【苦】《英雄聯盟》 - 一件次世代既愛情工具: 【苦篇】 - 《孤寂－樂群》

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊


咯咯————

一名女生正站在房間外敲著門。

「Cacilla？」女生把耳朵貼近木門說：「你食唔食野啊？你食的話…我出downtown買埋比你呀。」

女生呆等了良久，房內始終沒有任何回音。



咯咯咯———

「Cacilla？？」女生皺著眉大力的拍門，內心焦急起來：「Hey！are you okay！？」

咔——

木門的門柄緩緩轉動向下。

咔嚓———



「Ca…」女生膽顫心驚地仔細看著門後的人：「Cacilla…你無野嘛…？」

『嗯……』詩娜沒精打采地搖頭：『我……我無事…』

「你個樣點似無事啊！」女生推開門後扶著詩娜：「你匿埋左係房度幾日架啦…！你okay嘛…？」

『無…』




詩娜臉色相當憔悴，平日黝黑柔順的秀髮都變得披梳起上來，而且雙眼滿佈紅筋，以往白皙紅潤的皮膚如今更顯慘白，面無半點血色。

「唉！」女生把詩娜扶至床上，側首一看：「Cacilla你呢幾日就係度打機玩電腦…！？」

『我…』詩娜沒有聽進耳朵，只是支吾的說著：『我無事…』

「你已經兩日無返學啦…」女生擔憂著：「再係咁落去你attendance會唔夠…畢唔到業架！」

詩娜雙目空洞，只是不斷的重複著一句：『我無事…』

「……到底發生左咩事呀…？」女生坐在詩娜的身旁問道。

詩娜的雙眼看著女生，淚停在眼眶靈動著：『點解…佢…唔搵返我…？』

「邊…邊個佢？」女生追問道。



詩娜沒有回應，只是靜靜的躺在床上閉上雙眼：『我想…休息…一下…』

「呃……咁…咁Cacilla你訓一陣先啦…」女生站起來：「我去買啲野比你食，你兩日無食過野架啦！」


女生替詩娜蓋上被舖，畢竟，詩娜已經把自己關在房裡幾日，若不做好保暖的措施，身子虛弱的詩娜很容易就會病倒。更何況她還沒習慣英國的氣候。

然而，女生在臨離開詩娜的房前，橫了一眼留意到詩娜終日沈迷的電腦…

於是女生便怕詩娜會偷偷起來繼續沈迷，所以女生便把電腦的網線拔掉收起。


「Cacilla你休息下喇…我好快返黎～！」





＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊


另一邊廂





『行快啲啦！』依雯一馬當先咁行係我前面，蹙眉生氣著說：『就黎遲到啦～～！』

「嘎…嘎……」我跑到上氣唔接下氣：「遲到…？咩遲到啊…我地而家去緊邊？」





時間已去到傍晚，天色亦已漸漸入黑，街道上滿佈同我一樣剛下班既打工仔。

我同逸朗冰釋前嫌後便同依雯一同離開公司，仲記得…依雯係朝早同我講過，

因為我本身既朋友可謂少之有少，雖然逸朗仍然都係我兄弟，但萬一佢唔得閒，就再無朋友可以同我傾訴。

於是，依雯就拍哂心口咁話帶我去識多啲朋友，我估依雯咁樣做…

係希望我可以除左詩娜之外，仲可以擁有自己既圈子。

因為若果我既世界只係得詩娜一個的話，恐怕我會失控，不自覺地做更多衝動既事去傷害呢段關係。

女朋友故然重要，但各方面保持到平衡，先係一段感情長久既要訣。




『一陣你咪知囉！成日問問問～！』依雯眼超超咁望住我。

「但……」

[咕嚕嚕———]迴迴的聲浪從我肚子發出。

「我有啲肚餓……」畢竟，我下午只掛住補眠，唔係食左好多野落肚。

『嘖～！』依雯皺起眉頭，佯怒道：『所以我咪叫你行快啲囉！去到就有野食啦！』

「咁…咁好！？」我雙眼中回復神采。

聽到有野食後，我憑住人類既本能將自己既身體機能推至極限。

儘管我已經好攰，但飢餓既感覺卻令到我雙腳充滿動力。


