【苦】《英雄聯盟》 - 一件次世代既愛情工具: 《原來我不夠愛她》

『怎麼了嗎…天哥哥？』璇璇從公園座椅走過來拍我。

「無…」我拎住電話發呆：「無野……」

『你還好吧？』璇璇盯著我說：『人家看你在這拿著手機發呆很久了，天哥哥…發生什麼事了嗎？』


時間已經去到接近午夜時分。

當我聽到詩娜既一番說話後，被CUT線既我只能待在原地發呆，完全唔知應該要點做…



回望身邊既璇璇，我並唔係因為花心而想陪佢，大佬…我梗係知道呢一刻詩娜係重要好多，

但，我岩岩仲拍哂心口咁承諾陪璇璇，而家搞到兩頭唔到岸……


「璇璇…對唔住呀…」我與她對望著，鼓起勇氣道：「我諗我今日只可以陪到你咁多…」

『嗯？』璇璇好奇地看著我：『為什麼～？』




望住佢一雙天真無邪既眼神，我都只能將所有事實講出黎：「其實…我今日應承左陪一個好重要既人…我已經遲左返屋企陪佢…所以……」

我講到一半之時。


『是那個女生嗎～？』璇璇一句打斷了我。

「…嗯……」我想了想後續道：「你點知既…？」



『天哥哥…』璇璇古靈精怪地笑著：『你以為我是誰呀～？』

「你意思係……」

『這陣子我看你整天都陪著一個女生雙排，』璇璇托著腮說：『我看……那應該是你的女朋友吧～？』

「女朋友！？」我聽後目瞪口呆：「咁…咁又未算係既…」


的確，由始至終都只有單方面既我向詩娜示愛。

即使我Feel到詩娜同樣對我都有感覺又點？詩娜唔好話愛我，甚至連一句鍾意我都無講過！

試問我又點可以謬謬然同第二個人講…話詩娜就係我女朋友？



咁唔單止唔尊重詩娜…更顯得我自作多情咁。


『哎呀～～天哥哥～～』

「做咩？」

『我說呀～』璇璇走到我身旁，抬起頭看著我說：『在戰場上冷靜沈著的天哥哥去了哪呢？』

「戰場…？」我下意識地問道。

『對呀～』璇璇莞爾而笑：『我認識的天哥哥…是一個做事果斷、分析準確的人～～就像打LOL一樣，無論幫哪一條路，天哥哥都可以果斷選擇到…對嗎？』

「我………」




聽完璇璇呢一番說話後，我真係有一種當頭棒喝既感覺！

無錯，我平時係LOL既戰場上經常都擔任「打野」既位置，無請係上、中、下三路都好，

只要邊一條路有需要到我，就算佢地唔洗出聲，我都會係時限內到達。


而家既我，就正正處於呢一種狀態。

詩娜佢……就好似係下路既Support咁；即使身邊有ADC既陪伴，詩娜都完全唔開心。

因為…個ADC唔單止唔識食兵，而且仲要怪責佢…令到詩娜非常難過，但同時間，

我一問起詩娜過成點時…詩娜都怕我係打野發育得唔好，想我可以農多啲，對自己好啲……




而我卻完全無設身處地咁去體會詩娜難過既心情。


估唔到簡簡單單既一個遊戲，都可以領會到咁既人生道理。


「璇璇……」我從迷惘中醒過來：「多謝你…！」

『嘻嘻～！』璇璇天真地露齒般的笑著：『那～天哥哥打算怎麼辦～？』

「我都唔知……」我接著說：「頭先佢先Cut左我線…」

『那～』璇璇反問道：『為什麼不打回去呢？』



「冇用架…」我搖搖頭：「無論係Skype…電話…wtsapp…所有既聯絡方法，只要佢一唔開心…就會block哂我…直到佢下左啖氣先會搵返我…」


過去果大半年黎，詩娜都為左唔想同我鬧交，都會以呢種方法去令大家冷靜…

但佢去到外國…呢種方法對我黎講…就變成左一種懲罰。


『笨蛋！』璇璇用稚氣的腔調罵道：『喜歡她為什麼不去找她？你應該找她道歉呀！』

「我都想……」

『想還不去做！』璇璇嬌嗔道。

「唉…」我無奈地搖頭：「但佢而家係英國……試問佢block哂我聯絡方法…我仲點搵到佢？唔通真係買機票去英國咩…傻既…」

『那……』

「算喇…」我打斷道：「我都係等佢下左啖氣再搵返佢…璇璇，我送你返酒店先啦…」


要去搵一個嬲左你既人，就好似要叫醒一個扮訓既人咁難，根本無任何方法。


『天哥哥…』璇璇低頭喃喃道。

我回過頭來：「做咩？」



啪———！


一下熟悉，而且清脆既聲音，從我臉上迴迴傳出。

我目瞪口呆，完全無任何反應，只係感到一陣赤熱的溫度慢慢從臉上散至全身。

