【苦】《英雄聯盟》 - 一件次世代既愛情工具: 《錯配》
轟隆—————
唦唦唦———
家豪抬起頭，望了望漫天飛雨的天空，便提著傘靠近依雯。
『呢度大雨，』家豪作勢的牽著依雯：『我地搵個地方再講。』
『唔走。』依雯鬆鬆肩胛，目不轉睛地看著家豪說：『究竟咩事…你快啲講。』
『……』家豪也拿她沒法，只能如實道：『好，阿蚊，你知唔知道果個任天衡以前既事？』
『唔知…』依雯低頭想了想：『但咁又點？』
『嗯…你仲記唔記得我細妹，家晴。』家豪問道。
『記得…你生日果晚…佢都有係度既。』依雯回想著：『但，又關任天衡咩事？』
『當然關事。』家豪解釋說：『我細妹當初就係比佢欺騙左感情。』
『你細妹…？』依雯呆呆的望著對方。
家豪搖搖頭，苦思地回想：『我細妹其實一直都無男朋友，以前佢終日流連夜店，晚晚都飲到醉哂咁先返屋企…但自從佢接觸左打機之後，去飲酒既次數就少左好多。』
『點解既？』依雯追問：『因為打機認識左任天衡？』
『冇錯。』家豪點點頭，續道：『起初…家晴都一直以為搵到個鍾意打機，唔去玩，又有安全感既男朋友，果個人…就係任天衡。』
『咁…』依雯尷尬地問道：『佢地有冇一齊…？』
『當然無！』家豪咬牙切齒地說：『果個狗公…！根本由頭到尾都無重視過我細妹！』
『點會…』依雯說到一半。
『事實就係咁。』家豪立即打斷道：『家晴好傻…一直都以為任天衡係同自己拍拖，但佢倆之間又無咩共同興趣，一切…都只係靠打機去連繫住佢地。』
『……之後呢…？』依雯戰戰兢兢的問。
『之後…！』家豪不斷地露著仇視的眼神：『佢用花言巧語氹完我細妹上床之後…就經常忽略佢！甚至佢仲可以狗到搵另一個男仔陪我細妹！』
『任天衡…佢真係咁做…？』依雯難以置信地問。
『唔信你可以問佢。』家豪斬釘截鐵地說：『我所講既都係事實，唔單止咁，除左我細妹之外，你知唔合佢仲利用「打機」去攪過幾多個女仔？』
『………』依雯默不作聲地低頭。
『阿蚊！我想你醒下！』家豪掉下雨傘，搭著依雯的肩膀：『我唔想我既女朋友身邊有呢啲咁既人呀！』
『但……』依雯仍在找尋籍口：『你阿妹…點解…對住任天衡…又無咩特別…好似朋友咁既…？』
『因為個傻妹一直係度呃自己。』家豪和依雯在大雨中對望。
『呃自己…？』依雯的雙目空洞，呆呆站著。
『我唔知任天衡同我阿妹講過啲咩，更加唔知佢做過啲咩事。』家豪又說：『家晴佢知道任天衡係呢種人之後，寧願呃佢話自己有男朋友，都唔想束縛住佢，因為家晴知道…任天衡根本唔會愛上任何人！』
『佢唔會愛上任何人…？』
『係。』家豪斷言道：『佢愛既，就只有佢自己。』
『我唔明……』依雯在暴雨中後退：『我唔明白……』
『阿蚊！』家豪苦口婆心地不斷遊說著：『你清醒下…！我唔想你變到好似我細妹咁！』
『但……呢啲都係佢以前既事呀…』依雯嘗試為任天衡辯稱：『可能佢已經改過呢……』
『改？』家豪不敢相信地說：『你認為佢呢種人會改到！？』
『至少…呢個幾月我認識既佢…』依雯回想著以往的事：『都唔會係一個玩弄感情既人……』
『阿蚊…』
家豪定睛地看著依雯，看著自己的女朋友不單止一次，而是接二連三地維護著另一個男人。
明明著看一張熟悉的臉龐，家豪的心中卻有一股陌生的感覺。
昔日跟自己親密和諧的依雯…到了今天，彷彿變了另一個人一樣。
『家豪……』依雯沒有理會家豪繼續說：『每個人都有犯錯既時候架，就好似坐過監既人咁…點解唔可以比一次機會佢地？』