「喂喂，」我快步走上前，在轉角位問道：「之後行邊？！」

『哼…你丫！』依雯亦追上前道：『左邊呀，你睇下第三間個招牌…見唔見到隻鹿頭掛住係門口～？』

「左邊！」


我就好似一隻已經餓左十日既猛獸一樣，憑住自己既嗅覺本能一直奔跑，就連依雯都跟唔上我腳步咁制。

一邊跑既時候，我就一邊聞到一陣食物既香氣。

望一望屹立係街道上既路牌，原來，我同依雯已經從馬鞍山去到尖沙咀既赫德道上。

我沿住果陣安格斯牛扒既香氣一直追尋，終於，都比我見到依雯所講既店舖。


原來依雯想帶我去既，係一間清吧。

清吧同夜店唔同，無嘈吵既音樂，無衣著性感既女仔；有既…只係一眾忙碌完一整天，打算輕談淺唱不夜天既打工仔。

酒吧既裝潢簡單，主要用上復古木製牆身，店內樓底頗高且廳心懸垂住數把古式古香既風扇，令人感覺一體成形，仿如置身於歐洲既傍晚一樣悠閒。

酒吧入面既燈光昏暗，大大小小佈置左十幾張既小圓餐檯，而且高朋滿座，一個個身穿西裝、或是輕便衣服既上班一族都係度摸住酒杯底，一邊傾計，一邊消愁減壓。


『喂…咳…你洗唔洗跑得咁快啊頂你！』依雯喘著氣地追上來。

「哈哈…」我回復精神，笑說：「無計啦…肚餓丫嘛……」

『唓！』依雯不忿道：『返工做野果時又唔見你咁快手！』


我望住酒吧門外既招牌，問道：「就係呢度喇？」

『係啊，』依雯拍了我一下：『入去啦。』


正當我準備跟上依雯腳步時，便發覺店內有兩名男生正步出來。

呢兩個男人笑笑口咁望住依雯行出黎，唔洗問都知…應該係依雯既朋友。


『家豪～～』依雯看見較高大的男生便雀躍道：『遲左少少～～Sorry啊～』

『哦，而家淨係叫家豪得架啦～？』另一名男生矯揉造作地撓著雙手：『唉，有異性無人性喇家下。』

『哎呀Samsam～～』依雯籍意走近，撓著Sam的手：『人地又點會唔記得你喎～好姊妹～』

驟眼看去Sam雖然係一個男人，但佢既身材唔算高，打扮亦十分中性且色彩奪目，加上果副鮮黃眼鏡…雖然係幾潮，但比我一種乸型…即係hehe既感覺。

『扮乖啦你。』Sam回應道。

『係呢～？』依雯親切的說著：『你地做咩出黎既？要走喇咩？』

『梗係唔係～』Sam嬌聲嬌氣的說：『同家豪出黎食支煙之嘛，搶左你既家豪，你唔會介意掛？』

佢地二人既視線停留係果個叫家豪既男人身上…

我仔細咁睇真啲，果個家豪除左高大之外，身材亦十分強壯…睇得出係有練開肌肉果種人黎。

而且，佢染有一頭啡色既短髮，更留有整齊既鬍鬚，除左man之外…我都諗唔到咩字去形容佢，而且…連我係男人都覺得佢幾靚仔。

利申：非hehe。

『喂Sam…』家豪尷尬地說：『咪亂講。』

『唓～！』依雯淘氣地說著：『你要咪比你囉～唔稀罕喎。』

『哈哈～阿蚊你丫…』Sam笑了一下後，便看見在依雯數個身位後的我：『咦…阿蚊…你帶左朋友黎咩？』

『嗯～？』依雯言笑間回過頭來，彷彿忘記了我的存在：『呀係喎～！』

「你…你地好…」我表現得靦腆地說道。

『妖，婆婆媽媽咁，』依雯一手便將我拉到她身旁，介紹道：『呢個係我新朋友，佢呢就岩岩失戀，又成日係度喊苦喊忽喎！咪帶佢黎識下朋友囉。』

「失戀…？」我低聲地問依雯。

『扮住先啦……！』依雯吱聲細語地回答。


此時眼前既阿Sam展露著淫笑：『失戀呀～唔洗怕喎～呢度大把朋友～！』

『Samsam啊！』依雯對著他說：『好心你就咪搞人啦～！』

『唉～講下之嘛。』Sam笑說。


但企係我地前面既另一人…家豪，我留意到佢臉上所流露既表情…卻唔係咁友善。


『你好。我叫家豪，』家豪問說望住我伸出手說：『都係依雯既朋友，我地之前見過一次面。』

「依…雯…？」我不為所意地望住依雯。

『唔……？』依雯好奇地望住家豪，卻不發一語地流露著茫然的表情。


