【苦】《英雄聯盟》 - 一件次世代既愛情工具: 《醒覺 - 下》 酸篇終

咔———

咔嚓———

『喂～』

我的雙眼被泡沫掩蓋，彷彿聽到門外有聲音後便放眼看去。

「喂…！」我立即用浴簾遮住身體：「你仲咩無啦啦入黎架！」



『唓，大驚小怪～』依雯不屑地看了我一眼：『怕咩姐你～？又唔係未見過。』

「但…你…你入黎做咩呀！」我尷尬得臉上泛起紅暈來。

『入黎～？』依雯伸出手：『阿爸話拎衫比你換嘛。』

「放低得啦！」我焦急地說：「唔該哂你喇…！」

『呵呵～』依雯將一套衣服放下後：『咦～？估唔到你個＂小衡＂…都幾精神架喎～』



「出…出去！！」

嘭———

依雯離去後，我便低頭一看…

原來…唔知係因為太耐無扑野，定係暖水太舒服，定抑或頭先係我全身赤裸時見到依雯既出現，我發覺我下面不自覺地充血而腫脹起來。

因為扯左旗，搞到連用來遮掩身體既浴簾都被肉棒撐左起來。



我唔知依雯頭先入左黎幾耐，唔知佢仲見到啲乜野，我淨係知…

我被佢搞到尷尬到極點！！


『哦？出黎喇？』坐在客廳的經理向我發話。

「早晨…uncle…早晨…Auntie…」我萬分尷尬地說。

『哎呀～早晨～～』經理旁的姨姨親切的向我說：『你叫衡仔係咪？快啲過黎食早餐比下意見姨姨呀。』

「哦…好……」我戰戰兢兢地走近。

『唓～來來去去都係咁既味架啦。』依雯把麵包咬在嘴中：『我返學啦。』



『呢個女…』auntie歎氣道：『真係無禮貌架！』

『你生出黎架嘛。』經理毫不留面子。

『哦！』auntie回敬著：『而家咁講即係個女你無份既！？』

『關我屁事！』經理放下手中的報紙：『有爺生就要有乸教架啦！你唔好好教佢，搞到佢群埋哂啲唔知咩人，成日躝街唔返屋企！』

經理講到一半忽然望住我：『阿衡，你話係咪喇！』

「Errrr……」我完全唔知點答。

『你講咩呀！』auntie立即反擊：『而家個女咪乖乖返學囉！有衡仔係度個女就唔會成日周圍去架啦！衡仔實睇住佢架，你擔心啲咩姐！衡仔，可？』

「呢層呢……」我完全不知所措。



『你個……！』

經理講到一半之時。

「兩位！」我立即大聲叫停，然後從桌上拿起兩塊麵包夾著火腿：「我去睇住依雯先！轉頭我會返公司架喇經理！」

『衡仔你唔慢慢食埋先？？』

「唔喇，多謝auntie你琴晚碗薑茶！」我打開大門：「我返工先喇…經理一陣見！」

『哦…哦，好。』


咔—



咔嚓———

嘭———

逃離現場後，我終於倚著木門，然後慢慢鬆一口氣。

「呼……」

好彩我走得快，如果唔係佢地一直鬧落去…恐怕真係世界大戰都似。

不過…我回想起…其實…咁樣都幾溫馨呀，如果有一日我同詩娜都可以咁…

一定會好幸福…好美滿……



試諗下呀，如果可以同自己鍾意既人組織一個家庭，生返一兩個仔女，

每日有份穩定既職業，然後每日放工…返到屋企就有老婆既靚湯等侯著自己。

得閒，又可以陪下仔女，傾下計，一家樂也融融…人生…仲夫復何求？


每朝早即使係好似依雯父母咁…鬥下嘴，但唔傷感情，每日可以係呢種既搞笑又溫馨既氣氛下開始一天既工作。

我諗…呢種就係我最期望既生活。


離開左依雯屋企，當我準備去撳lift時。

『哈哈！』依雯見到我個樣後，就忍唔住掩著個肚大笑起來：『做咩咁急走出黎呀～？唔食埋個早餐先～？』

「你……」

頭先我尷尬地望住經理兩夫妻，無留意到…係我沖涼既時候，依雯早已係廁所梳洗完，更換上左一套淺藍白色既校服，同將及肩既頭髮放下。

而且，依雯同好多女學生一樣，都會故意將條裙攝上而縮短兩寸，令到一雙白嫩無瑕既修長美腿表露無遺。

再加上依雯果對繫有蝴蝶結既平底鞋…令到我有股想再次投入校園懷抱既衝動。

『望夠未呀你！』依雯一句像利劍般襲來。

「無……」我支吾地說著：「未見過你呢個打扮嘛……都幾好睇呀…」

其實非常吸引…因為我對校服有股不能抗拒既癖好。


『妖，』依雯粗枝大葉地拍了我一下：『行啦，有lift喇。』

「哦…」

未幾，我同依雯終於落到樓下。

打量一下四周先發覺，原來依雯一家都係住係我平時返工既附近。

難怪經理每日都可以準時返工，永遠都唔遲到啦。

我拎住裝有自己衫既袋，跟住依雯行到去巴士站前。


