【苦】《英雄聯盟》 - 一件次世代既愛情工具: 《出賣》 - 上

「究竟點解會咁……」我呆跪在地上自言自語。


我個心真係好痛…痛到好似每分每秒都在淌血一樣。

詩娜無聽我解釋，無聽我既苦衷，甚至…無理我既哀求，單方面決絕地要離開我…

雖然傷心的感覺不斷衝擊我腦海，但腦入面…更多既係「疑問」。




詩娜頭先一開始對待我既反應，就好似變左另一個人咁。

於是，我立即執返起電話，睇多一次個來電記錄。


我收工時遇到逸朗同璇璇後，過左一段時間先檢查紀錄…而係果時，詩娜已經打左幾十個電話比我。

當我一路碌上去，打算睇下詩娜第一個未接來電係幾時打黎時…

我終於恍然大悟。



詩娜既第一個未接來電，係由下午6點13分開始打出，亦即係話，係我食完lunch後2個鐘詩娜就打黎搵我。

如果係咁就奇怪。

因為詩娜明知我收工時間係7點，點解佢會係6點就開始打比我？！

但我回覆詩娜電話既時候，佢又無咩特別重要既事要同我講。

如果佢係想話係學校唔開心，大可以等我收左工先打比我傾訴姐？



點解要咁急一個鐘都唔等得，明知我聽唔到電話都要打黎？


照咁樣推測，詩娜打黎搵我既原因…

並唔係因為佢有事，更加唔係因為佢想搵我傾訴，而係……

詩娜一早就知道璇璇會黎搵我。


換句話講，基於呢個原因，詩娜一開始搵我…係呷醋，想阻止我同女仔見面…

然而我當時冇聽到佢電話，之後再聽返時…




『哼…！死人頭你頭先去左邊啊…！嚇死人咩！』

「我…頭先開OT嘛…你知聽日假期…要做減價…特別多價錢要轉…所以…」

『咁你都可以Send個message比人地架嘛！』

「但…返緊工點樣send訊息啊…」

『我唔理！你而家即刻返屋企陪我～！我就原諒你啦～！』

「而家…？」





當時詩娜第一個要求就係要我返屋企陪佢，而唔係講佢自己有幾唔開心…！

即係話…我一開始講既所有大話，呃佢璇璇係男仔時…詩娜都知得一清二楚…

所以詩娜當時哽咽既原因並唔係因為聯絡唔到我而擔心…而係…

詩娜親耳聽住我一而再、再而三地講大話！！


一諗到呢一步，我思緒中不其然閃過一個人既臉孔。

一個羈飢不擇食既人。


除左傷心，我心入面更多既…係憤怒同仇恨。



一直以黎我都對兄弟非常信任，對女仔毫不上心；除左詩娜。

但我估唔到…今次…比呢個陷阱我踩既人，竟然係我最信任既戰友…！


「死仆街……！」我不禁咬牙切齒地說道。


『天哥哥…？』

一把女聲忽然從我身後傳來。

「……」我收起所有表情，平淡地回望：「璇璇…？你出左黎既…？」



『嗯嗯…』璇璇點點頭說：『人家擔心你嘛……等你很久了耶…你還好吧…？』

「放心，」我收起淚水，厲眼地回視：「我無事。」

『天哥哥…發生什麼事了嗎…你…』璇璇支吾著：『你這樣好可怕……』

「傻，我無野呀…」我勉強地笑了笑：「唔洗擔心我。」

『沒事…？』璇璇好奇地望了我一眼，便生氣地道：『才怪呢！』

「我真係無野……」我諗左一陣，做左一個決定：「璇璇…我記得你…好似下星期二生日？」

『我的生日…？』璇璇不為所以地呆望著我：『對呀～～還有三天～』

「咁就好……」

『怎麼了嗎？』

「不如我地去慶祝下？」我建議。

『慶祝？』璇璇喜孜孜地說：『好哇～！』

「嗯，我地到時落club幫你慶祝生日，叫埋逸朗同你家姐，好冇？」

『club…是夜店嗎？』她問。

「嗯。」

『好～～人家也想看看香港的夜店～！』


璇璇爽快地答應左我後，我便終於展露一絲笑意。

因為，我真正既目的並唔係想同璇璇慶祝生日…而係我想問清楚逸朗點解要陷害於我。

逸朗係今日見到我時…已經表示佢知道我呢排都一直陪住詩娜，

換言之，最有可能將璇璇今日會黎搵我既事同詩娜講既人…就只有逸朗一個。


起初我以為逸朗係用下體思考既人，為左食女基本上咩都做得出，同佢做左咁耐兄弟呢一點我好清楚。

但我諗來諗去都諗唔明，到底點解佢要出賣我。

如果佢一早就同詩娜講左，詩娜就會阻止我陪璇璇，咁到時…佢仲點樣去搵璇璇既家姐？！

唔通佢一早知道我唔會聽詩娜電話…？唔係！

逸朗係我收工時搵我…就係想阻止我聽詩娜電話！


但…逸朗令到詩娜嬲左我…到底對佢有咩好處…？

我心入面唯一出現既理由就只有一個…

就係逸朗連詩娜都睇中埋。


呢個有異性無人性既仆街…平時我單獨搵佢，佢永遠都唔會出現，

只有佢搵我去蒲，先會見到蹤影。

於是，我就大膽作出一個最合理既決定，就係璇璇生日當晚…

搵到佢出黎之後，我一定要講清楚！