望住眼前嬌小既璇璇，她不但皺著月眉，而且還含著淚的怒瞪著我。


「你…」我像失去靈魂般的摸著臉說。

『笨蛋！』璇璇彆著淚一句喝來：『天哥哥是個白痴！』

「下…？」我完全一頭霧水。

『那個女生不讓你找，你就放棄了嗎！？』

「咁……」我頓了頓：「咁唔係點……」

『難道說一直以來她都這樣對你嗎？』璇璇問道。

「係呀……」我十分同意：「每次佢嬲都會封鎖哂我……話想大家冷靜下先喎……我咪遷就佢…」


『你真的…！』璇璇似是哭笑不得地看著我：『我說……天哥哥，我想問你一個問題。』

「咩問題…」我垂頭喪氣地說。

『你喜歡她嗎？』

「我……」我想了想後道：「當然鍾意…」

『那你為什麼…那麼快就放棄？』

「我放棄…？」我解釋說：「果時佢仲係香港，我都有試過係佢嬲果時搵佢呀！但……換黎既係被佢鬧到狗血淋頭……」


『天哥哥…』璇璇凝望著我：『你知道一個女生…最希望要的是什麼嗎？』

「女仔…最想要既野…？」

『嗯嗯…』璇璇微笑地點頭。


女仔最想要既野……我諗來諗去都係得果幾種。

「係…錢？」我緊張地說。

『錯！』

「一個錫佢既男朋友…？」

『也錯！』

「咁都唔岩！？」我放棄地說道：「咁係咩………」


璇璇慢慢走近我，捉住我隻手，放在她的臉上…

「你……」我下意識地呆了呆。



『一個女生…』璇璇輕閉著眼睛：『最希望擁有的…是一個對她不離不棄的男生…』

「不離…不棄…？」

『嗯嗯…』璇璇張開眼，溫柔地看著我：『如果一個女生生氣了…讓你走了…不讓你找她了…你就真的照著辦嗎？』

「………」

『你也知道不是這樣的吧。』

「嗯……」我內疚地說。

『就算她封鎖了你…你真的有想過所有方法去找她嗎？』

「我……」

『你上一次說找到她，她罵了你…然後呢？』


聽到璇璇咁講，我先回想起果一次…

記得果時詩娜仲係香港，而我就掛住陪阿晴，又或者其他女仔打機而唔理佢…

雖然詩娜並唔知道真相，但亦因為我對佢既冷淡而嬲左我成個星期。

到左有一日我想搵佢…先發覺原來詩娜太嬲block哂我所有聯絡方法。

我當時真係好驚。

好驚以後都見唔返詩娜…於是我用盡哂所有方法去搵佢，甚至…去到佢屋企樓下等。


直至等到凌晨…當時詩娜終於肯落樓見我。


我仲好記得詩娜當時踢住拖鞋、戴住粗框眼鏡、同一條桃紅hotpants…同我第一次見佢既打扮一模一樣。

詩娜一見到我當然係好嬲啦…一直鬧一直鬧…鬧左我成個鐘都未停。

唔單止鬧，仲會出手打我…然而我知道唔係好大力……

雖然唔好受，但當時我終於可以搵返佢……我個心先安定返落黎。


而詩娜打完鬧完後…就好快回復返同平時一樣…啖氣好快就下左。

對比起我平時由佢嬲而唔理佢…真係差好遠。


自此之後，我就知道詩娜…先係對我最重要。



『想起來了吧～？』璇璇把我從回憶中拉回現實。

「嗯……」

『那～』璇璇鬆開我的手：『天哥哥該知道怎麼辦了吧？』


「我……我係好想搵佢…」我不禁難過地說：「但而家我可以點做啊…？佢係英國…我係香港…唔同以前咁可以係佢屋企樓下等佢啊……」


『你真的是個大笨蛋啊！』

「咩意思……」

『連我都想到方法找她了～！』璇璇機靈的笑著：『為什麼天哥哥你會想不到呢？』

「下…！？」我難以置信地說：「咩方法！！？」


『嘻～』璇璇鬼馬地笑著，胸有成竹的說：『我們走吧～』

「去…去邊…？」


璇璇拉著我的手：『去找她～～』


我呆企在原地，任由璇璇拖住我係人來人往既旺角大街上行走。

連我都諗唔到方法去搵詩娜…璇璇竟然諗得到…。

呢一刻，我內心不禁反問自己，到底係我唔夠愛詩娜…定抑或係我唔夠重視佢…？

唔通詩娜一直唔願意同我一齊既原因，並唔係怕異地戀難受？



而係…

因為……


原來我唔夠愛詩娜……



＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿


http://www.youtube.com/watch?v=EvCo37w6iBo