【苦】《英雄聯盟》 - 一件次世代既愛情工具: 《告白》
三日後。
「經理…我打卡走先…」
『嗯？』經理坐在電腦椅上，轉過來望望手錶：『得啦，下次爽啲手咪唔洗OT囉。』
「……咁我入倉先…」
『走啦，早啲返去休息啊！聽日返早仲要你學落貨簽單，咪唔夠精神呀！』
經理向我訓示完一番後，我便拖住疲憊既身軀，腳步浮浮地向住倉既位置走去。
呢幾日以黎，我除左工作之外…就幾乎咩都無心機去做。
無心情打機…無心情接JOB…就連講野…都無動力去開口。
同詩娜失去聯絡既呢幾日，我就好似一隻行屍走肉既人類咁，人唔似人，鬼唔似鬼。
如果你唔明我而家既狀態係點，你可以想像一下…Zombie brand呢個skin就會明白。
『呀～先生唔該？』
當我正準備入倉換衫離開時，一名中年婦女拉停左我。
「咩事…」我低著頭，沒有望住佢回答。
『我想問下…洗頭水係邊度？』佢問道。
「洗頭水啊…？」我不屑地指著前方：「前面直行第三行轉右就係。」
『唔好意思呀，你可唔可以帶我去？』
「下？」我不耐煩地說：「就前面咋喎…大大隻字寫住護髮用品都見唔到？」
『喂！』豈料阿嬸語調一轉：『我好聲好氣問你，你咩態度？！』
呢一刻，我忍唔住道氣。
「你咪自己去搵囉？唔洗下下要人帶你去啊？仲細呀！？」
『你…你你！』阿嬸被我激到面紅耳赤，七竅生煙地說：『叫你經理過黎！』
就係呢個時候，經理被阿嬸既叫聲驚動，從經理房中走出來。
『呢位小姐，唔好意思請問有咩幫到你？』
『你就係經理喇話？』阿嬸趾高氣揚地說：『你黎得岩喇，你個staff呀，勁無禮貌呀，而家佢咩態度啊？！』
『我諗一場誤會黎既姐，』經理面向我低聲說：『衡仔…！仲唔同客人道個歉先…！』
「對唔住。」
『喂你…！！』
拋下一句之後，沒有同任何人有眼神接觸，沒有理會阿嬸既投訴，只係自顧自的打開倉門入去換衫。
我知道我頭先咁做…的確係好冇禮貌，分分鐘比人投訴，甚至炒魷魚。
但…所有野對我黎講…都已經無所謂。
係失去詩娜果一刻，我整個世界都好似已經被毀滅一樣。
明明我無拍拖，但…卻有一種失戀般千刀萬剮既感覺…
如今既我，只係一個無靈魂既軀殼。
咔嚓————
啪—啪—
超市貨倉內昏暗無光，我順手快速地開啟倉燈後，便脫去上衣扔到一旁掛著。
當我走到locker前面時，忽然聽到幾聲…咕嚕—咕嚕——
我向住平時食飯用既既辦公桌望過去時，竟然見到……
「嘩！」我當堂嚇了一跳：「嚇死人咩你？」
『唔？』瑟縮坐在一角的黑影望向我：『哦，係你呀。』
「你做咩係度又唔開燈呀？！嚇死人咩？！」
『超，』她瞟了我一眼，不屑道：『食完lunch咪諗住熄燈訓一陣，要你管？』
「哦……」
『不過你…』她大喇喇地翹腿坐在椅子上，從上而下的打量了我一番：『身材削左啲喎。』
「呃……！」我立即從locker中拎出便服遮住胸前兩點：「唔好意思…！」
『車，』她冷笑地搖搖頭：『又唔係未見過。』
「………」我不禁尷尬起來：「係呢……依雯你…可唔可以———」
我講到一半時。
『唔好叫我呢個名！』依雯突然打斷了我。
「………」
『同你講過幾多次啊！』依雯氣沖沖的道：『你叫我阿man或者阿蚊都得！你再叫多次依雯既話…我就殺左你！』
