【苦】《英雄聯盟》 - 一件次世代既愛情工具: 《出賣》 - 下
＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊
依雯粗粗魯魯地打左我一拳後，我就好似一隻被控場既英雄用左「淨化」一樣；成個人醒哂。
「點都好啦…」我頓了頓，續道：「都要多謝你點醒我。」
『超，都唔知你講乜…』依雯尷尬地逃避著我的眼神。
「我講真架，」我走向門口，回頭說：「呢幾日我不斷係度鑽牛角尖，淨係識係度自怨自艾，甚至連自己愛既人…就黎比人搶走左我都唔識反抗…」
『下？唔係掛？』依雯一臉不相信的樣子，道：『不過都唔出奇丫，好似你呢啲咁懦弱既人，遲早都會有呢一日架啦！』
「喂…洗唔洗咁講野……」我接著說：「話哂我都大過你呀…比返幾分薄面黎都得掛？」
『超～！比面你？』依雯嘴翹翹，冷笑道：『你連自己都唔重視自己，為左個女仔連份工都話辭就辭，仲洗乜人地比面你啊？！』
「………」
雖然依雯好無禮貌，但佢講既野…真係好「應棍」。
「唔講住喇…」我打開倉門：「聽日見啦，拜拜…」
『喂！』依雯俯身伏在檯上，叫停了我：『幫我閂燈啊！』
「下…？」我好奇地問：「你唔係食完飯架喇咩？…仲未出舖面幫手？仲想訓覺…？」
『妖！』豈料到她竟說：『係咪要你理啊，收左工就走啦～！記得聽日經理仲有野交比你去做架！』
「哦…」我轉身準備離去。
『喂！』
「又點…？」
『冇，』依雯猶豫道：『你係咪真係明架？』
「明？」
『妖，無野啦！走啦你！』
啪啪兩聲關上倉燈後，我臨走前望到依雯，佢的而且確真係繼續訓，完全唔諗住做野。
我心底不禁慨嘆…有父幹真係好，返工直情工作都唔洗做就有人工出。
個倉簡直就好似成為左依雯既睡房一樣。
不過，我而家應該做既事，並唔係諗呢啲無謂野，而係準備去目的地。
返到屋企換完衫，去到馬鐵站後，我望一望隻錶，時間終於黎到晚上十點。
幸好我工作既地方同我屋企十分之接近，所以我決定換過套衫沖埋個涼先出發。
係我準備入閘搭車前，我先要打一個電話。
嘟——嘟—嘟嘟———
「喂？」
『喂～？點呀？』聽筒的另一方傳來熟悉的男聲。
「喂…」我裝作平靜，若無其事且如常地說：「逸朗，一陣係咪落club幫璇璇慶祝生日？」
『哈！梗係啦！』逸朗聲線高亢地說：『前幾日約左架嘛！』
「咁…」我分析了一下後：「係中環定尖咀搞？」
『老尖呀，』逸朗果斷的說：『係Why Club呀，你係門口話我個friend文浩booking就得啦，攞左間細房。』
「哦…好……」
『喂，衡仔，唔記得同你講返聲。』
「咩事？」
『咪上次囉…！』逸朗講得眉飛色舞：『真係多謝哂你啊兄弟！』
「哦……」我回想起：「你講璇璇家姐下嘛…？」
『Yes！bingo！』逸朗興奮不已：『一場兄弟，同你share個包膠啦！台灣妹即係台灣妹…！唔單止大波…而且騎功仲———』
「轉頭見面先傾，」我打斷道：「去到再打比你。」
『唔？哦…』逸朗沒趣的道：『咁好囉……陣間見～！』
嘟———
收左線後，我呢刻既心情恨不得將部手機一下扔到地上出氣。
頭先打比逸朗，聽到佢果把風騷既死人聲…我簡直恨不得當場爆粗屌柒佢。
可能你會問，點解我唔直接屌逸朗？
原因…其實好簡單。
係我接觸LOL之前，我同好多血氣方剛既年青人一樣，凡事都會好衝動；鍾意既就講，唔鍾意既就屌，就好似我個名咁——我行我素。
所以，我果時成日都會得罪人多，稱呼人少，更令到我身邊幾乎無乜幾個朋友。
但當我開始打LOL之後，唔單止我既生活唔同左，就連我既性格…都開始慢慢改變。
就好似打一場RANK咁，當你打上路同敵人對線時，你唯一既敵人，就只有對方同jg。
有時候，相信大家都試過處於逆風既狀態，更甚者，對手殺左你之後…仲會係你條屍上面跳舞黎挑釁你。
好正常地，當下你一定會好嬲，甚至會Teleport返去同佢博命，想挽回劣勢。
但係我對線時…我慢慢領悟到，原來你愈嬲，愈衝動…羸既機會就愈細。
對方挑釁你，你仲墮入佢圈套既話…條線恐怕好快就會崩潰。
所以，有時候我寧願留Teleport把握機會去幫手gank人，都唔想浪費黎返線去捱打。
寧願輸一兩波兵，都唔好再輸人頭、輸氣勢，假如你留黎gank下路，到最後都有機會有隊友幫自己挽回所有劣勢。
逆風唔緊要，輸兵輸塔唔緊要，低KDA都唔緊要，只有最後既「勝利」…先係最重要。
我目的唔係淨係鬧佢出氣；而係要比所有人都知道，逸朗到底係一個咩人！
[下一站—尖東，左邊既車門將會打開，乘客可以轉乘荃灣線———]
待列車停定後，我沿著隧道一直走到N出口，然後乘著扶手電梯向住相約既地點出發。
甫出地鐵站後，便迎來一片五光十色既繁華夜市。
