【苦】《英雄聯盟》 - 一件次世代既愛情工具: 《見異思遷》

三十分鐘後


『在哪裡呢……』璇璇在嘀咕著。

「喂…」我停下腳步：「你帶我行左成半粒鐘…到底想帶我去邊？」

『欸…這個嘛…』璇璇尷尬地摸摸後腦，笑著說：『對不起～我迷路了～～』

「………」我臉上盡是無奈的表情。



『不過～～！』璇璇立即澄清道：『很快～很快就會找到的啦～！』

「你到底想搵咩？…」我好奇地追問：「不如你話比我知啦…」

『奇怪…』璇璇喃喃道：『你們這裡不是旺角嗎？』

「係啊…」我聽得一頭霧水：「咁又點？同搵我想搵既人…有咩關係…？」

『那就奇怪了啦…』璇璇回想著：『我們高雄大街小巷都不難找到網咖……你們香港怎麼那麼少呀～』



「哦…頂…」我終於明白：「原來你想搵網吧…」

『對呀～』璇璇自信地點點頭：『你說要找她嘛～去網咖打LOL不就找到她了嗎？』

「但……」我想了想：「你點知佢會打機…？」

『嘻！有什麼好奇怪的？』璇璇解釋著：『你剛說她一個人剛去了外國嘛，應該沒什麼朋友的～所以除了打LOL之外…想必她自己也沒事做吧？』

「原來……」



『哎唷…別嘮叨了啦～』璇璇推著我走：『天哥哥快去網咖吧～！晚點就可能來不及了！』

「好…」


我只係同璇璇講左少少詩娜既資料，佢就已經可以即刻知道點樣可以搵到詩娜…

相比之下，我就真係太粗心大意。

可能佢地都係女仔，會明白對方既行為，而我呢啲唔識女仔心意既人…恐怕都要努力揣摩下。

不過…都係多得有璇璇係我身邊，我先可以知道少少…女仔心入面到底諗緊啲乜。




我感激璇璇，唔係因為佢幫我搵到詩娜，而係我只係佢區區一個朋友，佢都願意幫我咁多…

而且…佢明明第一次黎香港，竟然同我一樣咁心急想搵到詩娜；明明自己唔識路，都著緊得帶住我係旺角街道上四處尋找…

對住璇璇呢份咁為我設想既傻氣……我心底或多或少…都有幾分對唔住佢…


其實…我知架，璇璇對我係點，我真係感覺得到…


但，在公在私都好，我真係唔想用拒絕去傷害佢。

有人會話長痛不如短痛，但…恕我做唔到。

我望住身旁既璇璇，試問對住一個咁善良既女仔，我有咩可能講得出口去傷害佢？




我已經同佢講左…詩娜係我心上人，但璇璇都肯無條件咁幫我……

當我想到入神時。



「到喇。」我停下腳步，企係璇身邊抬頭望住一棟大廈。

『嗯？在…』璇璇東張西望的說：『在哪～？』

「咪呢度囉。」我示意大廈方向。

『啊？怎麼不在地面啊？』璇璇好奇地問。



「哈……」我歎氣地搖搖頭：「你知嘛？香港地鋪啲租金好貴架，以前網吧或者開係地鋪既…但而家比藥房同金鋪佔據哂喇，要去網吧…大部份都係樓上。」


『喔…！原來這樣～！』璇璇呆呆地笑著。

「嗯。」


陪璇璇入大廈之前，我走到入口旁的一檔粉麵店準備買食物。

『怎樣了～？天哥哥？』璇拉著我問。

「Sorry呀璇璇…你應該未食野…」我尷尬地道歉：「我咪諗住買啲魚蛋粉上去食囉…你唔介意嘛？」



『魚蛋…？魚丸嗎？』璇璇雙眼發光的笑著：『不介意呀～！人家也很想吃香港的魚丸～～』

「哈哈…唔係魚丸…係魚＂蛋＂」我微笑地說。

璇璇害羞地看著我，嘴巴嘟起發音：『魚…單？』

「哈，係呀，魚單。」

『哎呀…別笑人家了啦！』璇璇面紅紅地說。

「哈哈！」我忍不住笑了起來：「邊有笑你，你講廣東話都幾可愛呀～」

『屁啦～！』璇璇輕拍了我一下。

「係喎……」我靈機一觸：「你仲識講咩廣東話？」

『我會我會～』璇璇甜笑著說：『我會講～～雷猴～屌你老母～～』


此時，坐係門口既收銀同食客都不禁望住我地二人。


「…………」我無奈得只剩尷尬：「非常正宗……」

『嘻嘻～是不是＂猴西雷＂呢？』

「傻。」我拋下一句後，便走到收銀前：「唔該兩碗魚蛋粉行街，走青。」


『魚蛋粉打孖行街～！』門口的收銀阿姐奸笑地看了我倆一眼：『靚仔，台灣妹都比你溝到下？』

我實在唔明點解啲阿姐會咁八卦，到底係佢地食飽飯無屎屙，定抑或口水多呢？

一男一女就一定係拍拖既？朋友唔得架咩？

璇璇聽到後不單止面紅到極點，而且仲十分尷尬地低著頭一語不發。

於是我只能尷尬地勉強比左個笑容示意就算。