「阿…阿蚊姐…」我皺著眉膽怯地說：「你可唔可以擰一擰轉面…我想換衫先…」
『擰轉面？』依雯反問道：『男人老狗，你驚咩啊？』
「……………」
如大家所見，呢個就係我一直都係公司相處既臭串parttime，明明中學都未讀完，就當正自己係大家姐咁對我呼呼喝喝。
同時佢亦都係經理既獨生女，所以佢經常可以名正言順咁遲到早退。
公司請佢返黎做parttime基本上真係無咩野要佢做，佢每日只係行行企企，有粗重野經理都會叫哂我去搬搬抬抬，依雯正宗係呢間超市既「皇馬掛」員工。
「好心女仔人家就內斂啲啦……」我邊換衫邊喃喃自語。
一諗起詩娜，眼前既呢個人簡直拍馬都比唔上。
『喂你咦咦哦哦講咩呀！？』依雯兇神惡煞地對我發話。
「………」
咔—咔嚓———
突然間，倉門無故地被打開，門外慢慢有個身影開始接近。
『衡仔，』經理走進來對著我說：『你過一過黎。』
「哦……」我早已心感不妙。
我關上locker，死死地氣走到經理面前，準備接受經理既責罵。
而身邊一臉得戚既依雯，就好似食住花生等睇戲咁休哉悠哉。
明明佢食lunch既時間早已完結，但佢仍然留係倉度大安旨意地hea，面對住二人我卻毫無還擊之力。
『衡仔！』經理見我走近，便大聲怒罵：『你呢排做咩事啊你！』
「……」我低著頭，沒有回話。
『你知唔知頭先果個咩人啊！』經理焦慮的說：『係香港人呀！平時啲大陸客你要串佢咪算囉，而家個客講廣東話你都唔理佢？你第一日返工啊？明知佢會投訴架啦！』
「對唔住…經理……」我立即道歉。
『對唔住有咩用啊！』經理不斷連珠炮發：『而家人地話要上寫字樓投訴呀！你話丫，而家點算好！？』
「點算好……？」我心灰意冷地說：「咪炒左我囉……」
反正，無左詩娜…我存在都無咩意義。
『喂！衡仔！你知唔知自己講緊啲乜？！』經理愁眉緊緊皺著說：『你係我一手train出黎既，你而家同我講啲咁既野！？』
「對唔住…經理……」
『拿，衡仔，』經理回復冷靜地說：『我唔知你呢排搞乜野，又遲到，又無精神咁返工，甚至去到而家仲要惹到個客！總之，我最多保到你一次，同樣既事情我唔希望再發生，聽到未！』
「明白…一定無下次…經理……」
經理鬧到我狗血淋頭之後，便百般無奈地搖頭歎氣，然後開門走出舖面，回到經理房工作。
而我…就企左係原地…不斷反思著經理同我講既野。
係失去詩娜後既呢幾日，原來…我既轉變真係大左好多…。
唔單止工作上、生活上、飲食上都每況愈下…甚至…連生存都無咩動力。
呢份係我第一份工作，一去到呢間舖時，經理就好似當我係仔一樣咁照顧。
雖然日常分配好多工作比我做，但其實經理都係想我可以盡快學哂店內既運作，咁就可以快啲升職加人工，簡直…就好似父親望子成龍一樣。
但遺憾地，我辜負左經理既厚愛，我岩岩講「話想唔做」果番說話…相信令到經理個心都淡哂，亦都唔會再對我有咩期望。
我到今日終於明白，原來愛情影響到既；唔單止係內心咁簡單…連同事業、朋友都會影響到咁深遠…。
『呵～抵死。』忽然，背後傳來一聲嘲笑。
「………」我沒有回應，只是走到locker前繼續換衫。
『哈，失戀呢？』依雯沒有理會我繼續說：『男人老狗做到你咁，不如死左佢啦？』
「…………」
『比條女影響到自己，呢種男人我就最睇唔起架喇！』依雯諷刺地說。