『…………』家豪沒有回話。
『再加上…』依雯皺著眉道：『我都只係同佢做朋友姐？…家豪…你先係我男朋友嘛…係咪？』
『…………』
『最多我以後唔搵佢咁多…』依雯似是妥協的說：『我相信佢都唔會點搵我架喇……但佢真係無咩朋友…其實唔洗做到咁絕姐…？係咪啊…？』
『……哈。』家豪搖搖頭，忽然詭異地笑了笑：『哈…』
『家豪…？』依雯從地上拾起雨傘，走近家豪說：『做咩啊…？我地唔好再講佢啦好嘛…？』
『估唔到…』家豪自顧自的喃喃道：『係你眼中…我竟然比唔上佢。』
『唔係啊！』依雯澄清道：『我邊有…』
『如果你無，』家豪心灰意冷地看著依雯：『你又點會連我一個小小要求都拒絕？』
『點解你要打橫黎講架姐…！』依雯力竭聲嘶的道：『我都話左同佢無野架咯…！！』
『好，咁我問你最後一個問題。』
家豪用堅定不移的眼神，默默凝視著依雯的雙眸。
『咩問題…』
『我同佢之間。』家豪迫不得已，只能威脅著依雯作出選擇：『你會揀邊個。』
『…………』依雯的淚水包含著了眼，言不由衷地說：『點解要咁…？』
『答我。』家豪沒有退讓。
唦——唦————
大雨的聲音和二人的吵鬧共譜成一篇錐心泣血的樂章；
家豪發出最後最後的一個問題後，倆人便一語不發的站在路中心。
大街上的路中心有一個分岔路口，就像依雯的內心一樣…正要為往後的道路作出抉擇。
但依雯這一刻…根本不想作出任何決定，甚至…連要作出決定的理由都沒有。
為什麼要在朋友與愛人之間選擇？
男和女…知己之間真的沒有純粹的友情嗎？
假如你愛她…為什麼要迫她做一些她不想做的決定？
真的要全世界都屬於你…你才會滿意嗎？
一切一切的問題，都縈繞著依雯的內心深坎處。
但面對著眼前的人…依雯卻不敢把問題坦誠的說出來。
現在的依雯，只能用含著淚的眼神…與家豪相互凝視著，希望用這一個方式…令到家豪的態度可以軟化下來，喚醒那個凡事遷就自己的男朋友…
要作朋友與愛人的抉擇，真的…很痛苦。
另一邊廂的家豪，從依雯的眼神中…以及她那久久不發話的態度…
心中…已經有數。
『阿蚊。』家豪歎了一口氣，臉上掛著一副心灰意冷的表情。
『嗯…？』
『你已經唔需要回答我。』
『家豪……』
『或者，我地一開始已經係錯。』家豪說。
『我真係唔想……』依雯支支吾吾的道：『唔想掉低朋友…』
『我明白。』家豪忽然轉身，逕自走在滂沱的大雨中。
『家豪…！你去邊啊…！』依雯提著傘，在大雨中叫嚷。
家豪冒著大雨，轉身回望著依雯。
『起初我以為同你告白，你做左我女朋友之後，我就可以保護到你，可以令你離開會傷害你既人。』
『家豪…？』
『但原來我咁諗係錯。』家豪苦笑地搖頭：『我咁做根本…無用…』
『你意思…？』依雯欲言又止：『係因為想任天衡離開我…先同我一齊…？』
『我當然愛你。』家豪如實的作答：『但我更喜歡留係你身邊守護你，至少，你同我都唔會有壓力。』
『咁…點解呀…！』依雯哭成淚人的說：『點解你要同我係埋一齊…？點解你要係果日同大家講喎…！？』
『因為…』家豪微笑了一下，看著依雯：『我唔想比人傷害你。』
『…………』
『要名正言順咁保護你，』家豪續道：『就只能做你男朋友。』
『我唔明…我唔明呀…！！』依雯放聲大哭著。
『你唔需要明白。』家豪沒有表情地看著依雯：『因為…我已經無資格保護你。』
『唔好…家豪…唔好啊…！！』依雯不斷苦苦地哀求著。
『阿蚊。』
『唔好…！』依雯掩著嘴，不願面對的搖頭。
『我地…都係分手。』