過左一陣外賣到手後，我便同璇璇回到旁邊的大廈等lift。

「係呢。」我打破沈默道：「你地係台灣網吧打機，唔會買野食去架咩？」

『嗯？會呀～』

「咁你地食咩多？」我細細聲說：「我未去過台灣…所以好奇想問下。」

『台灣吃什麼～？嘻～可多嚕～』璇璇回復興奮地說：『平常下課後…我和同學都會去買鹹酥雞～還有碗粿～綠豆湯牛奶～～等等囉～』

「嘩…咩黎架？聽都未聽過既？」我好奇得皺著眉。

『嘻～下次來台灣～我帶天哥哥去吃吧～』璇璇側首笑著說。

「好呀～！」


當我講得興起之際…

唔知點解…忽然間…我內心有一股奇怪既悸動。

唔係因為我變左心，而係因為我覺得…好似……對詩娜既事已經變得無咁著緊咁…

到底係因為啲咩？！



明明我而家係想搵返詩娜道歉，但…唔知點解…同璇璇傾傾下計…我腦入面關於詩娜既事…

好似開始愈來愈淡咁。

我曾經聽人講過，人係見異恩遷既動物，唔通…我對詩娜果份感情…都敵不過呢種心態…？

…

……

唔會！

一定唔會…！

雖然我成日口講有幾愛幾愛詩娜，好多人都可能唔會相信，甚至覺得我有咁多誘惑係身邊…

一定捱唔到詩娜返黎…甚至逸朗仲可能批死我一定改唔到；

但我唔信，我一定要做到比全世界既人睇！


叮———的一聲。


「到喇。」

我同璇璇去到旺角既一間樓上網吧，一入到去我就好似返左屋企一樣咁親切。

因為…耳邊不斷傳來既都係英雄聯盟遊戲既聲音。

拎出會員證等等登記後，坐係收銀既網吧職員就示意我地去鄰近既座位。

『兩位，三十六、三十七。』職員說道。

「唔該。」


我帶住璇璇走過坐得密密麻麻既座位行邊，身邊既除左少量女仔外，

佔八成以上既，都係學生、毒男、同以網吧為家既麻甩佬。

當身材豐滿、穿著單薄既璇璇經過佢地身邊時，果班男人除左向我拋下充滿敵意既眼神外，更多既都係不斷視姦璇璇果雙巨乳。

但我留意到，璇璇不單止無尷尬，反而仲雙眼發光地看著身邊每一個人既電腦螢幕之上，彷彿好似第一次去網吧咁。


「坐呢度啦。」我走到一個二人卡位，放下手中食物說道：「呢度應該禁煙區，你可以放心。」

『唔唔～』璇不介意地搖頭道：『沒差啦～反正我們那邊大家都抽煙的～習慣就好～』

「嗯…」我拉開電腦凳坐低：「咁我幫你開機先。」

『麻煩你了天哥哥～』


璇璇好聽話咁坐係度一動不動，只係將所有事都交托係我身上去處理。

估唔到…台灣女仔除左好身材、把聲好聽、同埋溫柔之外…連性格都咁就得人。

當然，有人會話，今次我都係第一次見璇璇姐，可能耐左會露出真面目呢？


但我可以同大家講，我雖然係第一次同璇見面，不過我平時工作上同佢聯絡左大大話話都有兩年幾，璇璇本身好禮貌已唔係一朝一夕既事。

我咁講唔係因為想踩低香港女仔，當然詩娜都好好啦……只係詩娜同璇璇既性格…係香港黎講實在不常見，可能第一次見面就會，但久而久之好快就會變回真面目。

點解咁講？因為我平時工作果間超市，果個女仔Parttime；即係超市經理個女呀，嘩…佢啲性格就真係極品。

極品乜野？極品難頂呀。


『好了嗎？～』璇璇拍一拍發哂呆既我。

「嗯…？」我回過神來：「得喇…之後係menu揀台服就入得……」

『天哥哥……』璇仔細地看著我問：『你…怎麼了嗎？』

「我？」

『嗯嗯…總覺得你怪怪的。』

「無…無咩野…」


我諗左一陣後，就決定開口：「璇璇…你都諗住陪我去搵佢…？」

『對呀～』璇璇開朗地說：『不行嗎？』

「咁又唔係……」


我勢估唔到，原來璇璇除左陪我黎網吧，等我可以盡快搵到詩娜外，原來…

佢仲會留係度甚至入埋game！

萬一…到時詩娜問起我佢係邊個黎…咁點算！？


『天哥哥……』璇打亂了我的思緒：『你在擔心她看到我嗎？』

「璇璇……」我接著道：「係啊…對唔住…我怕佢誤會……」

『嘻嘻～！放心吧～』

「嗯…？」我一頭霧水地看著璇璇。

『你忘了…我有很多分身嗎？』

「分身…？」

『嘻～』璇璇指尖在鍵盤上飛快地交錯：『比方說……這個…！』


噠——的一聲，login後…

璇璇面前的電腦螢光幕，上方所顯示既ID竟然係……

「呢個ID咪…！」

『嘻～沒想到吧？』