『喂，』依雯回頭看著我：『咁我放學黎搵你啦。』

「哦…哦……」我仍像未訓醒般。

『妖！』依雯拎住個側揹袋打在我身上：『訓醒未呀你！』

「醒…！醒喇…」

『你真係…』依雯臨上車前歎了一口氣：『一陣返工記得唔好恰眼訓呀！唔係我就——』

「打死我丫嘛…」我打斷了她：「知喇長氣…」

『妖！死啦你。』

說罷，依雯就獨自登上巴士，上到車後她更係車窗旁邊凶神惡剎地瞪了我一眼。

我苦笑了一下後，便慢慢沿住馬路行，準備返公司開工。


唔知係咪依雯媽媽既薑茶有效呢？

平日我飲兩杯酒第二日都會hangover，而我今日…竟然無頭痛，反而…仲好似幾精神咁。


「大家早晨。」


不消一會我就返到去超市，幾名早到既阿嬸員工早已各就其位，等待經理返黎開門。

『衡仔～』一名上左年紀既阿姐說：『睇你精神左好多咁啊。』

「係咩？」我風趣地說：「不嬲都咁精神架啦～！」

『因為女朋友仔呢？』阿姐繼續問。

「女朋友…」


唔知點解，我腦海中第一張浮現既臉孔唔係詩娜…而係……


『早晨。』經理在後方向大家說道。

『早晨經理！』眾人異口同聲。

『衡仔，』經理一本正經，同早上判若兩人地看著我，嚴肅道：『你今日負責點貨同落貨。』

「係…」我抖擻起精神：「知道經理！」


經理同平時一樣咁嚴肅，簡直就好似琴晚既事無發生過一樣。

於是，我都打醒精神迎接一日下來既工作。

經理安排比我既工作，基本上全部都係主任級別做既野，除左點貨，落貨之外，更要同超市既貨倉落order，要求翌日既貨源，以維持一日既正常運作。

雖然做超市好似無咩前途咁，但勝在夠穩定，而且…假設做到分區經理級，管十幾間店鋪既時候，月入同政府既高級行政人員差唔多。

你一生人可能未必需要請律師，未必需要買名牌，未必需要買樓；但，你必定需要去超市購買日常生活用品。

所以，我好相信有一句說話叫行行出狀元，即使我由低做起，只要我努力，一樣可以做到成功既人。


「呢度簽名係咪？」我擺出一副專業的樣子。

『係，』送貨的倉務員指了指：『呢度簽個名就無問題。』

「好，」我揮動筆尖幾下快速地簽名確認：「唔該師兄。」


由開鋪，工作到下午，食飯既時候小睡左一陣後，發覺…開始黎料。

基於琴日唔夠訓，令到我下午開始出現頭昏腦漲既情況。

只要重複地執拾貨架，眼皮就好似有千斤重擔般不停閉上…


但，每當閉上雙眼時…我都會彷彿聽到詩娜既聲音一樣……


係…

冇錯…！

我就算唔為自己，都要為詩娜而努力！

如果…我可以重新振作，詩娜見到都會感到開心…！

詩娜想要既，並唔係一個咁無用既任天衡！


「醒啊！！」我忽然大叫著，替自己打氣：「任天衡捱埋佢呀！！！！！！」


突然間，四方八面既人無一不望住我。


「Sorry…唔好意思…」我尷尬地道歉。


經過左一日既辛勞，終於…終於都到左下午六點收工既時候。

當我係超市既倉換衫，準備收工離去時。

咔——

『阿衡，』經理打開門，走進來說：『下星期你去上Training，有冇問題？』

「Training…？」我好奇地問：「咩Training？」

『關於一啲行政既事，』經理續道：『你係時候學下。』

「行政…」我疲倦的眼神中展露神采：「多謝經理……！我一定會努力！」

『唔好咁開心住。』經理接著說：『到最後有個考驗，過到你先可以升，明白未。』

「明白！！」

我由衷地致謝後，經理就好似老懷安慰咁笑了笑離去。

呢個時候我心想，終於…終於我都可以升職喇！

雖然我真係攰到抽筋，但我得到呢個消息後，第一時間想同詩娜分享…！

如果詩娜知道左…我知道…佢一定會替我開心。


雖然可能無咩機會，但我收左工後都一如以往地致電比詩娜。


嘟———咔—

『你已被接駁到……』

「唉…」


開心過後，卻係殘酷既現實。

不過…我無氣餒，更無心灰意冷，因為經過依雯既一番開解後，我知道自己唔可以再係咁。

唔可以再咁易灰心，唔可以再咁頹廢。

然後，我便重新振作起來，帶住準備升職既興奮心情換好便服後走出舖面準備離去。


係我走到超市的門口前面時…便見到一個依偎著牆邊既身影。

呀，唔講都唔記得…原來今朝約左佢。


「嗨，」我揮了揮手：「做咩換左衫…戴哂cap帽…又扮成男仔咁既？」