「同埋…」我想了想後說：「我地之前見過面架咩…？」

『係啊。』依雯回過神來：『琴晚就係佢幫我抬你返黎架啦。』

『嗯。』家豪打斷了我的思緒：『咁你點稱呼？』

「你…你好…」我戰戰兢兢地握著他雙手：「我叫…任天衡…叫我衡仔就得…」


係我接觸家豪雙手一剎間，唔知點解，我有一種龐大既壓力充斥係我內心入面。

而且，雖然家豪臉上係微笑住咁同我打招呼，但…我卻從佢手中感受到一股若隱若現既敵意。

係我諗多左…定係……？

我唔知，我只知同佢接觸既呢一刻，空氣就好似跌到落冰點一樣凝結起來。


『喂喂喂～～』身旁的Sam忽然將手搭在我們之上：『而家叫你地玩拗手瓜咩～握咁耐～！』

『係囉，』依雯從茫然中醒了過來：『你地唔係去食煙咩？快啲去啦。』

『係喎可～？』Sam向著身旁的家豪說道：『一陣仲要睇你地表演喎，行喇。』

『嗯。』家豪冷淡的回應後，向著我微笑說：『衡仔，轉頭記得睇我地既演出。』

「哦…好…」我尷尬地禮貌說：「一陣見。」


Sam同家豪行出左酒吧去食煙後，我就同依雯入去酒吧，搵左一個高腳圓檯既位置坐低。

『喂，』依雯坐在椅上用手掙撞一撞我：『頭先我啲朋友冇嚇親你丫嘛。』

「頭先…？」我苦笑地說：「冇…」

『哈，佢地係咁奇奇怪怪架。』依雯又說：『你好快就慣架啦。』

「嗯……」我不好意思的說：「係呢…點解頭先家豪會叫你———」


就在此時。


『喂～』忽然又傳來一把男聲：『阿蚊，終於到喇～？』

『嗨！』依雯熱情地對著他說：『老闆～～好掛住你啲薯條啊～』

『傻女，你隨時黎都有得食架。』外表壯碩的老闆一臉慈祥地說：『最驚你好似琴晚咁…唔黎咋。』

『對唔住啦老闆～咁～～我就照舊啦。』依雯食指點著嘴唇，回望著我：『喂，你食咩？』

「我……」我四周打量了一下：「有冇Menu…？」

『妖～！』依雯一臉不屑，自把自為道：『婆婆媽媽咁，老闆比多份我既order佢啦！』

『收到收到。』老闆拿著簿在手中寫著：『咁飲咩？』

『Apple cider～』依雯好似返左屋企一樣自然。

「我…」我隨口說道：「青島得喇…」

聽講，男人識飲一定飲青島，飲完更可看透世事。(好似係)

『…………』

係我講完青島後，依雯同老闆都用奇異既目光望住我。

『唔……老闆你唔洗理佢講下笑架咋！』依雯打破冷場地說：『比杯Stella佢得喇。』

『好既。』老闆爽快地轉身：『好快到，請稍等。』

老闆轉身離去後，依雯便拍一拍我。

『喂，你坐係度等我一陣。』


語畢，依雯便不發一語地逕自離去，走到遠處酒吧的後台，同佢準備演出既樂隊成員打招呼。

而我，就只能好似一個第一日返學既學生咁，坐係度獨自自閉。

唯一可以做既…只係玩下電話，去舒緩果種尷尬既情緒。


其實我本身雖然好鍾意同異性接觸，但只限於單獨兩個人既時候。

假如有其他陌生人在場，我就多數一句起兩句止，甚至可能比到人一種怕醜仔既感覺。


起初，我以為依雯同我一樣都係呢種人；因為佢返工既時候…都係好似我咁沈默寡言。

但我望住佢……好開心咁同人傾計，有講有笑，郁手郁腳，攬頭攬頸個樣…

我先發覺…原來依雯都有開朗既另一面。


望住依雯咁受歡迎既呢個樣…無論係男定女，甚至係好似Sam咁既中性都好，

依雯都可以同佢地打成一片，氣氛仲相當融洽…不知不覺間…唔知點解，

我心底忽然有種羨慕依雯既感覺出現。


好想受到大家歡迎，好想有咁多朋友打成一片…

有自己既圈子，有自己既朋友…

回想起琴晚過去既自己，我不禁搖頭苦笑…

我到而家先發覺自己係幾咁傻，如果唔係依雯帶我黎呢度…

我都唔知原來呢個世界除左愛情之外…仲會有其他美好既事物。

而家我希望我既世界…


唔會再只得詩娜一個。