【苦】《英雄聯盟》 - 一件次世代既愛情工具: 《投影》

『咦。』忽然背後傳來一把陰陽怪氣的聲音：『阿蚊呢～？』

我擰過頭來，發現阿Sam同家豪既身影：「佢…去左果邊……」

『哦哦～』阿Sam點點頭：『係呢，你食左野未啊？呢度啲野幾好食架喎。』

「岩岩叫左喇…」我尷尬地說道：「唔該…」

『唔該？』阿Sam一頭霧水地望住我：『哈哈～～你叫衡仔係咪？估唔到你都幾怕醜架喎～』



頂！無啦啦做咩我會講唔該？

我諗…應該係我面對陌生人太緊張，又想禮貌地回應人…先會咁九唔搭八。

唉，呢一刻我心諗依雯快啲返黎救我啦屌。


『Sam，唔好玩人啦。』家豪隨即開口道：『冇嚇親你嘛。』

不知為何，家豪竟說著依雯剛才的對白。



「無……」


就係呢個時候，身旁有一個黑影隨即到來。

『兩個阿蚊Special Set Dinner。』老闆雙手捧著兩個餐盤放下道：『呢份你既……咦，阿蚊呢？』

我指著遠方：「佢係果度……」



整間酒吧就好似圍繞住依雯一樣，唔係…簡直好似依雯就係呢間店既靈魂咁。

每一個人都搵佢，每一個人都想同佢傾計……

未幾，老闆便把依雯叫了回來。


『嘩～～好野！』依雯活蹦亂跳地坐上圓椅：『有野食～～』

『慢慢食喇，』家豪關心著說道：『不過就開場。』

『下～～？』

依雯聽到家豪一番說話後，便開始狼吞虎嚥起上來。



我望住依雯左手拿著漢堡咬一啖，右手拎住薯條隊一條；簡直完全唔顧女仔應有既儀態。

但我望見佢食野個樣，唔知點解…我個肚雖然好餓，但視線仍停在她身上。


『唔？？』依雯食到嘴角沾滿茄汁，邊咀嚼邊道：『做咩啊你？仲唔食？』

語畢，她又用叉子將我碟上既香腸拎走。

「呀…我食……」

不知為何，我平時係陌生人面前一定會保持禮貌；

但可能因為我今日太肚餓喇，依雯叫完我後，我就同佢一樣咁開始鯨吞檯上面既食物。



我將漢堡放入口中：「…好味喎…！」

『係呢～～！』依雯滿足地點著頭：『加多啲茄汁同芥辣仲好味啊～～』

「下？」我好奇地望住依雯做一次後，便跟住佢加上調味：「真係喎…！」

『嘻！梗係啦～！識食一定咁食！』依雯沾沾自喜的道。

『嘖嘖嘖…哎，慢慢食啦你地…』阿Sam苦口婆心地說：『蚊蚊你睇下你…食到幾無儀態先得架！？』

『超～！你估我係你咩！』依雯表現得比Sam更像漢子，嘲諷道：『食野梗係大啖大啖先好味架嘛！』

『唉，你由佢啦。』家豪拍了拍Sam的肩膀：『咁先係我地識既阿蚊嘛。』

『嘻嘻。』依雯得戚得像小孩說：『都係家豪最了解我啊～』



往後，我地既用膳氣氛就係一片和諧中渡過。

明明依雯未返黎之前，氣氛都有點尷尬…

但佢一返黎後，整個氣氛就變得和諧起上來，或者…呢種就係依雯既魅力…？


另外，我見到依雯望住家豪既眼神中…就好似有一種超越友情既感覺存在。

我估…琴晚依雯所講；話有人幫佢從失戀既痛苦中拯救過來既呢個人…

就係家豪。




『最後一啖！』依雯把口將得斗大，咬下後便看著我說：『搞掂！喂，乜你咁慢架！』

『蚊，』家豪開聲道：『你唔好迫佢喇，佢又唔洗表演，慢慢食都要你管咩？』

