：『頭先返工前上司已經打黎同我講今日唔洗返。而且，我見有時間…咪想見下你。』

『哎呀，咁大雨好心你就返屋企啦～』依雯得戚地說：『我咁大個人會有咩事喎！』

『傻婆…我都係擔心你姐。』家豪罕有地害羞的說後，語調一轉：『係呢，頭先…你一直都自己一個人係度？』

『唔？』依雯忽地回過神來，打醒精神道：『係…係呀。』

『嗯，』家豪似是鬆一口氣：『你無事，就最好。』

語畢，家豪便一手牽著依雯。

『咁行咯。』家豪說。

『行…？』依雯被家豪此舉令到內心突然愣了一下：『去邊…？』

『嗯…』家豪探頭望了望灰濛濛一片的窗外：『呢啲天氣都無咩地方好去，我送你返屋企先。』

『哦…』依雯低頭說著：『好…』


［叮叮——］當家豪同依雯並肩而行，準備推門離開之時，水吧的鐘聲突然響起。


『蚊。』老闆在水吧開聲叫停。

『係？』依雯與家豪回首而望。

『哈哈哈，其實無咩。』老闆笑說道別：『下次黎記得幫我做返Parttime一個鐘補數呀。』

『知…知道啦～！』依雯尷尬地說。

『咩事？』家豪對著依雯問。

『冇…冇咩…！』依雯臉紅紅的避諱：『我地走啦～～老闆～借你把遮用下～～』

『喂…！！！』


咔——

老闆聲都未開，僅餘的一把傘便被依雯任性的拿去。

離開咖啡廳後，二人便沿著樓梯並排而行的下樓離去。

未幾，二人便走到橫風橫雨的大街之上。


『比我。』

家豪從依雯的手中接過雨傘後，便不發一語地打開，一手擔遮一手擁著依雯於大雨中相偎而行。

本應這個場面…是很甜密，很浪漫的；但此時此刻，倆人並沒有對話，令到整個氣氛都非常僵硬起來。

在家豪懷中的依雯亦都察覺都這一點，雖然內心有很多說話想跟家豪坦白，但一看見家豪那嚴肅的臉後，所有想說的話都吞回肚子裡。

依雯回想起一開始家豪的舉動其實都很正常，但自從咖啡廳老闆最後的一句後，家豪的態度便一百八十度的轉變起來。

沒有笑容、沒有表情、沒有說話；家豪只是緊緊的擁著依雯於雨中行走。


『喂…』依雯抬頭望著家豪，戰戰兢兢的問道：『傻佬…你做咩啊？』

『咩做咩？』家豪冷淡的反問。

『係咪有咩事啊…』依雯的腳步停了下來：『你做咩黑口黑面咁姐。』

『我黑口黑面？』家豪亦暫停腳步：『我都冇事，你係咪諗多左？』

『喂～！』依雯不喜歡轉彎抹角：『做咩喎！你有咩咪問囉～！』

『我冇野要問。』家豪走近依雯，再次擁著：『行啦，送左你返屋企先。』

『妖！』依雯一手撥開了家豪：『唔得～！你有咩就問啦～！我一定會答你架！』

依雯這樣說，並不是敷衍著家豪，而是依雯尊重家豪作為自己男朋友的身分；只要家豪問，依雯此刻定必會如實作答，為的只是二人的和好。

儘管之前曾撒過謊。


『…………』家豪拿著傘，一語不發。

『家豪啊…』依雯低聲說服：『唔好嬲啦…好嘛？』

『係咪我問…』家豪面向著依雯：『你就會答？』

『嗯！』依雯笑著爽快地回應。

『咁我問多你一次。』家豪凝視著依雯：『頭先除左你之外…仲有冇人陪住你？』

『有。』依雯如實的作答。

『任天衡。』家豪接著說：『係咪。』

『係…』依雯立即解釋著：『我頭先唔同你講…只係唔想你誤會，佢都係阿爸叫佢黎搵我架咋！』