『廢話，返左屋企換衫嘛！』依雯板著臉：『搞乜鬼咁遲架你！等左你成半粒鐘囉唔該！』

「哈，你聽我解釋先啦，」我難掩興奮地說著：「今日經理佢———」


當我雀躍地對住依雯報喜時，我望見依雯既右後方，有一個熟悉既身影，正企係吸煙區度偷偷摸摸咁望過黎。

『阿爸佢講咩？』依雯追問。

「等等…」我語調一轉：「依雯你等我一陣…我有啲事要去做。」

依雯此刻沒有抗拒我這樣叫她，反而好奇地望著我：『咩事？』


我頭也不回地說：「一件你同我講，我應該去做既事。」


拋下一句後，我就默默地走到該處的吸煙區，向住果個熟悉既人行去。

剎那間，我知道自己無任何猶豫，無任何籍口，更無任何退縮既餘地。


有既，只係道歉既勇氣。


「逸朗。」我打破冷場地說道。

『衡仔……』逸朗立即苦苦解釋：『我今日黎搵你…係想你聽我講———』

「唔係。」我打斷了他。

『下…？』逸朗不為所意地望住我。

「應該…」我深呼吸了一下：「應該係你聽我講。」

『你…想講咩…？』逸朗目露擔憂的感覺。


「對…」我鼓起勇氣：「對唔住！！」


『衡仔…』


我低下頭，閉著眼，一鼓作氣咁將自己鬱左係個心度成晚既說話講左出黎。


「逸朗，我琴晚咁諗你…同出手…真係…真係好對唔住！」

『衡仔…』逸朗搖頭笑著：『傻啦，我都無怪你。』

我抬起頭來：「真…真係既！？」

『因為我明白你呀。』逸朗解釋：『有邊個未試過為女而發嬲先得架？』

「但…」我心底仍滿是內疚，說道：「我真係錯得好緊要…我更加唔應該出手……」

『唉，』逸朗歎了一口氣：『講錯，我都有唔岩既，我唔應該未問你就擅自去同你愛既人講野…令到你誤會…我都有責任。』


終於，我到呢一刻先至明白，兄弟呢兩個字究竟有咩意思。


「咁…我地仲係好兄弟嘛？」我伸出手，握成拳。

逸朗沒有回答，只是冷笑了一下，吐了一口白霧，然後五指成拳，同我碰撞了一下。


「多謝你。」

『屌你啦……』逸朗竊笑著：『一場兄弟，講呢啲架咩？』


終於，我同逸朗都和好如初。

原來「道歉」都唔係一件咁可怕既事。

可怕既…係男人本身既面子，同埋…勇於去承擔果份勇氣。

如果當日我有呢份勇氣，坦白咁去同詩娜承認錯誤…或者…就唔會搞出咁多不快既事。


『不過話時話，』逸朗看著超市的大門：『你係咪約左人？』

「約左人？」我沿著逸朗的視野看去：「呃……係…」

『哦，果個邊個黎既？』逸朗追問道。

「無……」我隨口說了個籍口：「啲代練既客黎姐。」

『哦。』逸朗扔掉煙蒂，說道：『喂，咁我走先喇，電聯啦！』

「哦…好……」

好彩依雯落超市等我時換左套男仔衫，如果唔係比逸朗見到佢…又有排煩。

我準備轉身之際，突然想起。


「係呢…」我望住逸朗擔憂的問：「璇璇…佢點…？」

『璇璇佢呀？』逸朗苦笑了一下：『唔好提喇…佢果晚仲嬲過你呀！』

「嬲我…？」

『梗係啦！』逸朗續道：『你走左之後佢喊到九彩咁，好彩佢醉左咋，如果唔係佢真係飲到死呀！』

「呃………」

『一場兄弟，』逸朗建議道：『我勸你呢排都係唔好搵佢啦，等件事淡左，我再幫你講幾句好說話先啦。』

「好…唔該哂你……」

『記住呀兄弟，』逸朗經驗老到的說：『一個人愛你既心愈大，恨你既心同樣愈大。』

「你意思係……」我一頭霧水地追問。

『唔好得罪女人，就係咁簡單。』

「嗯……」

『走先，拜。』


逸朗離去後，我仍呆呆的站在原地。

腦海中…不斷迴響起逸朗同我講既一句說話。


「一個人愛我既心愈大，恨我既心同樣愈大……？」


呢句說話…到底係咩意思…

係我心目中直覺間只有一個答案。

如果連璇璇都可以嬲我嬲成咁既話…換轉詩娜又會恨我到咩地步…？

不過回想起依雯既一番勸告，我就想起即使我點樣諗都係無補於事；

與其杞人憂天咁諗埋一邊鑽牛角尖，倒不如先做好自己，等可以去挽救時再把握機會更好。

我已經重新振作去踏出第一步，好快…我同詩娜就可以回到昔日既時光。

至少…我仍一直相信。

只要尚存有愛，無論時間要幾耐、機會有幾渺茫…

我都願意去等。

等一日可以重聚，等一日可以實現承諾。


『行得未呀？』依雯走過來，脫下帽子便說道。


「嗯，出發。」