『超…』依雯像小朋友般不爽：『咁係丫嘛…我都食哂佢仲食到一半！』

「唔…唔唔唔…」我把食物塞滿在嘴中：「好努力架喇我………！」


就係我地閒談既時候，四周既人忽然開始離開本身既座位，酒吧店員更開始將檯凳搬運起來。

本來酒吧既格局都被餐桌同客人佔滿，但經店員整理完後，

酒吧的中心立即騰出了一大片空曠的位置，檯凳都放到牆附近整齊泊好。

而我地四人亦都移到一角，除了我以外既人，都望住酒吧中央的位置。


『差唔多喇，蚊。』家豪望住依雯道：『你準備好未？』

『嗯嗯！』依雯大口大口的吞下啤酒：『嘎～！充滿力量啦，隨時OK！』

『嗯，』家豪轉過頭來，望住我同Sam：『咁我地去後台準備先。』

『Okay～！』阿Sam打著氣，舉起姆指說：『Good show！』

『嘻。』


依雯莞爾而笑了一下後，便和家豪雙雙離去，走到後台準備。

我望住佢地二人既背影，就好似一對天造地切既情侶一樣羨慕。

家豪外表健朗，性格陽光親切，平易近人，比到人一種成熟穩重，而且可靠，值得信任既感覺。

相反，依雯係其他人面前就好似一個大家姐咁，性格粗線條且率直，又唔會好似普通港女咁造作，但依雯係家豪面前…卻有一種惹人保護既小鳥依人感覺。

我諗…若非依雯曾經歷一段痛苦既愛情，早已同家豪開始…

回想起自己同詩娜……同樣…明明都係互相愛著對方既一對，但又卻因種種既理由…而唔能夠係埋一齊。

點解，點解上天咁殘忍…咁忍心？


『咳咳……』


忽然，四周的燈光開始昏暗起來，只集中在酒吧中央位置，同時，亦傳來老闆的聲音。

『試咪試咪one two…』外表發福的老闆試了幾下咪後：『喂，巴打們食飽未先？』

『飽～！！』眾人異口同音地回應著。

『食飽就好啦，』老闆開了開玩笑：『咁未飲醉丫嘛？』

氣氛被老闆所帶動，眾人大笑起來。

『如果你醉左就可惜喇，』老闆懶神秘地說：『事關今晚我地有阿蚊in the house！相信大家都為左呢一刻等左好耐啦係咪！！』

『係！！』男觀眾熱烈地回應。

『好！咁事不宜遲，』老闆邊退後邊介紹著：『我地有請最受歡迎既Band———K's！』

『Wo～～』觀眾的叫囂聲，歡呼聲此起彼落。

啪啪啪啪————掌聲如雷般響遍四周，酒吧中央的舞台亦漸漸露出數個身影。


『嗨嗨～大家好～！』依雯站在舞台上，親切地笑說：『今晚送比大家既第一首歌～係周柏豪既——「傳聞」，希望大家鍾意～』


眾人都把視線集中在依雯身上，包括我。

我坐係觀眾席睇住依雯既一身打扮，除左換上牛仔熱褲，同小背心外…

更大分別既…係依雯站在台上果股氣勢。


家豪站在依雯身後，彈著結他，一陣熟悉的前奏徐徐響起。

依雯卻站得筆直，閉著雙眼醞釀情緒；依雯本來一臉輕鬆的神情…亦慢慢開始凝重起來。

就好似將自己投入左係歌詞一樣…經歷一段虐心的愛情般凝重。


［這些年來 曾經多次跌落地牢仍然等待…］
［這些年來 和抑鬱與狂燥對話依然忍耐…］


呢把聲…

［為了要抱你抱到最後 用我的體恤體諒補救］
［得到是你無情 冷笑 鬆開我手……］

我認得呢把聲…