『好。』家豪臉上終於露出一些欣慰：『我明白你，但你可唔可以應承我，下次唔好再隱瞞？』

『嗯！』依雯大力的點頭說：『我應承你～！』

『同埋。』家豪接著說：『我希望你…以後都唔好再搵佢。』

『你放心啦～』依雯笑說：『佢已經申請左調去另一間舖喇～咁你咪唔洗再擔心囉～？』

『我唔係呢個意思。』家豪立即否定。

『唔係…？』依雯聽得一頭霧水：『咁…係咩意思啊？』

『我係想你……』家豪一臉正容地看著對方：『永遠唔好再接觸佢。』

『唔好再…接觸…？』依雯更是不明白：『點解喎！我知…我知傻佬你都係呷醋之嘛！遲啲我都唔會見到佢啦～加上…』

依雯解釋到一半之時。


『總之唔可以再搵。』家豪打斷了依雯道：『應承我。』

『…………』依雯默然不語。

『點？』家豪追問著答覆。


『……』依雯沈默了一下，便說：『唔得…』


『唔得？』家豪目瞪口呆，皺著愁眉道：『點解。』

『因為…佢係我朋友……』依雯吞吞吐吐地說：『只係朋友…咁簡單…點解唔可以？』

『朋友？』家豪聽到依雯這句後，令到他平常一貫的沈著冷靜都開始消失：『蚊！你可能當佢只係朋友，咁佢當你呢？』

『我…點知……』依雯不斷逃避著家豪的眼神。

『唔係，你根本就知道。』家豪不斷進迫：『佢對你絕對唔止係友情咁簡單，我係唔會比佢拆散我地！』

『咁…咁又點！？』依雯亦都激動起來：『咁我只係當佢朋友之嘛！就算佢對我示愛咁又點喎！我都已經係你女朋友啦！我一樣會拒絕佢架！』

『拒絕佢…』家豪苦笑著說：『係，可能你會拒絕佢，但萬一有一日，我地好似而家咁鬧交，你會點？』

『我……』依雯張開口，卻發不出聲音。

『你一定會搵佢傾訴。』家豪又說：『我唔想你再搵佢，只係唔希望我同你之間會有人可以破壞到我地既感情，阿蚊，你明唔明呀！』

『家豪呀…』依雯苦苦地哀求著：『點解你唔可以信任我…？』

『我唔信你？』家豪不以為意的答。

『我…』依雯的眼眶開始浮著淚：『我都已經…同你拍拖…點解…你唔可以相信我啊！』

『唔係我唔信你。』家豪的態度沒有軟弱下來：『而係果個人令到我唔可以信你。』

『點解又要拉埋佢黎講喎！』依雯邊哭邊說：『愛情之間既信任，唔係由兩個人去維繫架咩？』


『點解你仲唔明。』家豪不斷的遊說：『總之最後一句，有佢，就無我。』

『……………』依雯流著淚說：『係咪以後所有對我有好感既人…我都要同佢地絕交？』

『唔係，只係佢。』家豪沒有迴避。


『點解…點解係佢一個？』依雯續道：『好，咁我以後全部男仔都唔搵，你滿意未？』

『蚊，只係一個人姐？』家豪反問：『唔通我係你男朋友，就連區區一個朋友都比唔上？』

『葉家豪，』依雯拭去淚水：『每一個人都有佢自己既圈子，如果你要我唔好搵既，我可以應承你，以後我只係得你一個，得未？』

『…………』家豪面對著悔氣說話，卻毫無對策。


『咁…走啦…我地。』依雯再次牽回家豪的臂彎。

『蚊…』家豪捉著依雯的手：『我唔知佢對你講過啲咩，但…你到底知唔知佢係一個點樣既人？』

『我唔想知喇…』依雯心神俱倦的說：『我只係唔想再嘈…好冇…？』

『我唔係要同你嘈。』家豪終和盤托出：『我係要你知佢到底係一個咩人。』


『你話任天衡…？』依雯雙眼通紅的看著家豪。


『係。』