「你可唔可以收聲。」我遏制著怒氣對依雯說。
『下？』依雯翹著嘴說：『你比人鬧完而家發女仔脾氣呀～？』
「…………」
『好心你啦！』依雯高高在上地鄙視著我：『一個大男人為左個女人要生要死，你唔好去死！？』
聽完呢一句後，我好嬲，我真係好嬲。
我嬲既並唔係依雯對我既冷嘲熱諷，更加唔係經理對我既指罵；
我嬲既…而係我自己。
唔單止被人陷害，仲被詩娜搞到自己一蹶不振。
依雯講得好岩，我堂堂一個男人…為左個女仔要生要死咁…仲算咩男人！？
雖然依雯外表係一個女仔，留有一頭堀北真希咁既中短髮，而且樣貌又有幾分相似…
但佢一開口就比人一種男仔頭既感覺，果種反差…真係好奇妙。
有時候覺得，依雯比我仲要有男人應有既決斷。
「………」我望住依雯，默不作聲地走過去。
『喂…喂…！』依雯呼喝著我：『你…你行埋黎做咩呀！』
「………」
我走到依雯面前，與她對望了幾秒後，我慢慢深呼吸…
然後鼓起勇氣，俯身說道：「多謝你。」
『下…？』依雯一臉懵然的問：『多謝我？你傻左？』
「唔係……」我企直後搖搖頭道：「我要多謝你鬧醒我…」
『痴左線啊你？』依雯哭笑不得的說著：『有咩人比人鬧、比人串仲會多謝返人架？Kai子！』
「哈……」我稍為放下悲傷的心情：「多謝你呀，依雯。」
『妖！』語畢，她一記直拳搥在我胸膛上：『仆街啦你！』
呢次係我第一次同依雯傾工作以外既野，估唔到，性格灑脫既佢…
係做人、甚至拍拖呢一方面都比我要獨立。
某程度上…我內心的確係太過依賴詩娜；我知道…一個成熟既男人唔應該好似我而家咁一蹶不振。
多得依雯呢番說話、呢一拳，我先再次搵返自己。
然而，雖然我無問依雯既意見，但我知道應該做既事…只有一件。
我望一望手上既錶，仲有三個鐘既時間，我就可以知道逸朗到底點解要加害於我。
水落石出之後…我一定會同詩娜坦白一切…
將所有呃住佢既事…原原本本咁同詩娜講返…希望得到她的原諒，
然後我地就可以重新開始…
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
https://www.youtube.com/watch?v=wlY0VC-7OMg
（please open）
我不會講妳知，其實是第幾次；和她相見，應否叫作外遇？
對她有些意思，甚至想過明晚獨處；時候來了，卻想起妳的臉…
情人該守約，我也盡我本份，沒繼續錯下去。
無論如何喝醉、無論如何空虛。
歸家飾演妳的好情人，專心一意共妳溫存和熱吻。
看妳帶著童稚的亢奮，坦白會否徹底破壞氣氛…？
合著眼撫心自問；這一種背叛…無意要妳傷心…
自我麻醉，說謊手不會震…
我想到忠與貞，然後是未了情；和她擁抱，可否叫作革命？
也許有廝殺聲，但此刻我要慰藉，想到處看風景…
歸家飾演妳的好情人，專心一意共妳溫存和熱吻。
看妳帶著童稚的亢奮，坦白會否徹底破壞氣氛…？
在妳與她中間找一道門吧，誰和誰被困？
如偷聽出聲音…牆要碎裂、我將燈光校暗…
纏綿時意念放空，只得畫面強烈震動；
妳和她…妳和她…「被」接通…………
即管充當妳的好情人，專心一意共妳溫存和熱吻。
我愛妳亦同樣體貼妳，不讓妳知…「人可以更醜陋」。
直到妳想不出當天在床上，誰人陪著我…
上萬個謊言再接謊言…
信我…