【苦】《英雄聯盟》 - 一件次世代既愛情工具: 《折返》
滿意…？
當老闆講完呢一句之後，我留意到老闆既表情當堂變哂。
本來眼前既老闆明明好有威嚴，但打完個電話之後個樣就即刻變到非常親切…
而且，仲用一個既無奈又尷尬既笑容望住我；
唔係，係望住我身後既人。
「依…雯…？」我心底滿是疑問，木無表情的回望著：「到底咩事…？」
『……』依雯低下頭，沈默了一會：『噗…！哈哈哈哈哈！』
「…？」我一臉呆子樣的望著她。
『辛苦哂你喇～～叔叔～』
依雯抬起頭開聲說道後，她的表情便從本來的擔憂驚慌，變成開懷大笑般的樣子。
「叔叔…？」我不以為意的問：「你…講咩…？」
『哈哈哈哈哈～～～！』依雯笑得連剛才憋著的眼淚都掉了下來。
『唉，』老闆歎了一口氣說：『你叫阿衡係咪？』
「呃…」我不好意思地望住老闆：「係…」
『其實……』老闆表明身分：『我係阿蚊爸爸既朋友黎，頭先試你…都係阿蚊既主意，嚇親你唔好意思。』
「下？」我仍未知發生咩事。
『係咁既…』老闆解釋著：『其實呢間CAFE，阿蚊周不時都會黎，已經同我地好熟架喇。』
忽然，老闆身後走來一個嬌小身影。
『呵呵！』剛剛額上繫著頭巾的女店員走過來：『蚊姐姐～～我頭先啲戲好唔好呢～？』
『仲好講～！』依雯淘氣的道：『頭先爭啲因為你穿崩啊～！你講＂兩位客人＂果時～假到呢！』
『Sorry啊～』少女吐著舌頭道。
頃刻之間，我已經唔知邊個真，邊個假。
我只係知道…而家…好似已經無人再追究我既責任，當壓力一釋放之後……
我成個人忽然軟弱無力，累到癱了在梳化之上。
『喂～！』依雯笑說：『做咩啊傻仔！玩下次嘛～！唔係嬲啊～？』
「冇…冇野……」我終於鬆一口氣。
『蚊，你等一陣。』老闆走近我，看了一番後說：『我睇佢都係太肚餓姐，頭先佢又咁勇，等我煮啲野佢食喇。』
『唔該叔叔～～』
呢一刻，我終於回想起，難怪我頭先打比老闆果時，
老闆第一時間竟然唔係問依雯既狀況，反而係問左我去左邊先…
試問就算佢點當我係仔都好，依雯都係佢既親生女呀？
加上我地又唔知佢跑左去邊，試問經理又點會擔心左我先呢？
原來，經理一早知道依雯會黎左呢間cafe，而且仲會好安全…所以…經理根本就無擔心。
反而，當我同經理講…我話自己同依雯無錢比既時候，
就算唔理我，都應該擔心依雯而趕黎啦！點會仲留係公司啊…？
唉。其實只要我頭先細心少少，就聽得出…呢一切都係一個局黎。
不過…算啦，反正…都已經有驚無險。
『喂～死得未啊？』依雯坐在我對面叫嚷：『做咩啊…嬲啊…？』
「唔係…」我躺在卡位上，一手壓在額頭，望著天花：「只係…我應該多謝你先真…」
『多謝我？』依雯不解的問道：『你比我玩完…你真係唔嬲咩？』
「嬲…我梗係嬲。」我續道：「不過，我嬲既係我自己，唔係你。」
『嬲自己？』依雯蹙眉而道：『點解？』
「因為…」我橫了她一眼：「我覺得自己真係好無用，一日到晚淨係識逃避。如果…奴果唔係你咁迫我…恐怕…我都唔知自己個心到底想點。」
『唓！鬼叫你成日收收埋埋！扮哂野～！』依雯笑說。
「或者啦……」我歎了一口氣：「可能…我由細都大都係毒毒地…若果唔係因為接觸左打機…恐怕…我就連一個朋友都冇，更唔好話認識到你地。」
『哼！等你仲話我唔係你邊個！』依雯生氣著說。
『有野食～！！』
未幾，老闆便端著一盤食物過來，並說：『當我同阿衡你賠個罪喇！慢慢食！』
「啊……」我戰戰兢兢地道：「唔洗錢架嘛…？」
『食你就食啦！傻仔！』依雯一句打斷後，老闆便笑笑口轉身離去。
然後我便坐起身，拿著刀叉準備饕餮一番。
「啊，係呢？」我邊把食物放進口邊說：「你平時成日走左去…就係黎左呢度喇？」
『係啊！』依雯環顧著四周，笑說：『呢度好舒服～～我成日都會係度食食下野訓著左既！』
「哦…」我想了想後續問：「係呢，你…點知……」
然而，我卻是欲言又止。
『知咩？』依雯直視著我。
「知……」我吞了吞口水：「你點知道…我會…黎搵你…？而且…仲估到我會唔帶錢…」
『嘻，直覺囉！』依雯喜上眉梢的笑著。
「直覺…」我搖搖頭：「呢啲野都好信既…」
『哼，其實我一早睇穿你啦～！傻仔。』依雯的嘴角微微翹起。
「睇穿我……？」
『唉～～～～』依雯語氣一轉：『唔講呢啲喇！食你既飯啦！』
「哦……」
語畢，我便起勢地吃著眼前的一碟飯，雖然…我的確好想追問依雯落去…
但其實…我知道我同佢內心…都有一個答案…
只係…仲未係時候去彌清。
而且…更重要既一點係，今時今日既依雯，已經唔再係單身。
正係我想到入神之際。
滋—滋———
桌上的一部電話忽然響起。
然而…果部係依雯既電話，而電話上顯示著一張親蜜既合照。
『我…我～聽個電話先。』依雯尷尬地看著我說。
「好…」我馬上答允：「隨便…」
嘟—
『喂？家豪～？』
『嗯…係呀…我無事啊…嗯…』
『唔洗喇…一陣唔洗返…』
『而家？』依雯聽後尷尬地望著我：『唔洗啦！你返屋企先啦～！出面仲咁大雨！』
『但…喂？喂喂？？』
嘟—————
「做咩…？」我急不及待地追問。
依雯拿著手機，沒有即時的回答我，只是擺出一副尷尬的臉龐說道：『家豪佢…話唔返工…直接過黎搵我……』
「而…而家…！？」
『係…佢坐緊的士…好快就到…』