尖沙咀街道兩旁都設滿了大大小小形式不同的酒吧同食肆，當中亦不乏同我一樣早出晚歸既年輕男女。
經過一輪車程後，時間已經漸漸踏入午夜。
對於好多人黎講午夜係休息既時間，但對街道上既夜蒲男女黎講…今日先岩岩正式開始。
我同逸朗唔同，我唔係一個經常夜蒲既人，有時候…我覺得夜店入面既音樂太嘈，男人又多女仔又少，如果可以既話我寧願係屋企打機都唔會無端端出黎。就算要飲野傾計，我都只會揀清Bar更好。
但適逢今日係璇璇既生日，我只好免為其難地出席應酬一下。
離開地鐵站，過左條馬路，轉過兩個彎後，便到達相約既夜店門前。
今日係星期二，門口排隊既人龍非常之長，左一排女仔，右一排男生咁排住隊去比錢入場，而我就企左係對面既馬路，拎出電話準備打比逸朗。
嘟——嘟嘟—
「喂？」我拿著電話說。
『喂！！？』
電話一接通後一陣震耳欲聾既音樂就從聽筒的另一方傳來。
「喂？？」我按著一邊耳朵，把聲線加大說：「你係邊啊…逸朗？」
『喂！！衡仔呀！！？』逸朗大叫著：『我到左喇喂！今晚重女呀！』
「下…？你入左去喇？」
『係啊！』逸朗呼喊著：『璇璇佢地都到左啦！入到黎直行果間房就係啦！』
「哦……」
嘟——
「唉…」收左線後，我不禁搖頭歎氣喃喃自語：「又要比錢買難受…」
忽然間。
啪———
我膊頭感覺到有一股力量拍落黎。
然後便懷著不詳既預感回頭一望…！
我從下而上地掃視了一番，一對卡其高爭短靴，白裡透紅既纖幼長腿，牛仔熱褲，雪紡純白露臍上衣…
一個性感既身影便亮於眼前。
『嘻～』女生臉上親切的笑著：『咁耐唔搵人地～仲記得我嘛？』
「阿晴嘛…點會唔記得…」我尷尬地問：「但你…點解會係度既？！」
『車～人地成日都黎架啦～？』阿晴洋洋得意地說：『應該係我問點解你會係度先岩啵～！』
「呀…哈哈…」我不知所措地笑著：「無…有朋友生日…咪……」
『朋友～～？』阿晴聲線拉高，開玩笑道：『朋友定炮友呢～～嘻嘻～！』
「咪玩啦…」我澄清：「真係朋友黎……」
『點知你喎～！』阿晴回望著排隊的人龍：『唔同你講住啦～一陣入面見啦～！』
「好……」
『啊～～爭啲唔記得！』阿晴忽然停下來，回頭笑說：『一陣你要陪我飲幾杯架～！』
「哦…」
『仲有仲有～等我介紹啲朋友比你識下都好嘛！』
「下…」我不好意思地說道：「唔洗啦……」
『嘻，』阿晴走返轉頭，靠近我耳邊道：『人地上次見你咁陰公豬啊～都想幫你搵返個女朋友架嘛～！』
「……真係唔洗喎…」我努力解釋。
『是但你啦～』阿晴續道：『識多幾個朋友～都無壞既～係咪？同埋我啲朋友都有打LOL架～』
語畢，阿晴向我單左一眼示意後，我就即刻Feel到佢想同我講啲乜…。
阿晴本身係有男朋友既人，恐怕…佢除左係想介紹朋友比我之外，另一個目的…
恐怕都係想係朋友面前Showoff有我呢個菁英玩家朋友。
其實我好明白貪慕虛榮呢種心態，無論係「錢」定係咩型式都好，相信每一個人都會有。
阿晴同我寒暄一番離去後，我便獨自走到無咩人果行男仕隊列入面等待比錢入場。
『ID card。』一名黑人守衛向我發話。
我拎出身分證後黑人便再三核對，然後旁邊企係櫃位前既接待女人便開聲問道。
『咩booking架？』
「文浩booking既，」我依照逸朗的指示說：「唔該。」
『450，下面比。』
批准入場後，我就行入夜店，經過一條長長既樓梯抵達位於地牢既夜店之內。
然後我從銀包拎出銀紙，收錢既黑人同時在我手上蓋上印章和繫上手帶。
呢一連串既步驟，都係進入夜店既必經手續。
即使我好心急都好……但我必須要保持冷靜，既然都等左三日…唔爭在等多一陣。
完成入場手續後，我便推開地牢內的玻璃門，一打開門後，四方八面都有不少視線注視在我身處的方位之上。
而夜店內四周昏暗無光，果種感覺…
就好似係一個森林入面充滿無數Rengar同Nidalee正等待狩捕獵物一樣。
無論我幾冷靜都好，呢刻既我都感到無比尷尬。
於是我便憑著記憶中逸朗既指示，沿著門口直路一直行…
終於，行到一間房既木門前。
係我伸手想打開門既時候，門柄突然轉動，然後亮出一撮柔和既燈光，同四周形成強烈對比。
咔嚓———
『喂～！』逸朗拎住杯酒，雀躍地說：『兄弟你終於黎到啦～！等我仲準備出去搵你添！』
「嗯……」
逸朗熱情地搭住我膊頭，就好似咩事都唔知一樣自然。
但佢呢種行為係我眼中卻係…
虛偽到極點。
忽然間我想起…詩娜話我講大話好恐怖，但其實…我眼前呢個人先係最可怕。
無聲無色地係我背後桶完我一刀，然後仲可以若無其事地同我稱兄道弟；
到底一個人要埋沒良心到咩地步…先會做得出呢種豬狗不如既事？
我唔知道。
亦都唔想去知。
呢一刻既我目標清晰而明確，腦海中沒有任何半點雜念。
終於…都到左揭穿逸朗真面目既時候。